ཕྱི་ལོ་ ༢༠༡༩ ཟླ་ ༤ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢༦ རེས་གཟའ་པ་སངས་སྔ་དྲོ་ཆུ་ཚོད་༨ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྡི་ལི་ས་གནས་བོད་མིས་ཇི་ལྟར་གསོལ་བ་བཏབ་པ་ལྟར་ལྡི་ལི་གསར་པའི་རོ་ཧི་ནི་ས་ཁུལ་དུ་རྟེན་གཞི་བྱས་པའི་བོད་ཁྱིམ་གཞོན་ནུ་སྡོད་ཁང་དུ་ལྡི་ལི་ཁུལ་གྱི་མཐོ་སློབ་འདྲ་མིན་ནང་སློབ་གཉེར་གནང་བཞིན་པའི་བོད་རིགས་སློབ་ཕྲུག་གིས་གཙོས་མི་མང་ལ་བཀའ་སློབ་སྩལ་གནང་གྲུབ་མཚམས།
ལྡི་ལི་ནས་མཁའ་ལམ་བརྒྱུད་ཆུ་ཚོད་ ༡༡།༡༠ ཙམ་ལ་ཧི་མ་ཅལ་མངའ་སྡེའི་ཀང་ར་རྫོང་ག་གྷལ་གནམ་ཐང་ལ་༧ཞབས་སོར་བདེ་བར་འཁོད་སྐབས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག གཞན་ཡང་རྡ་ས་ས་གནས་འགོ་འཛིན་སོགས་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་དགེ་ལས་སློབ་ཕྲུག་སོགས་ནས་ཕེབས་བསུའི་སྣེ་ལེན་གཟབ་རྒྱུས་ཞུས། སྐབས་དེར་གསར་འགོད་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྐུའི་འཕྲོད་བཞེས་སྐོར་བཀའ་འདྲི་ཞུས་སྐབས། མགོན་པོ་གང་ཉིད་མཆོག་གིས། ད་ནི་སངས་དྲག་ཕྱིན་འདུག་ཅེས་བཀའ་ལན་བསྩལ།
དེ་རྗེས་མགོན་པོ་གང་ཉིད་མཆོག་ག་གྷལ་གནམ་ཐང་ནས་༸རྒྱལ་བའི་ཕོ་བྲང་དུ་ཆིབས་སྒྱུར་སྐྱོང་སྐབས་གཞུང་ལམ་གྱི་གཡས་གཡོན་དུ་བོད་མིའི་སྒྲིག་འཛུགས་ཀྱི་སྲི་ཞུ་བའི་ལས་བྱེད་རྣམ་པ་དང་། བཞུགས་སྒར་རྡ་ས་ཁུལ་གྱི་སེར་སྐྱ་མང་ཚོགས། དེ་བཞིན་ཕྱི་རྒྱལ་མི་རིགས་སོགས་ནས་ལག་ཏུ་དཀར་གཙང་གི་མཇལ་དར་བསྣམས་ནས་ཕེབས་བསུའི་སྣེ་ལན་གཟབ་རྒྱས་ཞུས་ཡོད་པ་བཅས། །
