ཕྱི་ལོ་ ༢༠༡༩ ཟླ་ ༣ ཚེས་ ༨ རེས་གཟའ་པ་སངས།༄༅། །ཕྱི་ལོ་ ༢༠༡༩ ཟླ་ ༣ ཚེས་ ༧ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པྲཱག་ནང་དུ་སྲུང་བརྩི་ཞུས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་གློག་བརྙན་དུས་སྟོན་ཆེ་ཤོས་སུ་གྲགས་པ། “འཛམ་གླིང་གཅིག་གི་གློག་བརྙན་དུས་སྟོན་” One World Film Festival ཞེས་པའི་དབུ་འབྱེད་མཛད་སྒོར་བོད་དོན་གཏམ་བཤད་བཤད་སྤེལ་འདུག  

སྐབས་དེར་ People in Need ཞེས་པའི་ཚོགས་པའི་ Homo Homini award ཞེས་པའི་གཟེངས་རྟགས་དེ་བཞིན་སྲིད་སྐྱོང་མཆོག་གིས་ཚོགས་པའི་མིང་ཐོག་ནས་འདི་ལོའི་གཟེངས་རྟགས་ཀྱི་བྱ་ག་ཐོབ་མཁན་ལྷོ་ཨ་རིའི་ནི་ཁ་རི་གོ་བ་ Nicaragua ཡུལ་ནས་ཡིན་པ་ལྕམ་ཕེ་རེན་ཆེ་སི་ཀ་ Francisca Ramírez མཆོག་ལ་ཕུལ་འདུག  དེ་ཡང་གཟེངས་རྟགས་དེ་ནི་ལོ་ལྟར་རྒྱལ་སྤྱིའི་ཁྱོན་དུ་འགྲོ་བ་མིའི་ཐོབ་ཐང་དང་མང་གཙོ། ཞི་བདེ་གོང་འཕེལ་ཐོག་གཟེངས་སུ་ཐོན་པའི་ཕྱག་ལས་གནང་མཁན་མི་སྒེར་གྱི་བྱས་རྗེས་ལ་ངོས་འཛིན་ཞུ་སླད་འབུལ་སྲོལ་ཡོད་འདུག   ལྕམ་སྐུ་ཕེ་རེན་ཆེ་སི་ཀ་ Francisca Ramírez མཆོག་གིས་ཡུལ་དེའི་སོ་ནམ་པ་ཚོའི་ཐོབ་ཐང་ཆེད་འཐབ་རྩོད་གནང་བ་དེར་ངོས་འཛིན་ཐོབ་པ་ཞིག་ཡིན་འདུག 

མཛད་སྒོའི་ཐོག་སྲིད་སྐྱོང་མཆོག་གིས་དེང་སྐབས་རྒྱལ་སྤྱིའི་ཁྱོན་དུ་རྒྱ་ནག་གི་དཔལ་འབྱོར་དང་ཆབ་སྲིད་ཀྱི་སྟོབས་ཤུགས་རྒྱས་བཞིན་པའི་སྐབས་དང་བསྟུན། རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་སྟངས་ཐོག་ལའང་རྒྱ་ནག་དམར་པོའི་ཕྱི་འབྲེལ་སྲིད་བྱུས་འོག་ཤུགས་རྐྱེན་ཐེབས་བཞིན་ཡོད་པ་དང་།

དེང་སྐབས་རྒྱལ་ཞེན་རིང་ལུགས་དང་མཐར་ལྷུང་རིང་ལུགས་ལ་བརྟེན་ནས་གུ་ཡངས་དང་རྒྱལ་སྤྱིའི་རིང་ལུགས་ལ་འགོག་རྐྱེན་བཟོ་བཞིན་ཡོད་པའི་དུས་སྐབས་འདིར། ང་ཚོ་ཚང་མས་ཕན་ཚུན་མཉམ་རུབ་ཐོག་ནས་ལས་དོན་སྤེལ་དགོས་པ་ནི་དུས་ཀྱི་དགོས་མཁོ་ཞིག་ཆགས་ཡོད་སྟབས། ཐེངས་འདིར་ལྷན་ཚོགས་ཀྱི་བརྗོད་གཞི་དེའང་Close Proximityཞེས་པའམ་ཕན་ཚུན་བློ་ཐག་ཉེས་པོའི་ཐོག་ནས་ལས་ཀ་མཉམ་རུབ་བྱེད་དགོས་པ་ནི། ད་ལྟའི་གནས་སྟངས་དང་ཧ་ཅང་འཚམ་པོ་ཡོད་སྐོར་གསུང་དོན།

ནང་ཆོས་ནས་གསུང་བའི་གཞན་ལ་བྱམས་བརྩེའི་སྒོ་ནས་བློ་ཉེས་པོ་བྱ་རྒྱུ་དང་།  གཞན་གྱི་བདེ་དོན་ལ་བསམ་ཤེས་བྱ་རྒྱུ་དེས་རང་བཞིན་གྱིས་གཞན་དང་མཐུན་འབྲེལ་ཡོང་ཐུབ་པར་བརྟེན།  ལྟ་གྲུབ་དེའི་འོག་ནས་ད་ལྟའི་འཛམ་གླིང་ནང་འཕྲད་བཞིན་པའི་དཀའ་ངལ་མང་པོ་ཞིག་སེལ་ཐུབ་རྒྱུ་ཡིན་པ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ཡིན་ཞིང་།  དེ་སྔ་ཅེག་སྤྱི་མཐུན་རྒྱལ་ཁབ་ནང་དམར་ཤོག་གི་དབང་སྒྱུར་ལ་གྱེན་ལོག་བྱེད་སྐབས་མི་མང་ཚོའི་བསམ་བློའི་ནང་མཐུན་འབྲེལ་དང་འདྲ་མཉམ་གྱི་རིན་ཐང་ཧ་ཅང་རྩ་ཆེར་འཛིན་ཡོད། ཅེས་དང་། 

གཞན་ཡང་སྲིད་སྐྱོང་མཆོག་གིས་ད་ལྟའི་རྒྱ་ནག་དམར་པོའི་སྲིད་གཞུང་གིས་ཆབ་སྲིད་ཀྱི་ཁེ་ཕན་ཁོ་ནར་དམིགས་ཏེ་ནུས་པ་གང་ཡོད་བཏོན་ནས་འཛམ་གླིང་རྒྱལ་ཁབ་དང་ཚོགས་པ་ཕན་ཚུན་དབྱེན་སྦྱོར་བྱས་པ་དང་། རང་ཕྱོགས་དང་གཞན་ཕྱོགས་ཀྱི་ས་མཚམས་ཇེ་ཉུང་དུ་གཏོང་རྒྱུའི་ཚབ་ཏུ་འཛམ་གླིང་སྔར་བས་དུམ་བུར་བགོ་ཐབས་བྱེད་བཞིན་ཡོད་པ། 

ལྷག་པར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནས་དེ་སྔ་འགྲོ་བ་མིའི་ཐོབ་ཐང་གི་གནས་སྟངས་འགྲེལ་བརྗོད་གཏན་འབེབ་གནང་ཟིན་པ་དེར་འགྲེལ་བཤད་གསར་པ་ཞིག་བརྒྱབ་སྟེ།  འགྲོ་བ་མིའི་ཐོབ་ཐང་གི་གནས་སྟངས་འགྲེལ་བརྗོད་བྱེད་སྐབས་འགྲོ་བ་མི་ལ་ཉེ་བར་མཁོ་བའི་དཔལ་འབྱོར་གྱི་མཐུན་རྐྱེན་ཚད་ལྡན་ཞིག་བསྒྲུབ་ཐུབ་པ་ཡིན་ན།  དེས་འགྲོ་བ་མིའི་ཐོབ་ཐང་སྲུང་སྐྱོབ་བྱས་པར་ངོས་འཛིན་བྱེད་དགོས་པ་དང་། དེ་ལྟར་རྒྱ་ནག་གཞུང་གིས་བཤད་པའི་འགྲེལ་བཤད་གསར་པ་དེའི་ནང་གཙོ་བོ་དཔལ་འབྱོར་གྱི་གནས་སྟངས་ཡར་རྒྱས་ཕྱིན་པ་ཡིན་ན་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་རང་བཞིན་གྱིས་ཡར་རྒྱས་དང་ཚད་ལྡན་ཡིན་པ་ཞིག་ལ་ངོས་འཛིན་བྱེད་དགོས་པ་ལྟར།  འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་གཏན་འབེབ་གནང་བ་དེར་འགྱུར་བ་གཏོང་དགོས་པའི་བསམ་ཚུལ་རྒྱལ་ཚོགས་ཀྱི་ལྷན་ཚོགས་སུ་བཏོན་ཡོད་སྐོར་དང་། སྤྱིར་ད་བར་འཛམ་གླིང་མཉམ་འབྲེལ་རྒྱལ་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་སྐོར་གཏན་འབེབས་གནང་བ་དེ་ནི་ཕྱི་ལོ་ ༡༩༩༣ ཕྱི་ཟླ་ ༦ ཚེས་ ༢༥ ཉིན་ཨོ་སི་ཊི་རི་ཡའི་རྒྱལ་ས་ཝི་ཡ་ནར་གྲགས་གཏམ་Vienna declaration ཞེས་ཡོངས་གྲགས་སུ་ངོས་འཛིན་ཞུ་བཞིན་པའི་འགྲོ་བ་མིའི་ཐོབ་ཐང་གི་གནས་སྟངས་ཚད་འཇོག་སའི་འགྲེལ་བརྗོད་དེར་ངོས་ལེན་མ་བྱས་པ་རེད། 

གྲོང་ཁྱེར་ཝི་ཡ་ནའི་གྲགས་གཏམ་Vienna declaration ཞེས་པའི་ནང་། དཔལ་འབྱོར་ཡར་རྒྱས་གལ་ཆེ་ཡང་དེ་མཚུངས་འགྲོ་བ་མི་ལ་ཆབ་སྲིད་ཀྱི་ཐོབ་ཐང་དང་གང་ཟག་སྒེར་གྱི་རང་དབང་ཡང་དེ་མཚུངས་གལ་ཆེ་ཡིན་པ་གསལ་ཡོད།  གལ་ཏེ་རྒྱ་ནག་གཞུང་གིས་འགྲོ་བ་མི་ལ་དཔལ་འབྱོར་ཡར་རྒྱས་དགོས་མཁོ་ཡོད་པའི་རྒྱུ་མཚན་དུ་བྱས་ནས་འགྲོ་བ་མིའི་ཐོབ་ཐང་གི་གནས་སྟངས་ཚད་འཛིན་ས་དེ་དཔལ་འབྱོར་ཡར་རྒྱས་ཁོ་ན་ཡིན་ཟེར་ན།  དེར་སྙད་ནས་རྒྱ་ནག་སྲིད་གཞུང་གིས་རང་གི་མི་མང་ཚོར་ཆབ་སྲིད་ཀྱི་ཐོབ་དང་གཞི་རྩའི་རང་དབང་ལ་བརྩི་མེད་རྡོག་རོལ་དེ་བས་ཚབས་ཆེ་རུ་གཏོང་རྒྱུ་ཡིན་པ་གདོན་མི་ཟ།  ཁྱེད་རང་གི་སྨྲ་བརྗོད་རང་དབང་ཐོབ་ཐང་དེ་ལས་ཁྱེད་ཀྱི་དཔལ་འབྱོར་ཡར་རྒྱས་ཀྱི་གནས་སྟངས་དེ་གལ་ཆེ་བ་རེད། ཟེར་ནས་རྒྱ་ནག་གཞུང་གིས་ཁྱེད་རང་གི་སྨྲ་བརྗོད་རང་དབང་བཙན་འཕྲོག་བྱ་རྒྱུ་རེད། 

དེ་ལྟར་རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་གནས་སྟངས་ཐོག་འགྲེལ་བརྗོད་གསར་པ་དེའི་འོག་ནས་འགྲོ་བ་མིའི་ཐོབ་ཐང་རྩོད་ལེན་པ་རྣམས་ལ་དམ་བསྒྲགས་བྱེད་བཞིན་ཡོད།  འཛམ་གླིང་མཉམ་འབྲེལ་རྒྱལ་ཚོགས་ནང་རྒྱ་ནག་གིས་ཤུགས་རྐྱེན་ཧ་ཅང་སྤྲོད་ཐུབ་རྒྱུ་རེད།  གང་ཡིན་བརྗོད་ན་རྒྱ་ནག་ནི་འཛམ་གླིང་མཉམ་འབྲེལ་རྒྱལ་ཚོགས་ལ་དཔལ་འབྱོར་རོགས་རམ་མང་ཤོས་སྤྲོད་མཁན་རྒྱལ་ཁབ་ཨང་གཉིས་པ་དེ་ཆགས་ཡོད།   དེར་བརྟེན་རྒྱ་ནག་གཞུང་གིས་ད་ལྟའི་རྒྱལ་སྤྱིའི་སྒྲིག་འཛུགས་ཀྱི་སྒྲོམ་གཞི་དེར་རང་སྣང་གང་དྲན་འོག་འགྱུར་བ་གཏོང་ཐབས་བྱེད་བཞིན་ཡོད། ད་ཆ་ཁོ་པ་ཚོར་དེ་ལྟར་བྱ་རྒྱུའི་སྟོབས་ཤུགས་ཀྱང་ཡོད་པ་རེད།  ཕྱོགས་མཚུངས་མང་གཙོའི་རིང་ལུགས་ལ་མཚོན་ན་རྒྱ་ནག་གཞུང་གིས་རྒྱལ་སྤྱིའི་ཡོངས་གྲགས་ཀྱི་མང་གཙོའི་ལམ་ལུགས་ལ་བརྩི་མེད་ཐོག་ཀྲུང་གོའི་ཁྱད་ཆོས་ལྡན་པའི་མང་གཙོའི་ལམ་ལུགས་ལག་བསྟར་བྱེད་ཚུལ་སྤོབས་པ་ཆེན་པོས་བཤད་ཀྱི་ཡོད། 

རྒྱ་ནག་གཞུང་གིས་རྒྱུད་གཅིག་ལམ་གཅིག་ཟེར་བའི་དཔལ་འབྱོར་གྱི་སྲིད་བྱུས་འོག་དབང་ཤུགས་རྒྱ་སྐྱེད་བྱེད་ཐབས་བྱེད་བཞིན་ཡོད།  དེར་བརྟེན་ཁྱེད་ཚོས་ཀྱང་རྒྱ་ནག་གི་རྒྱུད་གཅིག་ལམ་གཅིག་ཟེར་བའི་སྲིད་བྱུས་ལ་ཡིད་གཟབ་བྱེད་དགོས།  རྒྱ་ནག་དང་ཚོང་འབྲེལ་བྱེད་སྐབས་ཆབ་སྲིད་ཀྱི་ཤུགས་རྐྱེན་ཞོར་ལ་བསླེབ་ཀྱི་ཡོད། དེ་བཞིན་སྤྱི་ཚོགས་དང་ཤེས་ཡོན་ཐོག་ལའང་རྒྱ་ནག་གཞུང་གིས་གནོན་ཤུགས་སྤྲོད་རྒྱུ་རེད།  ཡུལ་འདིར་དེ་སྔ་དམར་ཤོག་རིང་ལུགས་ལ་ངོ་རྒོལ་གྱེན་ལངས་བྱས་པའི་སྙིང་སྟོབས་དང་ཆོད་སེམས་དུས་ད་བར་མུ་མཐུད་གནས་ཡོད་པར་ངས་མཐོང་གི་འདུག   གང་ཡིན་བརྗོད་ན་ཡུལ་འདིར་ཡུ་རོབ་ཁྱོན་ཡོངས་ནང་གྲོས་ཚོགས་བོད་དོན་རྒྱབ་སྐྱོར་གྱི་ཚོགས་པ་ཆེ་ཤོས་འཛུགས་ཐུབ་པ་བྱུང་ཡོད།

འདས་པའི་ལོ་གསུམ་རིང་བོད་ཀྱི་རྒྱལ་དར་སྒྲེང་འཛུགས་གནང་ཐུབ་མེད་ཀྱང་ད་ཆ་སླར་ཡང་རྒྱལ་ས་པྲཱག་གིས་གཙོས་གྲོང་ཁྱེར་བདུན་བརྒྱ་ཙམ་གྱི་མི་མང་ཚོགས་ཁང་དང་ཚོགས་སྡེ་ཁག་གི་ལས་ཁུངས།  དེ་བཞིན་སློབ་གྲྭ་བཅས་ཀྱི་མདུན་དུ་བོད་ཀྱི་རྒྱལ་དར་སྒྲེང་འཛུགས་གནང་རྒྱུ་ཡིན་པ་རེད།  དེས་ཅེག་སྤྱི་མཐུན་རྒྱལ་ཁབ་ཀྱི་མི་མང་གི་མངོན་འདོད་མཚོན་ཐུབ་པ་དང་། བཅའ་ཁྲིམས་དོན་ཚན་  ༧༧ གསལ་པོར་མངོན་ཐུབ། ཕྱོགས་མཚུངས་ཡུལ་འདིའི་སྲིད་འཛིན་ཟུར་པ་སྐུ་ཞབས་ཝ་སི་ལབ་ཧ་ཝེལ་  Vaclav Havel མཆོག་གི་དགོངས་གཞིའང་མཚོན་ཐུབ། དེར་བརྟེན་དེ་རིང་ང་རང་འདིར་མཛད་སྒོའི་ཐོག་མཉམ་ཞུགས་ཐུབ་པ་ཧ་ཅང་དགའ་པོ་བྱུང་། ཞེས་གསུངས།