ཕྱི་ལོ་ ༢༠༡༩ ཟླ་ ༥ ཚེས་ ༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༩ ཟླ་ ༥ ཚེས་ ༢ རེས་གཟའ་ཕུར་བུའི་ཉིན་བོད་ཀྱི་སྲིད་བྱུས་ཉམས་ཞིབ་ཁང་དུ་འགན་འཛིན་གསར་རྙིང་འཕོ་ལེན་གྱི་མཛད་སྒོ་སྟབས་བདེ་ཞིག་ཚོགས་ཏེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གྱི་ལས་ཁུར་འགོ་འཛུགས་གནང་སོང་།
དེ་ཡང་གོང་ཚེས་ཉིན་གྱིསྔ་དྲོ་ཆུ་ཚོད་ ༩།༣༠ ཐོག་འགན་འཛིན་ཟུར་པ་ཚེ་རིང་དབྱངས་སྐྱིད་ལགས་དང་འགན་འཛིན་གསར་པ་ཤོ་ཟུར་ཚེ་དབང་སྒྲོལ་མ་ལགས། འགན་འཛིན་ལས་རོགས་བསྟན་འཛིན་ལེགས་བཤད་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་ལས་བྱེད་རྣམས་ཚང་འཛོམས་ཀྱིས་ཐོག་མར་འགན་འཛིན་གསར་རྙིང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་གྲུབ་བསྟུན་རྟེན་འབྱུང་གསོལ་ཇ་དང་འབྲས་སིལ་ཕུལ།
དེ་ནས་འགན་འཛིན་ཟུར་པ་ཚེ་རིང་དབྱངས་སྐྱིད་ལགས་ཀྱིས་འཚམས་འདྲི་དང་འབྲེལ་འགན་འཛིན་གསར་པ་ཤོ་ཟུར་ཚེ་དབང་སྒྲོལ་མའི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་གྲུབ་མཚམས་འགན་འཛིན་གསར་པ་ཤོ་ཟུར་ཚེ་དབང་སྒྲོལ་མ་ལགས་ཀྱིས་འཚམས་འདྲིའི་གསུང་བཤད་གནང་། དེ་ནས་འགན་འཛིན་གསར་རྙིང་དབར་ཕན་ཚུན་མཇལ་དར་གཡོགས་རེས་གནང་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་ལས་བྱེད་ཡོངས་ནས་འགན་འཛིན་གསར་པ་ཤོ་ཟུང་ཚེ་དབང་སྒྲོལ་མ་ལགས་སུ་འཚམས་འདྲིའི་མགུལ་དར་ཕུལ།
ཤོ་ཟུར་ཚེ་དབང་སྒྲོལ་མ་ལགས་ནི། སྟོད་མངའ་རིས་གླང་ཆུ་གྲོང་སྡེའི་འགོ་པ་ཕ་མགོན་པོ་དང་མ་སྲི་ཐར་གཉིས་ཀྱི་རིགས་སུ་ཕྱི་ལོ་ ༡༩༥༩ ཟླ་ ༡༠ ཚེས་ ༡༤ ཉིན་སྐྱེས། ཌལ་ཧོར་དང་སིམ་ལ་གཏན་སློན་ནས་ཕྱི་ལོ་ ༡༩༧༦ ཟླ་ ༤ ཚེས་ ༡༨ ཉིན་རྒྱལ་ཡོངས་གཞི་རིམ་སློབ་གྲྭ་ཐོན། ཕྱི་ལོ་ ༡༩༧༦ ཟླ་ ༥ ཚེས ༡༩ ནས་ ༡༩༧༧ ཟླ་ ༡༠ ཚེས་ ༢༤ བར་དང་ཞབས་ཁོངས་འཛུལ་ནས་དྲུང་ཡིག་གི་ལས་སྣེ་སོགས་ཞབས་ཞུ་བསྒྲུབས། ཕྱི་ལོ་ ༡༩༧༨ ལོར་ཌེ་སྡུན་དུ་ཤེས་རིག་འཛིན་སྐྱོང་ཐོག་སྦྱོང་བརྡར་ཐོན། ཕྱི་ལོ་ ༡༩༧༩ ཟླ་ ༨ ཚེས་ ༡༥ ཉིན་གནས་དགུ་པ་གཞོན་དྲུང་ཚོད་ལྟའི་ཐོག་རྡ་སྟེང་བདེ་སྲུང་ཡན་ལག་དང་བདེ་དོན་གཅིག་ལྕོགས་ལས་ཁུངས་ཀྱི་ལས་བྱེད་དུ་བསྐོ་གཞག་གིས་ཕྱི་ལོ་ ༡༩༨༠ ཟླ་ ༡༠ ཚེས་ ༡ ནས་གཞོན་དྲུང་ངོ་མར་བསྐོ་གཞག་གིས་ལས་འགན་རང་འཇགས། ཕྱི་ལོ་ ༡༩༨༦ ཟླ་ ༣ ཚེས་ ༡༥ ནས་ལྡི་ལི་སྐུ་ཚབ་དོན་གཅོད་ཁང་གི་གཞོན་དྲུང་ལས་འགན་དུ་གནས་སྤོས་བསྐོ་གཞག་གནང་། ཕྱི་ལོ་ ༡༩༩༡ ཟླ་ ༧ ཚེས་ ༡ ནས་གནས་བརྒྱད་པ་རྒན་དྲུང་དུ་གནས་སྤར་དང་འབྲེལ་ལས་འགན་རང་འཇགས་བསྐོ་གཞག་གནང། ཕྱི་ལོ་ ༡༩༩༢ ཟླ་ ༩ ཚེས་ ༡༥ ཉིན་ཆེས་མཐོའི་ཁྲིམས་ཞིབ་ཁང་གི་རྒན་དྲུང་དུ་གནས་སྤོས་བསྐོ་གཞག་གནང་།
ཕྱི་ལོ་ ༡༩༩༨ ཟླ་ ༡ ཚེས་ ༡༢ ནས་ཉིན་གྲངས་བཅུའི་རིང་སྡེ་ར་སྡུན་བདེ་སྐྱིད་གླིང་དུ་ཆེས་མཐོའི་ཁྲིམས་ཞིབ་ཁང་གིས་གོ་སྒྲིག་གནང་བའི་ཁྲིམས་ཞིབ་པའི་སྦྱོང་བརྡར་ཐེངས་དང་པོའི་ཁོངས་ངོ་བཅར་གྱིས་བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་ཁྲིམས་ཡིག་དང་། སྤྱི་མང་གཏུག་བཤེར་འགྲོ་ལུགས་ཁྲིམས་ཡིག་དཔང་རྟགས་ཁྲིམས་ཡིག་བཅས་སློབ་གཉེར་སྦྱོང་བརྡར་ལེགས་ཐོན། ཕྱི་ལོ་ ༡༩༩༥ ཟླ་ ༥ ཚེས་ ༡༧ ནས་སླར་ཡང་ལྡི་ལི་སྐུ་ཚབ་དོན་གཅོད་ཁང་གི་སྡེ་ཚན་འགན་འཛིན་དུ་གནས་སྤོས་བསྐོ་གཞག་གནང་། ཕྱི་ལོ་ ༡༩༩༧ ཟླ་ ༤ ཚེས་ ༡༤ ནས་དྲུང་གཞོན་ལས་རོགས་སུ་གནས་སྤར་དང་འབྲེལ་ཕྱི་ལོ་ ༡༩༩༧ ཟླ་ ༤ ཚེས་ ༢༥ ནས་ས་ཊོན་ཀཿ་ཐོག་བཟོ་གཞིས་ས་གནས་འགོ་འཛིན་དུ་གནས་སྤོས་བསྐོ་གཞག་གནང་། ཕྱི་ལོ་ ༡༩༩༩ ཟླ་ ༦ ཚེས་ ༢༡ ནས་ཧར་པ་སྤུར་ས་གནས་འགོ་འཛིན་དུ་གནས་སྤོས་བསྐོ་གཞག་གནང་། ཕྱི་ལོ་ ༢༠༠༠ ཟླ་ ༧ ཚེས་ ༡༤ ནས་དྲུང་ཆེ་གཞོན་པའི་གནས་རིམ་དུ་གནས་སྤར་དང་འབྲེལ་ཕྱི་ལོ་ ༢༠༠༠ ཟླ་ ༩ ཚེས་ ༤ ནས་འཕྲོད་བསྟེན་ལས་ཁུངས་ཀྱི་དྲུང་གཞོན་དུ་གནས་སྤོས་བསྐོ་གཞག་གནང་། ཕྱི་ལོ་ ༢༠༠༢ ཟླ་ ༢ ཚེས་ ༤ ནས་ནང་སྲིད་ལས་ཁུངས་ཀྱི་དྲུང་གཞོན་དུ་གནས་སྤོས་བསྐོ་གཞག་གནང་། ཕྱི་ལོ་ ༢༠༠༧ ཟླ་ ༧ ཚེས་ ༦ ཉིན་༸དཔལ་ལྡན་བཀའ་ཁྲི་མཆོག་གི་མདུན་ནས་བཙན་བྱོལ་གཞུང་གི་བཀོད་སྒྲིག་ལམ་སྟོན་གཞིར་བཟུང་ལོ་ངོ་ ༢༥ རིང་རྒྱལ་ཁབ་དང་། མི་རིགས་ལ་བརྩེ་ཞེན་ལྷག་བློས་དྲངས་པའི་གཞུང་མང་ཞབས་འདེགས་ངལ་འཁུར་ཆེ་བསྐྱེད་ཞུས་པར་ལེགས་སོའི་ལག་འཁྱེར་གནང་སོན་བྱུང་ཡོད། ཕྱི་ལོ་ ༢༠༠༨ ཟླ་ ༢ ཚེས་ ༡༦ ནས་ཟུང་འབྲེལ་དྲུང་ཆེའི་གནས་རིམ་དུ་གནས་སྤར་དང་འབྲེལ་ནང་སྲིད་ལས་ཁུངས་ཀྱི་ཟུང་འབྲེལ་དྲུང་ཆེའི་ལས་འགན་དུ་བསྐོ་གཞག་གནང་། ཕྱི་ལོ་ ༢༠༡༠ ཟླ་ ༧ ཚེས་ ༦ ཉིན་གུས་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་མདུན་ནས་ཕྱི་ལོ་ ༢༠༡༠ ལོའི་གཞུང་ཞབས་འགན་འཛིན་སྡེ་ཚན་ཁོངས་ནས་ལས་དོན་བྱས་རྗེས་གཟེངས་སུ་ཐོན་པའི་བྱ་དགའ་གསོལ་རས་བཀྲིན་ཆེ་ཐོབ་བྱུང་། ཕྱི་ལོ་ ༢༠༡༤ ཟླ་ ༨ ཚེས་ ༡༩ ནས་དྲུང་ཆེ་ལས་འཕར་དུ་གནས་སྤར་གྱིས་ནང་སྲིད་ལས་ཁུངས་ཀྱི་དྲུང་ཆེ་ལས་འཕར་གྱི་ལས་འགན་ཐོག་བསྐོ་གཞག་དང་འབྲེལ་ད་ལྟའི་ཆར་ནང་སྲིད་ལས་ཁུངས་ཀྱི་བདེ་དོན་སྡེ་ཚན། ན་གཞོན་རོགས་སྐྱོར་ཚན་པ། རྩིས་ཁང་། ནང་ཞིབ། ས་ཁང་ཚན་པ་སོགས་ཀྱི་འགན་འཛིན་གྱིས་ལས་འགན་ཞུ་བཞིན་བཅས་ལོ་ངོ་ ༤༠ ལྷག་བོད་མིའི་སྒྲིག་འཛུགས་ནང་ཞབས་འདེགས་ཞུ་མུས་སུ་ཡོད་པའི་ལོ་རྒྱུས་སྙིང་བསྡུས།།
