ཕྱི་ལོ་ ༢༠༡༩ ཟླ་ ༤ ཚེས་ ༢ རེས་གཟའ་མིག་དམར།

༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢ ཉིན་གྱི་ཉིན་གུང་ཆུ་ཚོད་ ༡༢། ༤༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་ག་གྷལ་གནམ་ཐང་བརྒྱུད་ལྡི་ལིར་ཆིབས་སྒྱུར་བསྐྱངས་ཡོད་པ་དང་། ཕྱི་ཚེས་ ༤ ནས་ ༦ བར་མགོན་པོ་གང་ཉིད་མཆོག་གིས་རྒྱ་གར་གྱི་རྒྱལ་ས་ལྡི་ལིར་སྤྱི་ཚོགས་དང་མྱོང་ཚོར། བཟང་སྤྱོད་བཅས་གོང་སྤེལ་གཏོང་བའི་སློབ་གསོ་ Social, Emotional, and Ethical Learning ཞེས་པའི་རྒྱལ་སྤྱིའི་རང་བཞིན་ལྡན་པའི་བསླབ་གཞི་གཏན་འབེབས་ལེགས་གྲུབ་ཀྱི་དབུ་འབྱེད་མཛད་སྒོའི་སྐུ་མགྲོན་གཙོ་བོར་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་མཛད།

དེ་ཡང་མཛད་འཆར་ལྟར་ན། ཕྱི་ཟླ་ ༤ ཚེས་ ༤ སྔ་དྲོ་ཆུ་ཚོད་ ༡༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཤེས་ཡོན་སློབ་སྟོན་མཁས་པ་ཁག་གཅིག་དང་། ཨེ་མོ་རི་མཐོ་སློབ་ཀྱི་སྐུ་ཚབ་བཅས་ཀྱིས་ལྡི་ལིར་ཨན་དཱཛ་ Andaz Hotel  ཚོགས་ཁང་ནང་གསར་འགོད་གསལ་བསྒྲགས་ཤིག་སྤེལ་གནང་མཛད་རྒྱུ་དང་། 

ཕྱི་ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་དབུ་འབྱེད་མཛད་གཏན་འཁེལ་བ་དང་། དེ་རྗེས་མཁས་པའི་བགྲོ་གླེང་ཐོག་དབུ་བཞུགས་མཛད་རྒྱུ་མ་ཟད།  

ཕྱེད་ཡོལ་སློབ་ཕྲུག་དང་ཤེས་ཡོན་སློབ་སྟོན་མཁས་དབང་བཅས་དབར་རིས་མེད་བཟང་སྤྱོད་སྐོར་བགྲོ་གླེང་གནང་རྒྱུ། 

ཕྱི་ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ཡོན་ནང་བྱམས་བརྩེའི་སློབ་གསོ་འཇོག་གལ་ཆེ་བའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག དེ་ཉིན་ཕྱེད་ཡོལ་དུ་མཇུག་སྡོམ་མཛད་སྒོ་འཚོགས་རྒྱུ་ཡིན་འདུག