ཕྱི་ལོ་ ༢༠༡༩ ཟླ་ ༤ ཚེས་ ༣༠ རེས་གཟའ་མིག་དམར།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢༩ ནས་ཕྱི་ཟླ་ ༥ ཚེས་ ༣ བར་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག་བཞུགས་སྒར་རྡ་ས་ཉེ་འཁྲིས་སུ་ཡོད་པའི་འཛིན་སྐྱོང་སྦྱོང་བརྡར་ཁང་དུ་རྒྱ་གར་བྱང་ཕྱོགས་ཁུལ་གྱི་སྔོན་དགེ་ཁག་གཅིག་ལ་བྱིས་པའི་ཀློག་རྩལ་དང་འབྲེལ་བའི་ཟབ་སྦྱོང་གནང་བཞིན་ཡོད།
ཐེངས་འདིའི་ཟབ་སྦྱོང་ནང་རྡ་སྟེང་བོད་ཁྱིམ་དང་། མ་སུ་རི་བོད་ཁྱིམ། སཾ་བྷོ་ཊ་བོད་སློབ་ཚོགས་པའི་ཁྱབ་ཁྱོངས་སློབ་གྲྭ་ཁག་བཅས་ནས་ཁྱོན་སྔོན་འགྲོའི་དགེ་རྒན་གྲངས་ ༢༣ མཉམ་ཞུགས་གནང་ཡོད་པ་དང་། ཟབ་སྦྱོང་ཐེངས་གཉིས་པ་དེ་བཞིན་ཕྱི་ཟླ་ ༥ ཚེས་ ༦ ནས་ ༡༠ བར་སྔོན་འགྲོའི་དགེ་རྒན་གྲངས་ ༢༢ ལ་གནང་རྒྱུ་ཡིན་འདུག
དེ་ཡང་ཕྱི་ཚེས་ ༢༩ ཉིན་ཟབ་སྦྱོང་དབུ་འབྱེད་ཀྱི་མཛད་སྒོར་ཤེས་རིག་ལས་ཁུངས་ཀྱི་འབྲེལ་ཡོད་ལས་བྱེད་བསོད་ནམས་གངས་བཟང་ལགས་ཀྱིས་ཟབ་སྦྱོང་བ་རྣམས་ལ་ཕེབས་བསུ་དང་འབྲེལ་ཤེས་རིག་ལས་ཁུངས་ཀྱི་བྱིས་པའི་ཀློག་རྩལ་ཁྲིད་ཐབས་ཀྱི་དགོས་དམིགས་སོགས་རྒྱབ་ལྗོངས་ལོ་རྒྱུས་ངོ་སྤྲོད་གནང་གྲུབ་མཚམས་ཟབ་སྦྱོང་བ་རྣམས་ཀྱིས་རང་ཉིད་ངོ་སྤྲོད་གནང་རྗེས་ཤེས་རིག་དེང་སྲོལ་ཚན་པའི་འགན་འཛིན་བསྟན་འཛིན་རྡོ་རྗེ་ལགས་ཀྱིས་བྱིས་པ་ལོ་དྲུག་བར་གྱི་གནས་སྐབས་ནི་ལུས་སེམས་ཚར་ལོངས་སླད་ཧ་ཅང་གལ་ཆེན་པོ་ཆགས་ཡོད་སྟབས། གཞི་རིམ་དགེ་རྒན་རྣམས་ནས་ཕྲུ་གུ་རེ་རེའི་ལུས་སེམས་ཀྱི་ཚར་ལོངས་སྐོར་མཁྱེན་པའི་ཐོག་བྱིས་པའི་འབྲི་ཀློག་ཡར་རྒྱས་གཏོང་ཐབས་ཆེད་བྱིས་པའི་ཀློག་རྩལ་ཐོག་ཤུགས་གནོན་རྒྱག་དགོས་སྐོར་སོགས་ཀྱི་གསུང་བཤད་གནང་།
ཟབ་ཁྲིད་པ་ནི་བསོད་ནམས་གངས་བཟང་ལགས་ཡིན་འདུག་པ་དང་ཟབ་སྦྱོང་འདི་བཞིན་ཨ་རི་བོད་ཀྱི་ཐེབས་རྩ་དང་སྤྱི་ཚོགས་ཡར་རྒྱས་ཐེབས་རྩ་བརྒྱུད་ཨ་རི་རོགས་ཚོགས་ USAID ནས་མཐུན་འགྱུར་གནང་བ་ཞིག་ཡིན་འདུག་པ་བཅས། །
