ཕྱི་ལོ་ ༢༠༡༩ ཟླ་ ༣ ཚེས་ ༥ རེས་གཟའ་མིག་དམར། 

༄། ། ཕྱི་ལོ་ ༢༠༡༩ ཟླ ༣ ཚེས་ ༢ ནས་ ༣ བར་ཉིན་གྲངས་གཉིས་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་ལས་འཆར་ཚན་པས། མངྒ་ལོར་མཐོ་སློབ་ཁག་གི་ནང་སློབ་སྦྱོང་བྱེད་བཞིན་པའི་བོད་པའི་སློབ་ཕྲུག་ཁག་གཅིག་ལ་མངྒ་ལོར་དུ་རྟེན་གཞི་བྱས་པའི་ Kanachur Institute of Medical Sciences ཞེས་པའི་མཐོ་སློབ་ཏུ་གཉིས་སྨན་དབུ་མའི་ལམ་གྱི་སྲིད་བྱུས་སྐོར་གོ་རྟོགས་དང་འབྲེལ་བའི་ཟབ་སྦྱོང་ཞིག་གོ་སྒྲིག་གནང་ཡོད། 

དེ་ཡང་གོང་ཚེས་ཉིན་གྱི་སྔ་དྲོ་མཐོ་སློབ་ཀྱི་འགན་འཛིན་ནས་སྣེ་ལེན་ཞུས་ཡོད་པ་དང་། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་ཐུགས་རྗེ་ཆེ་ཞུ་མཚོན་སླད་མཇལ་དར་སྒྲོན་གནང་ཡོད།

ཕྱི་ཚེས་ ༢ རེས་གཟའ་སྤེན་པ་ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཐོག་མངྒ་ལོར་མཐོ་སློབ་ཁག་གི་ནང་སློབ་སྦྱོང་བྱེད་བཞིན་པའི་བོད་པའི་སློབ་ཕྲུག་ཁྱོན་མི་གྲངས་ ༨༠ ཙམ་ཚང་འཛོམས་ཀྱི་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་སློབ་ཕྲུག་རྣམས་ལ་འཆམ་མཐུན་ཡོང་དགོས་གལ་གྱི་སྐོར་དང་།  སློབ་སྦྱོང་ལ་འབད་བརྩོན་ཧུར་ཐག་གནང་དགོས་སྐོར་དང་འབྲེལ།  གཉིས་སྨན་དབུ་མའི་ལམ་གྱི་སྲིད་བྱུས་སྐོར་ལ་གསུང་བཤད་ཟབ་རྒྱས་གནང་ཡོད་པ་མ་ཟད། ཟབ་སྦྱོང་བ་རྣམས་ཀྱི་དོགས་འདྲི་མང་པོ་ཞིག་ལ་གསལ་བཤད་དང་འབྲེལ་ནས་དབུ་མའི་ལམ་གྱི་སྲིད་བྱུས་ཀྱི་བྱུང་རིམ་དང་། རྒྱབ་ལྗོངས་ལོ་རྒྱུས། དེ་བཞིན་དབུ་མའི་ལམ་གྱི་གྲུབ་འབྲས་སོགས་ཀྱི་སྐོར་ལ་ངོ་སྤྲོད་གནང་ཡོད།

སྐབས་དེར་ཟབ་ཁྲིད་གནང་མཁན་ཕྱི་འབྲེལ་དྲུང་འཕར་འཆི་མེད་ཚེ་དབྱངས་ལགས་དང་། ཕྱི་དྲིལ་ལས་བྱེད་འབྲུག་ལྡན་སྐྱིད་ལགས། མཁའ་འགྲོ་སྒྲོལ་མ་ལགས་རྣམ་གསུམ་གྱིས་སློབ་ཕྲུག་གྲངས་ ༣༨ ཙམ་ལ་ཐེངས་འདིའི་ཟབ་སྦྱོང་ཚོགས་དགོས་པའི་དམིགས་ཡུལ་དང་། རྒྱུ་མཚན། གཞན་ཡང་ང་དང་དབུ་མའི་ལམ་ཞེས་པའི་བརྗོད་གཞི་སོགས་ཀྱི་སྐོར་ལ་ཟབ་འཁྲིད་གནང་ཡོད་པ་བཅས། །