ཕྱི་ལོ་ ༢༠༡༩ ཟླ་ ༤ ཚེས་ ༢༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢༤ རེས་གཟའ་ལྷག་པའི་སྔ་དྲོ་ཆུ་ཚོད་ ༡༡ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་གསར་འགྱུར་ལས་ཁང་གི་ངེས་སྟོན་པ་ཨརྱ་ཚེ་དབང་རྒྱལ་པོ་ལགས། གསར་འགོད་པ་བཅས་ཚང་འཛོམས་ཀྱིས་ཐོག་མར་བོད་མིའི་སྒྲིག་འཛུགས་ཀྱི་གསར་འགྱུར་ལས་ཁང་གི་ངེས་སྟོན་པ་ཨརྱ་ཚེ་དབང་རྒྱལ་པོ་ལགས་ཀྱིས་གསར་འགོད་ལྷན་ཚོགས་སྐོར་ངོ་སྤྲོད་གནང་རྗེས་དཔལ་ལྡན་སྲིད་སྐྱོང་མཆོག་གིས་གསུང་དོན། རྩ་བའི་ཕྱི་ཟླ་ ༣ ནང་ལྔ་དང་ལྔ་བཅུའི་འཆར་སྣང་དང་འབྲེལ་བའི་ཚོགས་འདུ་ཁག་གསུམ་ཚོགས་པའི་སྐོར་དང་། ཚོགས་འདུའི་བརྗོད་གཞི་ཁག་གང་ཡིན་པའི་སྐོར་འགྲེལ་བཤད་སྙིང་བསྡུས་ཤིག་བརྒྱབ་པ་ཡིན། ལྔ་དང་ལྔ་བཅུའི་བརྗོད་གཞི་ཁག་དང་མི་མང་གི་དགོངས་ཚུལ་ཁག་དེ་དག་གྲོས་ཚོགས་ཀྱི་མདུན་ཅོག་སྟེང་ཕུལ་ཟིན་པ་ཡིན། འོན་ཀྱང་ང་ཚོས་ཡིག་ཐོག་ནས་ཕུལ་བ་ཡིན་སྟབས། མང་ཚོགས་ནས་བརྗོད་གཞི་ཁག་གང་ཡིན་པ་དང་ཚོགས་བཅར་བའི་དགོངས་ཚུལ་གང་ཕེབས་ཡོད་པ་དེ་དག་འགྲེམ་སྤེལ་ཐུབ་པ་ཡིན་ན། དམིགས་བསལ་ཚོགས་ཆེན་སྐབས་ཀྱི་བརྗོད་གཞི་གཙོ་བོ་གཅིག་ནི། ལྔ་དང་ལྔ་བཅུ་ཡིན་པར་བརྟེན། མང་ཚོགས་ནང་དགོངས་ཚུལ་བརྗེ་ལེན་གནང་རྒྱུས་མཚོན་དགོངས་འཆར་འབུལ་རྒྱུར་ཁྱད་པར་བཟོ་ཡི་འདུག་ཅེས་དགོངས་འཆར་དེ་འདྲ་ཡོང་གི་ཡོད་ས་རེད།
ལོ་ལྔ་དང་ལྔ་བཅུའི་ནང་དབུ་མའི་ལམ་གཞི་ལ་བཞག་པའི་ཐོག་ནས་མིང་དོན་མཚུངས་པའི་རང་སྐྱོང་ཇི་ལྟར་ཐོབ་ཐུབ་ཀྱི་རེད། དེ་དང་མཉམ་དུ་ལོ་ལྔ་བཅུའི་འཆར་གཞི་དགོས་ཀྱི་འདུག་ཟེར་རྒྱུ་འདི་གཙོ་བོ་རེད། ལོ་ལྔའི་ནང་དབུ་མའི་ལམ་གཞི་ལ་བཞག་པའི་ཐོག་ནས་འབད་བརྩོན་གནང་སྟེ་མིང་དོན་མཚུངས་པའི་རང་སྐྱོང་ཐོབ་པ་ཡིན་ན་ང་ཚོའི་རྒྱལ་ཁ་རེད། དེ་བཞིན་བོད་མིའི་སྒྲིག་འཛུགས་དང་ང་ཚོའིོ་རྩ་དོན་ལོ་ལྔ་བཅུ་གནས་པའི་ཐོག་ང་ཚོའི་ནུས་སྟོབས་ཤུགས་ཆེ་རུ་ཕྱིན་པ་ཡིན་ན། ལོ་ལྔ་བཅུའི་ནང་རྒྱ་ནག་འགྱུར་བ་འགྲོ་རྒྱུ་ངེས་པ་རེད། རྒྱ་ནག་འགྱུར་བ་ཕྱིན་པ་ཡིན་ན་བོད་ཀྱི་གནས་སྟངས་འགྱུར་བ་འགྲོ་གི་རེད། ང་ཚོར་མིང་དོན་མཚུངས་པའི་རང་སྐྱོང་ཐོབ་ཀྱི་རེད། དེར་བརྟེན་ལྔ་ལ་རྒྱལ་ཁ་ཐོབ་རྒྱུའི་རེ་བ་ཡོད་པ་མ་ཟད་ལྔ་བཅུ་ལའང་རྒྱལ་ཁ་ཐོབ་རྒྱུའི་རེ་བ་ཡོད། ང་ཚོས་ལས་ཀ་གང་བྱེད་པ་ཡིན་ནའང་ཕྲལ་ཕུགས་རྒྱང་གསུམ་གཞི་ལ་བཞག་པའི་ཐོག་ནས་དགོངས་པ་བཞེས་ཏེ་ཕེབས་དགོས་ཀྱི་འདུག ཅེས་གསུང་བཤད་གནང་རྗེས་ལྔ་དང་ལྔ་བཅུའི་ཆབ་སྲིད་དང་འབྲེལ་བའི་ཚོགས་འདུའི་སྐབས་ཀྱི་བརྗོད་གཞི་ཁག་གཙོ་བོ་བཞོ་སྟེ། གྲོས་གཞི་དང་པོ། བོད་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་དབར་དོན་ཕན་ལྡན་པའི་འབྲེལ་ལམ་དང་ཞི་མོལ་ཡོང་ཐབས། གྲོས་གཞི་གཉིས་པ། བོད་དང་རྒྱ་གར་གཙོས་ཨེ་ཤི་ཡ་བར་གྱི་འབྲེལ་བ། གྲོས་གཞི་གསུམ་པ། རྒྱལ་སྤྱིའི་འབྲེལ་ལམ་དང་། དྲིལ་བསྒྲགས། གྲོས་གཞི་བཞི་པ། ལྔ་དང་ལྔ་བཅུའི་འཆར་སྣང་ཐོག་བོད་མིའི་སྒྲིག་འཛུགས་ནས་འགོ་ཁྲིད་གནང་ཕྱོགས་བཅས་ཀྱི་སྐོར་ངོ་སྤྲོད་ཞིབ་ཕྲ་གནང་།
ལྔ་དང་ལྔ་བཅུའི་ཚོགས་འདུ།
འབྱུང་འགྱུར་བོད་ཀྱི་ཆབ་སྲིད་མདུན་ལམ་གཏན་འབེབས་གནང་ཕྱོགས་ཀྱི་གླེང་སྟེགས་ཞེས་པའི་རྒྱལ་སྤྱིའི་ཚོགས་འདུ་ཕྱི་ལོ་ ༢༠༡༧ ཟླ་ ༡༠ ཚེས་ ༦ ནས་ ༨ བར་བཞུགས་སྒར་རྡ་རམ་ས་ལར་བསྐོང་ཚོགས་གནང་བའི་སྐབས་ཀྱི་བརྗོད་གཞི་སྙིང་བསྡུས་གཤམ་གསལ།
རྒྱབ་གཉེར་བསམ་འཆར་གྲངས་ ༩༡ བྱུང་ཁོངས་ནས་བསམ་འཆར་སྙིང་བསྡུས་གྲངས་ ༤༤ བྱུང།
བརྗོད་གཞི་དང་པོ། བོད་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་བར་དོན་ཕན་ལྡན་པའི་འབྲེལ་ལམ་དང་ཞི་མོལ་ཡོང་ཐབས། (རྒྱབ་གཉེར་བསམ་འཆར་ཁག ༡༣)
བརྗོད་གཞི་གཉིས་པ། བོད་དང་རྒྱ་གར་གཙོས་ཨེ་ཤི་ཡ་བར་གྱི་འབྲེལ་བ། (རྒྱབ་གཉེར་བསམ་འཆར་ཁག ༡༣)
བརྗོད་གཞི་གསུམ་པ། རྒྱལ་སྤྱིའི་འབྲེལ་ལམ་དང་། དྲིལ་བསྒྲགས། (རྒྱབ་གཉེར་བསམ་འཆར་ཁག ༧)
བརྗོད་གཞི་བཞི་པ། ལྔ་དང་ལྔ་བཅུའི་འཆར་སྣང་ཐོག་བོད་མིའི་སྒྲིག་འཛུགས་ནས་འགོ་ཁྲིད་གནང་ཕྱོགས། (རྒྱབ་གཉེར་བསམ་འཆར་ཁག ༡༡)
རྒྱབ་གཉེར་བསམ་འཆར་ཁྱོན་བསྡོམས་ ༤༤
གཞོན་སྐྱེས་ལྔ་དང་ལྔ་བཅུའི་འཆར་སྣང་ལྷན་ཚོགས་ཀྱི་བརྗོད་གཞི་སྙིང་བསྡུས་ཁག
ཕྱི་ལོ་ ༢༠༡༨ ཟླ་ ༨ ཚེས་ ༡༧ ནས་ ༢༠ བར་བཞུགས་སྒར་རྡ་རམ་ས་ལར་བསྐོང་ཚོགས་གནང་བའི་གཞོན་སྐྱེས་ལྔ་དང་ལྔ་བཅུའི་འཆར་སྣང་ལྷན་ཚོགས་སྐབས་ཀྱི་བརྗོད་གཞི་སྙིང་བསྡུས་གཤམ་གསལ།
ཁྱོན་བསྡོམས་རྒྱབ་གཉེར་བསམ་འཆར་ ༣༤
བརྗོད་གཞི་དང་པོ།
བོད་དང་རྒྱ་ནག་མི་དམངས་སྤྱི་མཐུན་རྒྱལ་ཁབ། ལོ་རྒྱུས་ཐོག་འབྲེལ་ལམ་གྱི་གལ་གནད་དང་། དོན་ཕན་གྱི་འབྲེལ་ལམ་དང་གྲོས་མོལ་བསྐྲུན་ཐབས།
གོང་གི་བརྗོད་གཞིའི་ཐོག་རྒྱབ་གཉེར་བསམ་འཆར་ ༧ བྱུང་འདུག
བརྗོད་གཞི་གཉིས་པ།
བོད་ཕྱི་ནང་གཉིས་ཀྱི་བོད་མི་ཐུན་མོང་ནས་བོད་ཀྱི་གནད་དོན་ཐོག་ཡ་ལན་བྱེད་ཕྱོགས།
གོང་གི་བརྗོད་གཞིའི་ཐོག་རྒྱབ་གཉེར་བསམ་འཆར་ ༧ བྱུང་འདུག
བརྗོད་གཞི་གསུམ་པ།
བོད་མིའི་རང་དབང་འཐབ་བརྩོད་ཐོག་ན་གཞོན་རྣམས་ཀྱི་ལས་འགན། ཡིག་ངག་གཉིས་ཐོག་འབྲེལ་ལམ། ཞུ་གཏུག་དང་། རྒྱལ་སྤྱིའི་འབྲེལ་ལམ།
བརྗོད་གཞི་འདིའི་ཐོག་བསམ་འཆར་ ༩ བྱུང་འདུག
བརྗོད་གཞི་བཞི་པ།
ལྔ་དང་ལྔ་བཅུའི་འཆར་སྣང་ཐད་བོད་མིའི་སྒྲིག་འཛུགས་ཀྱི་དབུ་ཁྲིད་ནས་འགན་ཁུར་བཞེས་ཕྱོགས་དང་། འཆར་སྣང་ལྡན་པའི་དབུ་ཁྲིད་བསྐྲུན་ཐབས་དང་། ནུས་པ་མཉམ་སྤུངས།
བརྗོད་གཞི་དེའི་ཐོག་བསམ་འཆར་ ༡༡ བྱུང་འདུག
བོད་མིའི་སྤྱི་ཚོགས་སྲ་བརྟན་ཡོང་ཐབས་ཐོག་ཕྱི་ལོ་ ༢༠༡༨ ཟླ་ ༩ ཚེས་ ༡༣ ནས་ ༡༦ བར་ལྔ་དང་ལྔ་བཅུའི་ཚོགས་འདུའི་བརྗོད་གཞི་སྙིང་བསྡུས་ཁག
བརྗོད་གཞི་དང་པོ། བོད་ཀྱི་རིག་གཞུང་རྒྱུན་གནས་ཐུབ་ཐབས།
ནང་གསེས་བརྗོད་གཞི་ཁག་གཤམ་གསལ།
ཀ༽ བོད་ཀྱི་རིག་གཞུང་གི་ངོ་བོ་འཛིན་སྟངས་དང་མི་ཉམས་རྒྱུན་འཛིན་བྱེད་ཐབས།
ཁ༽། བོད་ཀྱི་སྐད་ཡིག་གོང་སྤེལ་གཏོང་ཐབས།
ག༽ བོད་བརྒྱུད་ནང་བསྟན་དང་དེའི་རིན་ཐང་དར་སྤེལ་བརྒྱུད་བོད་ཀྱི་རིག་གཞུང་མི་ཉམས་རྒྱུན་འཛིན་བྱེད་ཐབས།
ང༽ འགྲེམས་སྟོན་ཁང་དང་རིག་གཞུང་ལྟེ་གནས་ཁང་ཁག་བརྒྱུད་བོད་ཀྱི་རིག་གཞུང་མི་ཉམས་རྒྱུན་འཛིན་བྱེད་ཐབས།
ཅ༽ སྒྱུ་རྩལ་ལ་བརྟེན་ནས་བོད་ཀྱི་རིག་གཞུང་མི་ཉམས་རྒྱུན་འཛིན་བྱེད་ཐབས།
བརྗོད་གཞི་གཉིས་པ། བོད་མིའི་ཤེས་ཡོན་ཡར་རྒྱས་གཏོང་ཐབས།
ནང་གསེས་བརྗོད་གཞི་ཁག་གཤམ་གསལ།
ཀ༽ སྤུས་ཚད་ལྡན་པའི་ཤེས་ཡོན་གྱི་གནད་དོན།
ཁ༽ སློབ་གྲྭར་འགོ་འཁྲིད་ཀྱི་ནུས་པ་ཡར་རྒྱས་གཏོང་དགོས་པ།
ག༽ སྤྱི་ཚོགས་དང་མི་འབོར་ལ་འཕྲད་པའི་དཀའ་ངལ་གྱིས་ཤེས་ཡོན་ལ་ཐེབས་པའི་ཤུགས་རྐྱེན།
ང༽ གཞི་རིམ་ཤེས་ཡོན་སྲིད་བྱུས་ལག་བསྟར་གནང་ཕྱོགས་དང་འབྲེལ་བའི་དཀའ་ངལ།
ཅ༽ བོད་མིའི་སྤྱི་ཚོགས་ནང་ཆེད་ལས་གསོ་སྐྱོང་བྱེད་ཐབས།
བརྗོད་གཞི་གསུམ་པ། བཙན་བྱོལ་བོད་མིའི་སྤྱི་ཚོགས་ཀྱི་འཕྲོད་བསྟེན་ཡར་རྒྱས་གཏོང་ཕྱོགས་དང་འབྲེལ་བའི་གནད་དོན།
ནང་གསེས་བརྗོད་གཞི་ཁག་གཤམ་གསལ།
ཀ༽ བོད་མིའི་སྤྱི་ཚོགས་ནས་འཕྲོད་བསྟེན་དང་འབྲེལ་བའི་དཀའ་ངལ་གདོང་ལེན་བྱེད་བཞིན་པ།
ཁ༽ དཔལ་འབྱོར་གྱི་ཆ་ནས་བོད་མིའི་འཕྲོད་བསྟེན་མཐུན་རྐྱེན་སྲ་བརྟན་དང་ཡུན་གནས་ཡོང་ཐབས།
ག༽ བོད་མིའི་འཕྲོད་བསྟེན་ལྟ་སྐྱོང་ལས་གཞིའི་ནང་མིའི་ནུས་པ་དང་། འཕྲོད་བསྟེན་ལས་ཁུངས་ཁྱབ་ཁོངས་སྨན་ཁང་ཁག་ནང་འཕྲོད་བསྟེན་ལྟ་སྐྱོང་དང་ཞབས་ཞུའི་སྤུས་ཚད་ཡར་རྒྱས་གཏོང་ཐད།
ང༽ གསོ་བ་རིག་པ་རྒྱ་སྐྱེད་དང་ཟུང་འབྲེལ་གྱི་ཐབས་ལམ།
ཅ༽ ཕྱི་ལུགས་སྨན་བཅོས་ཞུ་ཕྱོགས་ཀྱི་ཐབས་ལམ་དང་ནད་རིགས་སྔོན་འགོག
བརྗོད་གཞི་བཞི་པ། བོད་མིའི་སྤྱི་ཚོགས་ཀྱི་འཚོ་རྟེན་ཡར་རྒྱས་གཏོང་ཐབས།
ནང་གསེས་བརྗོད་གཞི་ཁག་གཤམ་གསལ།
ཀ༽ གནས་ཡུལ་སྤོ་བཤུད་དང་གཞོན་སྐྱེས་དང་འབྲེལ་བའི་གནད་དོན་སེལ་ཐབས།
ཁ༽ གཞིས་ཆགས་ཁག་གི་ཞིང་ལས་གཉེར་ཕྱོགས་བསྒྱུར་བཅོས་གཏོང་ཐབས།
ག༽ བཙན་བྱོལ་བོད་མིའི་སྤྱི་ཚོགས་སུ་དཔལ་འབྱོར་གྱི་ཐོན་སྐྱེད་དང་ལས་རིགས་མཐུན་འགྱུར་ཡོང་སླད་བོད་མིའི་སྒྲིག་འཛུགས་ངོས་ནས་རྒྱུན་གནས་ཐུབ་པའི་དཔལ་འབྱོར་ཞབས་ཞུ་ལྟེ་གནས་རིགས་འཛུགས་ཐབས།
ང༽ བཙན་བྱོལ་བོད་མིའི་སྤྱི་ཚོགས་ཁྲོད་ཡར་ཐོན་ཚོང་ལས་དང་ཚོང་ལས་ཆེ་འབྲིང་ཆུང་གསུམ་གཉེར་ཐབས་ཡོང་བར་སྐུལ་སློང་དང་རྒྱབ་སྐྱོར་སྤེལ་ཐབས།
ཅ༽ ཕྱི་རྒྱལ་ཡུལ་གྲུ་ཁག་ཏུ་གནས་འཁོད་བོད་མིའི་འོས་འགན།
