༄༅། །ཕྱི་ལོ་ ༢༠༡༩ ཟླ་ ༣ ཚེས་ ༡༡ ཉིན་རྒྱལ་སྤྱིའི་གསར་འགྱུར་ཚན་པ་གྲགས་ཅན་རུ་ཊར་ Reuters གྱི་གསར་འགོད་པ་ཀྲཱིཤཎ་དཱས་Krishna N.Das ལགས་དང་། སུ་ནིལ་ཀ་ཏཱ་རི་ཡ་Sunil Kataria  ལགས་གཉིས་ཀྱིས་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུས་འདུག   སྐབས་དེར་གསར་འགོད་པས་༸རྒྱལ་བའི་ཡང་སྲིད་དང་། བོད་རྒྱ་འབྲེལ་མོལ་སོགས་གནད་དོན་ཁག་གཅིག་སྐོར་བཅར་འདྲི་ཞུས་པ་དང་།  ༸རྒྱལ་བའི་ཡང་སྲིད་ཀྱི་གནད་དོན་ཐད་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་བའི་སྙིང་པོར།  འབྱུང་འགྱུར་ཏཱ་ལའི་བླ་མའི་ཡང་སྲིད་ཀྱི་གནད་དོན་ཐད་༸གོང་ས་༸སྐྱབས་མགོན་ཆེན་པོ་མཆོག་ལས་ཀྱང་རྒྱ་ནག་གཞུང་ལ་སེམས་འཚབ་ཆེ་བ་ཡོད་པ་དང་།  མ་འོངས་པར་རྒྱ་ནག་གཞུང་གིས་ཏཱ་ལའི་བླ་མའི་ཡང་སྲིད་གཅིག་ཏན་ཏན་གདམ་སྲིད་པ་དང་།  དེ་ནས་རང་དབང་ལུང་པར་འཁྲུངས་པའི་ཏཱ་ལའི་བླ་མ་བཅས་ཏཱ་ལའི་བླ་མའི་ཡང་སྲིད་གཉིས་བྱུང་མཚམས།  རྒྱ་ནག་གཞུང་གིས་བདམས་པ་དེར་སུ་གཅིག་གིས་ཀྱང་ཡིད་ཆེས་དང་དད་གུས་ཞུ་རྒྱུ་མིན་སྟབས་རྒྱ་ནག་ལའང་དཀའ་ངལ་འཕར་མ་ཞིག་བཟོ་ངེས་སྐོར་ཞལ་ཤོབ་དང་སྦྲགས་བཀའ་ལན་སྩལ་འདུག   གསར་འགོད་པའི་དྲི་བ་དང་སྦྲགས་༸རྒྱལ་བའི་ཡང་སྲིད་རྒྱ་གར་ནང་འཁྲུངས་སྲིད་པ་ཞིག་ཡིན་སྐོར་ཡང་བཀའ་ལན་སྩལ་འདུག 

གཞན་ཡང་གསར་འགོད་པ་དང་ལྷན་བོད་རྒྱ་འབྲེལ་མོལ་སྐོར་གྱི་དྲི་བར་བཀའ་ལན་སྩོལ་སྐབས།  ཕྱི་ལོ་ ༢༠༡༠ ནས་བཟུང་བོད་རྒྱ་འབྲེལ་མོལ་མཚམས་ཆད་ཀྱང་གཞིས་བྱེས་གཉིས་སུ་གནས་པའི་བོད་མིའི་དབར་དེ་སྔ་ལས་འབྲེལ་བ་ཟབ་པ་ཡོད་པ་དང་།  གཞུང་འབྲེལ་མིན་པའི་ཐོག་ནས་པེ་ཅིང་སྲིད་གཞུང་དང་འབྲེལ་བ་ཡོད་པའི་རྒྱ་ནག་གཞུང་གི་བགྲེས་ཡོལ་ལས་བྱེད་དང་རྒྱ་རིགས་ཚོང་པ་ཁག་གཅིག་རྡ་སར་མགོན་པོ་མཆོག་དང་ཡང་ཡང་མཇལ་འཕྲད་བྱུང་སྐོར་བཀའ་ལན་སྩལ་འདུག 

འབྱུང་འགྱུར་༸རྒྱལ་བའི་ཡང་སྲིད་མུ་མཐུད་གནས་དགོས་དང་མི་དགོས་ཟེར་བ་དེ་འདི་ལོའི་ལོ་མཇུག་མཚམས་སུ་རྒྱ་གར་ནང་དུ་ཚུགས་རྒྱུའི་བོད་བརྒྱུད་ནང་བསྟན་ཚོགས་ཆེན་སྐབས་གོ་བསྡུར་སྦྱངས་བཤད་མཛད་རྒྱུ་ཡིན་སྐོར་བཀའ་ལན་སྩལ་བ་དང་སྦྲགས།  སྤྱིར་སྟོན་པ་ཤཱཀྱ་ཐུབ་པའི་ཡང་སྲིད་ཟེར་བ་ཞིག་བྱོན་མེད་ཀྱང་འཇིག་རྟེན་འདིར་སངས་རྒྱས་ཀྱི་བསྟན་པ་མུ་མཐུད་གནས་བཞིན་ཡོད་སྐོར་བཀའ་ལན་སྩལ་འདུག  

དེ་ཡང་གོང་གི་གསར་ལས་ཁང་གིས་དེ་སྔ་ཕྱི་ལོ་ ༢༠༡༧ ཟླ་ ༡༡ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བྱང་ཕྱོགས་ཨ་ཡིར་ལེནྜི་Northern Ireland རྒྱལ་ས་ལོན་ཌོན་ཌེ་རིའི་Londonderryནང་ཆིབས་སྒྱུར་བཀའ་དྲིན་སྐྱོང་སྐབས་གསར་འགོད་ལྷན་ཚོགས་ཐོག་༸རྒྱལ་བའི་ཡང་སྲིད་ཀྱི་གནད་དོན་ཐོག་སྩལ་བའི་བཀའ་སློབ་ལུང་འདྲེན་ཞུས་པའི་ནང་།  བོད་མི་རྒྱ་ཆེ་མང་ཚོགས་ཀྱིས་འབྱུང་འགྱུར་ཏཱ་ལའི་བླ་མའི་བླ་བྲང་མུ་མཐུད་གནས་དགོས་པར་གཟིགས་ཚེ་བླ་བྲང་མུ་མཐུད་རྒྱུ་དང་།  དེ་ནས་༸རྒྱལ་བའི་ཡང་སྲིད་ཀྱི་གནད་དོན་སྐོར་གླེང་སློང་ཡོང་རྒྱུ་ཡིན་པ་དང་། གལ་ཏེ་མ་འོངས་པར་ཏཱ་ལའི་བླ་མའི་ཡང་སྲིད་ཕེབས་པ་ཡིན་ནའང་ཆོས་ཕྱོགས་ཀྱི་ལས་འགན་ཁོ་ན་མ་གཏོགས་བོད་མིའི་ཆབ་སྲིད་ཀྱི་ཐུགས་འགན་གང་ཡང་བཞེས་རྒྱུ་མིན་སྐོར་བཀའ་སློབ་སྩལ་འདུག 

ཕྱོགས་མཚུངས་རུ་ཊར་གསར་འགོད་པས་འབྱུང་འགྱུར་རྒྱ་ནག་ནང་དུ་ནང་ཆོས་དང་ཚན་རིག་སྐོར་གྱི་བགྲོ་གླེང་རིགས་ཚོགས་སྲིད་མིན་སྐོར་གྱི་དྲི་བར་མགོན་པོ་གང་ཉིད་ནས་བཀའ་ལན་སྩོལ་སྐབས། སྤྱིར་༸གོང་ས་༸སྐྱབས་མགོན་ཆེན་པོ་མཆོག་གིས་འཇིག་རྟེན་ཁམས་ཀྱི་རིག་པ་དང་། དབང་རྩའི་ཚན་རིག  ཚད་རྡུལ་དངོས་ཁམས་རིག་པ། སེམས་ཁམས་རིག་པ་བཅས་ཀྱི་རྣམ་གཞག་ཐོག་ཐུགས་སྣང་ཧ་ཅང་མཛད་བཞིན་པ་དང་།

གལ་ཏེ་མགོན་པོ་མཆོག་བོད་དུ་༸ཞབས་སོར་འཁོད་ཐུབ་ཚེ་རྒྱ་ནག་གི་མཐོ་སློབ་ཁག་ཏུ་བརྗོད་གཞི་དེ་དག་སྐོར་བགྲོ་གླེང་མཛད་རྒྱུར་ཐུགས་འདོད་ཡོད་ཀྱང་ད་ལྟ་རྒྱ་ནག་དམར་ཤོག་ཚོགས་པའི་དབང་སྒྱུར་འོག་ཡོད་སྟབས།  གནས་སྐབས་དེ་ལྟར་ཡོང་ཐུབ་རྒྱུའི་ཐུགས་རེ་མཛད་ཀྱི་མེད་སྐོར་བཀའ་ལན་སྩལ་དོན། “རྒྱ་ནག་རྒྱལ་ཁབ་འདི་བཞིན་ལོ་རྒྱུས་ལྡན་པའི་གནའ་བོའི་རྒྱལ་ཁབ་ཅིག་རེད། འོན་ཀྱང་ད་ལྟ་རྒྱ་ནག་ཆབ་སྲིད་ཀྱི་གནས་སྟངས་འོག་ནས་གཅིག་བསྡུས་དབང་འཛིན་ཡིན་སྟབས་རང་དབང་བྲལ་བ་རེད།  དེར་བརྟེན་ངོས་རང་རང་དབང་ཡོད་པའི་རྒྱལ་ཁབ་འདིར་བསྡད་འདོད་ཡོད།  བོད་མིའི་འཐབ་རྩོད་ཀྱི་ནུས་པ་དེ་བདེན་པར་གཞི་བཅོལ་བ་ཞིག་རེད། འོན་ཀྱང་རྒྱ་ནག་གི་སྟོབས་ཤུགས་དེ་མེ་མདར་གཞི་བཅོལ་ནས་ཡོད།  འཕྲལ་དུ་མེ་མདའི་ནུས་པར་རྒྱལ་ཁ་ཐོབ་པ་ལྟར་སྣང་ཡང་ཕུགས་རྒྱང་རིང་པོར་བདེན་པའི་ནུས་པར་རྒྱལ་ཁ་ཐོབ་ངེས། “ཞེས་བཀའ་ལན་སྩལ་འདུག།