༢༠༡༩ ཟླ་ ༣ ཚེས་ ༢༧ རེས་གཟའ་ཕུར་བུ།
༄༅། །ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་བྱང་ཨ་རི་བོད་ཀྱི་སྐུ་ཚབ་དོན་ཁང་དུ་རྒྱལ་སྤྱིའི་བོད་དོན་ལས་འགུལ་ཁང་གི་གོ་སྒྲིག་འོག་མཛད་སྒོ་སྟབས་བདེ་ཞིག་ཚོགས་ནས་ཚོགས་པ་དེའི་བོད་དོན་ཞུ་གཏུག་གི་ལས་འགུལ་ཐེངས་ ༡༡ ཉིན་མོ་རྒྱལ་ཁའི་ངང་མཇུག་སྒྲིལ་གནང་འདུག
སྐབས་དེར་ཨ་རིའི་གྲོས་ཚོགས་འཐུས་མི་ཁག་གཅིག་ཀྱང་ཕེབས་ནས་རྒྱབ་སྐྱོར་ཤུགས་ཆེ་གནང་བ་དང་། ཐེངས་འདིར་མཉམ་ཞུགས་གནང་མཁན་ཨ་རིའི་མངའ་སྡེ་འདྲ་མིན་ ༢༤ ནས་བོད་དོན་ལས་འགུལ་སྤེལ་མཁན་ཚོགས་པ་ཁག་ ༡༣༤ ཚོགས་མི་ཡོད་ཅིང་། ཚོགས་མི་ཕལ་མོ་ཆེ་ཨ་རིའི་མི་སེར་ཡིན་པའི་བོད་མི་ན་གཞོན་རེད་འདུག ཚོགས་བཅར་བ་རྣམས་ཀྱིས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་དང་ལྷན་གོ་བསྡུར་སྦྱང་བཤད་གནང་སྐབས། སྐུ་ཚབ་དོན་གཅོད་ཀྱིས་ཚོགས་བཅར་བ་རྣམས་ནས་བོད་དོན་ཆེད་རང་གི་དུས་ཚོད་རྩ་ཆེ་བློས་གཏོང་གནང་བར་ཐུགས་རྗེ་ཆེ་ཞུས་པ་དང་སྦྲགས། སྐུ་ཚབ་དོན་ཁང་གིས་ལས་དོན་གཙོ་ཆེ་གསུམ་ཐོག་འབད་བརྩོན་གནང་བཞིན་ཡོད་སྐོར་གསུང་འདུག
༡། ཨ་རིའི་གཞུང་མང་གཉིས་ཀྱི་རྒྱབ་སྐྱོར་ཐོབ་ཆེད་ཞུ་གཏུག་ལས་འགུལ་སྤེལ་རྒྱུ།
༢། བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་ཐོག་ནས་བོད་མིའི་སྤྱི་ཚོགས་སྲ་བརྟན་ཡོང་ཐབས།
༣། རྒྱ་རིགས་དང་འབྲེལ་ལམ་རྒྱ་སྐྱེད་ཐོག་བོད་ཀྱི་དངོས་ཡོད་གནས་སྟངས་གསལ་བཤད་གནང་རྒྱུ། བཅས་གནད་དོན་གཙོ་བོ་དེ་གསུམ་ཡིན་འདུག
དེ་ཡང་སྐུ་ཚབ་དོན་གཅོད་ཀྱིས་ཚོགས་བཅར་བ་རྣམས་ལ་བོད་དོན་གྱི་ལས་འགུལ་དེ་དུས་ཚིགས་ཁྱད་པར་ཅན་གཅིག་པུ་མིན་པར་ཉིན་ལྟར་རང་ཉིད་མི་ཚེའི་འཚོ་བའི་ནང་སྤེལ་ཐབས་གནང་གལ་ཆེ་སྐོར་སོགས་གསུང་བཤད་གནང་རྗེས་དྲི་བ་རྣམས་ལ་ལན་འདེབས་གསལ་བཤད་གནང་འདུག་པ་བཅས།
