ཕྱི་ལོ་ ༢༠༡༩ ཟླ་ ༣ ཚེས་ ༦ རེས་གཟའ་ལྷག་པ།

༄༅། །ཕྱི་ལོ་ ༢༠༡༩ ཟླ་ ༣ ཚེས་ ༥ རེས་གཟའ་མིག་དམར་ཉིན་ཨིན་ཡུལ་གྱི་གྲོང་ཁྱེར་ཆེ་གྲས་ནོར་ཐམ་ཊོན་ Northampton ནང་ཡོད་པའི་གེལཌ་ཧོལ་ Guildhall ཞེས་པའི་ཁང་པའི་མདུན་ཐང་དུ་ལོ་འཁོར་བོད་ཀྱི་རྒྱལ་དར་སྒྲེང་འཛུགས་ཐེངས་ ༢༠  སྲུང་བརྩི་གཟབ་རྒྱས་གནང་འདུག

དེ་ཡང་གོང་ཚེས་ཉིན་གྲོང་ཁྱེར་གྱི་སྤྱི་ཁྱབ་པ་སྐུ་ཞབས་ཊོ་ནི་ཨན་སལ་ Tony Ansell ལགས་དང་། ལྕམ་ཇེན་ Jayne Crofts ལགས།  ཕིལ་ལ་ཏེཊ་ Phil Larratt  ལགས། དེ་བཞིན་ལས་འགུལ་གོ་སྒྲིག་གནང་མཁན་གཙོ་བོ་ཡིན་པའི་ལྕམ་སྐུ་ཀེ་རོ་ལིན་སི་ཀེ་ཊར་གུ་ཌི་ Caroline Scattergood ལགས། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། སྤྱི་འཐུས་དབྲ་རྩ་བསོད་ནམས་ནོར་བུ་ལགས་ཀྱིས་གཙོས་ས་གནས་ཀྱི་མི་མང་སོགས་ཁྱོན་མི་གྲངས་ ༡༠༠ ལྷག་ཙམ་ཚང་འཛོམས་ཀྱིས་ལོ་འཁོར་བོད་ཀྱི་རྒྱལ་དར་སྒྲེང་འཛུགས་ཐེངས་ ༢༠  པ་དེ་སྲུང་བརྩི་གནང་འདུག  གྲོང་ཁྱེར་དེའི་ནང་ལོ་ངོ་ ༢༠ གོང་ནས་བཟུང་ལོ་ལྟར་ཕྱི་ཟླ་གསུམ་པའི་ནང་གསུམ་བཅུའི་དུས་དྲན་གྱི་དུས་སྐབས་དང་བསྟུན་བོད་ཀྱི་རྒྱལ་དར་སྒྲེང་འཛུགས་ཀྱི་ལམ་ནས་བོད་དང་བོད་མིར་གདུང་སེམས་མཉམ་སྐྱེ་གནང་བཞིན་ཡོད་པ་རེད།

སྐབས་དེར་ཨིན་ཡུལ་སྐུ་ཚབ་དོན་ཕར་སི་བསོད་ནམས་ཚེ་རིང་ལགས་ཀྱིས་གྲོང་ཁྱེར་སྤྱི་ཁྱབ་པས་གཙོས་སྐུ་མགྲོན་རྣམ་པ་དང་མང་ཚོགས་བཅས་ལ་བོད་དོན་ཐོག་རྒྱབ་སྐྱོར་དང་གདུང་སེམས་མཉམ་སྐྱེ་མཚོན་སླད་ཆེད་ཕེབས་གནང་བར་ཐུགས་རྗེ་ཆེ་ཞུས་ཡོད་པ་དང་། ལྷག་པར་ལས་འགུལ་གོ་སྒྲིག་གནང་མཁན་གཙོ་བོ་ལྕམ་སྐུ་ཀེ་རོ་ལིན་སི་ཀེ་ཊར་གུ་ཌི་ Caroline Scattergood ལགས་ཀྱིས་ད་བར་བོད་དོན་ཐོག་རྒྱབ་སྐྱོར་གནང་དང་གནང་བཞིན་པ་མ་ཟད། དཀའ་ངལ་ལ་མི་ལྟོས་པར་གྲོང་ཁྱེར་དེའི་ནང་བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་གོ་སྒྲིག་གནང་བར་བཀའ་དྲིན་ཆེ་ཞུས་པ་དང་། ཨིན་ཡུལ་གྱི་གྲོང་ཁྱེར་ཆེ་གྲས་ནོར་ཐམ་ཊོན་ནང་ལོ་ལྟར་ཕྱི་ཟླ་ ༣ ནང་བོད་ཀྱི་རྒྱལ་དར་སྒྲེང་འཛུགས་དེ་བཞིན་བོད་མི་རང་དབང་སྒེར་ལངས་ཀྱི་ཉིན་མོ་ཞིག་ཡིན་པ་མཚོན་གྱི་ཡོད།

གལ་ཏེ་བོད་ནང་བོད་མི་རྣམས་ཀྱིས་བོད་ཀྱི་རྒྱལ་དར་སྒྲེང་འཛུགས་གནང་བ་ཡིན་ན་རྒྱ་ནག་གཞུང་གིས་ཁྲིམས་འགལ་བརྩིས་ནས་བཙོན་འཇུག་བྱེད་ཀྱི་ཡོད། དེ་རིང་འདིར་ཚང་འཛོམས་ཀྱིས་བོད་ཀྱི་རྒྱལ་དར་སྒྲེང་འཛུགས་ཀྱི་ལམ་ནས་བོད་ནང་ཡོད་པའི་བོད་མིའི་གནས་སྟངས་ལ་གདུང་སེམས་མཉམ་སྐྱེ་གནང་བཞིན་ཡོད་སྐོར་སོགས་ཀྱི་གསུང་བཤད་གནང་གྲུབ་མཚམས། གྲོང་ཁྱེར་སྤྱི་ཁྱབ་པའི་ལས་ཁུངས་སུ་ཨིན་ཡུལ་དོན་གཅོད་དང་། སྤྱི་འཐུས་དབྲ་རྩ་བསོད་ནམས་ནོར་བུ་ལགས་རྣམ་གཉིས་ལ་ཇ་སྟོན་སྟབས་བདེ་ཞིག་གོ་སྒྲིག་གནང་། སྐབས་དེར་སྤྱི་འཐུས་དབྲ་རྩ་བསོད་ནམས་ནོར་བུ་ལགས་ཀྱིས་ཐུགས་རྗེ་ཆེ་ཞུའི་མཚོན་སླད་མཇལ་དར་དང་། དྲན་རྟེན་ཕྱག་རྟགས་ཤིག་འབུལ་ཡོད།

ཕྱོགས་མཚུངས་ལྕམ་སྐུ་ཀེ་རོ་ལིན་སི་ཀེ་ཊར་གུ་ཌི་ལགས་ཀྱིས་དཀའ་ངལ་ཤུགས་ཆེ་འཕྲད་མིན་ལ་མ་ལྟོས་པར་བོད་དོན་དང་བོད་མི་རྣམས་ལ་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུ་མཚོན་བྱེད་དུ་དྲན་རྟེན་ཕྱག་རྟགས་ཤིག་འབུལ་སྟེ་ལས་འགུལ་དེ་བཞིན་ལེེགས་པར་མཇུག་སྒྲིལ་ཡོད་པ་བཅས། །