ཕྱི་ལོ་ ༢༠༡༩ ཟླ་ ༣ ཚེས་ ༡༨ རེས་གཟའ་ཟླ་བ། 

༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།  བོད་ཀྱི་ཉེ་རབས་ལོ་རྒྱུས་ཐོག་བོད་མི་རྣམས་ཀྱིས་རྒྱ་ནག་གི་དབང་སྒྱུར་སྲིད་བྱུས་ལ་མི་འདོད་པའི་རྣམ་པ་དང་། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་འཕྱྭ་སྲུང་སྐྱོབ་ཆེད་རང་དབང་སྒེར་ལངས་བྱས་ཏེ་མི་ལོ་ ༦༠ འཁོར་བ་དང་། དུས་མཚུངས་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ ༦༠ འཁོར་བའི་ལོ་རྒྱུས་ཁག་ཐེ་ཝན་མི་མང་དང་། ལྷག་པར་རྒྱ་ནག་སྐམ་སའི་ཡུལ་མི་ཚོས་ཤེས་རྟོག་ཐུབ་སླད་འགྲེམས་སྟོན་གྱི་ལམ་ནས་བོད་དོན་ངོ་སྤྲོད་གནང་ཡོད་པ་རེད།

ཐེ་ཝན་བོད་ཀྱི་སྐུ་ཚབ་དོན་ཁང་དང་། ཐེ་སྡོད་བོད་རིགས་ཚོགས་པ་ཐུན་མོང་ཐོག་ཕྱི་ཟླ་ ༣ ཚེས་ ༣ ནས་ ༡༥ བར་ཐེ་ཝན་རང་དབང་ཐང་ཆེན་མདུན་བོད་ལུགས་ཀྱི་གུར་ནང་ ༼ བོད་རང་དབང་ཆེད་བཙན་བྱོལ་ལོ་ ༦༠ འགྲེམས་སྟོན། ༽ ཞེས་པ་ཞིག་གོ་སྒྲིག་གནང་ཡོད་པ་དང་། འགྲེམས་སྟོན་གྱི་ནང་དོན་གཙོ་བོ་བོད་ཀྱི་རྒྱལ་རབས་ལོ་རྒྱུས་དང་། བོད་ཀྱི་ཤེས་བྱའི་ཁོངས་བོད་ཀྱི་ས་ཁམས་དང་། རྒྱལ་གླུ། རྒྱལ་དར། ཕྱི་འབྲེལ་ཡིག་ཆ། བོད་དངུལ་སོགས་ངོ་སྤྲོད། དེ་བཞིན་འདས་པའི་ལོ་ངོ་ ༦༠ ནང་རྒྱ་ནག་གཞུང་གིས་བོད་མིའི་ཆོས་དང་རིག་གཞུང་རྩ་མེད་ཀྱི་སྲིད་བྱུས་དང་ལག་བསྟར། གཞིས་བཞུགས་བོད་མི་རྣམས་ཀྱིས་ཞི་བའི་ངོ་རྒོལ་རབ་དང་རིམ་པ་ཁག བཙན་བྱོལ་ནང་བོད་མིའི་ཆོས་སྒར་དང་གཞིས་སྒར་སོགས་གསར་འཛུགས་ཀྱིས་ཆོས་དང་། རིག་གཞུང་། ཤེས་ཡོན་སྲུང་སྐྱོབ་དང་གོང་འཕེལ། དེ་བཞིན་ཐེ་ཝན་བོད་ཀྱི་སྐུ་ཚབ་དོན་ཁང་བཙུགས་ནས་ལོ་ ༢༠ རིང་ཐེ་ཝན་གཞུང་མང་དང་། བོད་དོན་རྒྱབ་སྐྱོར་ཚོགས་པ། བོད་དོན་ལས་འགུལ་སོགས་ངོ་སྤྲོད་དང་འདྲ་པར་མཉམ་སྦྱར་གྱི་འགྲེམས་སྟོན་ཞིག་གོ་སྒྲིག་གནང་ཡོད་པ་རེད།

དེ་བཞིན་འདི་ལོ་བོད་མིས་རང་དབང་སྒེར་ལངས་བྱས་ཏེ་ལོ་ ༦༠ དང་། ཉེ་ཆར་ཐེ་ཝན་གོ་མིན་ཏང་ཚོགས་པའི་ཚོགས་གཙོས་རྒྱ་ནག་གཞུང་དང་ཞི་བའི་གྲོས་མཐུན་བཞག་རྒྱུའི་བསམ་འཆར་བཏོན་པ་སོགས་ཀྱིས་རྐྱེན་པས། ཐེ་ཝན་གྱི་སྤྱི་ཚོགས་ནང་བགྲོ་གླེང་ཧ་ཅང་ཤུགས་ཆེ་བྱུང་ནས་ཐེ་ཝན་གྱི་བརྙན་འཕྲིན་ཆེ་ཁག་དང་། རླུང་འཕྲིན། གསར་ཤོག དྲ་རྒྱའི་གསར་འགྱུར་སྡེ་ཁག་སོགས་ནས་དོ་སྣང་ཆེན་པོས་གཙོ་བོ་ཐེ་ཝན་དོན་གཅོད་ཟླ་བ་ཚེ་རིང་ལགས་ལ་ ༡༩༥༡ ལོར་བོད་དང་རྒྱ་ནག་དབར་གྲོས་མཐུན་དོན་ཚན་བཅུ་བདུན་ཟེར་བ་བཞག་པའི་བརྒྱུད་རིམ་དང་། གྲོས་མཐུན་བཞག་རྗེས་བོད་མིར་འཕྲད་པའི་དཀའ་སྡུག འདས་པའི་ལོ་དྲུག་ཅུའི་རིང་བོད་ཕྱི་ནང་གཉིས་ཀྱི་གནས་སྟངས་སྐོར་སོགས་ལ་བཅར་འདྲིའི་ལེ་ཚན་ཧ་ཅང་མང་པོ་གསར་འགྱུར་བརྒྱུད་ལམ་ཐོག་ཐོན་ཐུབ་ནས་བོད་དོན་ངོ་སྤྲོད་རྒྱ་ཆེན་པོ་སྤེལ་ཐུབ་ཡོད།

ཉེ་ཆར་ཐེ་ཝན་གསར་འགྱུར་བརྒྱུད་ལམ་ཐོག་བོད་དོན་ཁྱབ་བསྒྲགས་རྒྱ་ཆེ་བྱུང་སྐོར་དོན་གཅོད་ཟླ་བ་ཚེ་རིང་ལགས་ཀྱིས་གསུང་དོན། 

བཙན་བྱོལ་དུ་འབྱོར་ནས་མི་ལོ་ ༦༠ འཁོར་བའི་ཉིན་མོར་ཐེ་ཝན་གོ་མིན་ཏང་ཚོགས་པའི་ཚོགས་གཙོས་རྒྱ་ནག་གཞུང་དང་ཐེ་ཝན་དབར་ཞི་བའི་ཆིངས་ཡིག་འཇོག་དགོས་པའི་གྲོས་གླེང་རྐྱེན་པས་བོད་དོན་དོན་ཚན་བཅུ་བདུན་བཞག་པ་དང་། དེ་བཞིན་ད་ལྟའི་བོད་ཀྱི་གནས་སྟངས། བོད་མི་རྣམས་ཅིའི་ཕྱིར་བཙན་བྱོལ་དུ་ཡོང་དགོས་བྱུང་བ། བཙན་བྱོལ་ནང་ལོ་ངོ་ ༦༠ རིང་གང་བྱུང་བ་དེ་དག་གི་ཐོག་བགྲོ་གླེང་ཤུགས་ཆེ་སླེབ་བཞིན་འདུག དཔེར་ན་བོད་མི་རང་དབངགསུམ་བཅུའི་དུས་དྲན་གྱི་སྔོན་ཏེ་ཕལ་ཆེར་ཟླ་ ༢ ཚེས་༢༣།༢༤ ཉིན་བགྲོ་གླེང་ཧ་ཅང་ཤུགས་ཆེ་བྱུང་ནས་གསར་ཤོག་དང་དུས་དེབ་སོགས་ནས་དམིགས་བསལ་རྩོམ་ཡིག་འགྲི་རོགས་ཟེར་བར་ངས་རྩོམ་ཡིག་གཉིས་ཙམ་བྲིས་པ་ཡིན། དྲུང་ཆེ་བསོད་རྡོར་ལགས་ཀྱིས་རྩོམ་ཡིག་བྲིས་པ་དེ་དག་བཀོད་ནས་དྲ་རྒྱ་དང་སྤྱི་ཚོགས་དྲ་ལམ་ཐོག་ཧ་ཅང་ཤུགས་ཆེ་འགྲོ་བཞིན་འདུག 

དེ་བཞིན་ཕ་རན་སིའི་གསར་འགོད་པས་སྐད་ཆ་དྲིས་པ་དེ་དག་བཀོད་པ་དང་ཐེ་ཝན་གྱི་བརྙན་འཕྲིན་ཆེ་ཁག་གིས་བོད་དོན་སྐོར་དང་། གཙོ་ཆེ་ཆོས་བཙན་བྱོ་ནང་ལོ་ ༦༠ སྐོར་དང་ཆིངས་ཡིག་དོན་ཚན་བཅུ་བདུན་སྐོར་དོན་གཅོད་དང་དྲུང་ཆེ་གདན་འདྲེན་ཞུས་ནས་བརྙན་འཕྲིན་ནང་ཐེངས་བཞི་ཙམ་བཤད་རྒྱུ་བྱུང་ཡོད་པ་རེད། 

གཞན་ཡང་ཕྱི་རྒྱལ་གྱི་ཨེ་ཤི་ཡ་རང་དབང་རླུང་འཕྲིན་དང་དེ་མིན་གྱི་རླུང་འཕྲིན་ཁག་གི་བཅར་འདྲི་ཞུས་པ་ཉུང་མཐར་བརྒྱད་དགུ་བྱུང་སོང་། དེ་དག་ཚང་མས་བོད་དོན་སྐོར་དོ་སྣང་ཧ་ཅང་བྱས་ནས་ཆིངས་ཡིག་དོན་ཚན་བཅུ་བདུན་ཇི་ལྟར་བཞག་པ་དང་དེའི་རྗེས་གང་བྱུང་བའི་སྐོར་ཧ་ཅང་ཞིབ་ཚགས་པོ་དང་།  དེས་ཐེ་ཝན་ལ་ཤུགས་རྐྱེན་གང་ཐེབས་པ། ཐེ་ཝན་མི་མང་ནས་ཉམས་མྱོང་གང་བླང་རྒྱུ་ཡོད་པ་བཅས་ཀྱི་སྐོར་དྲི་བ་མང་ཆེ་བ་རེད་འདུག 

ཕྱོགས་མཚུངས་ཐེ་ཝན་ནང་ཐེབས་རྩ་ཚོགས་པ་དང་། རིག་གཞུང་སྡེ་ཚན་སོགས་ཀྱི་ནང་གདན་འདྲེན་ཞུས་ནས་བོད་དོན་སྐོར་ངོ་སྤྲོད་ཞུ་རྒྱུའི་གོ་སྐབས་ཐེངས་གསུམ་བྱུང་སོང་། དེ་དག་ཚང་མ་གསུམ་བཅུ་དུས་དྲན་གཡས་གཡོན་ལ་ཆགས་ཡོད། གཞན་ཡང་ཐེ་ཝན་ནང་ཆོས་ཀྱི་རང་དབང་སྐོར་ཨ་རི་དང་ཐེ་ཝན་མཉམ་སྦྲེལ་ཐོག་ནས་ཚོགས་འདུ་ཚོགས་པ་རེད། དེར་དོན་གཅོད་གདན་འདྲེན་ཞུས་སོང་། ཚོགས་འདུའི་མཛད་སྒོར་ཨ་རིའི་སྲིད་འཛིན་གྱི་སྐུ་ཚབ་ཀྱིས་བོད་དོན་སོགས་ངོ་སྤྲོད་གནང་དུས་ཏཱ་ལའི་བླ་མ་དང་བོད་མིའི་སྒྲིག་འཛུགས་ཀྱི་སྐུ་ཚབ་ཟླ་བ་ཚེ་རིང་འདིར་ཡོད་ཅེས་མང་ཚོགས་ལ་བཀྲ་ཤིས་བདེ་ལེགས་ཞུས་པ་དང་བོད་ཀྱི་གནས་ཚུལ་ངོ་སྤྲོད་གནང་སོང་། 

དེ་བཞིན་ཚོགས་འདུའི་ནང་བོད་དོན་རྒྱབ་སྐྱོར་ཚོགས་པ་གསུང་བཤད་གནང་མཁན་ཁོངས་འདུག སྐབས་དེར་ཕྲན་ལ་བོད་དོན་སྐོར་གཏམ་བཤད་ཞུ་རྒྱུའི་གོ་སྐབས་ཡག་པོ་ཐོབ་སོང་བ་མ་ཟད། ཞོགས་ཇ་དང་ལྷན་ཨ་རིའི་སྲིད་འཛིན་གྱི་སྐུ་ཚབ་དང་ལྷན་ཆུ་ཚོད་ ༡ ལྷག་ཙམ་སྐད་ཆ་བཤད་རྒྱུའི་གོ་སྐབས་བྱུང་། སྐབས་དེར་བོད་ནང་གི་གནས་སྟངས་དང་ཆོས་དད་རང་དབང་། བོད་ཀྱི་རིག་གཞུང་དང་སྐད་ཡིག་བེད་སྤྱོད་གཏོང་བཅུག་གི་མེད་པ། བཙན་བྱོལ་ནང་དཀའ་ངལ་གང་ཡོད་པ། བོད་ནང་གི་གནས་སྟངས་ཐོག་ང་ཚོར་བསམ་ཚུལ་གང་ཡོད་པ། ཨ་རིར་རེ་བ་གང་ཡོད་པ་སོགས་ཀྱི་སྐོར་ཞིབ་ཚགས་པོ་འགྲེལ་བརྗོད་བྱེད་རྒྱུའི་གོ་སྐབས་བྱུང་། 

རྒྱལ་སྤྱི་ཡིན་ན་རེད། ཐེ་ཝན་ཡིན་ནའང་རེད། བཙན་བྱོལ་ནང་ལོ་ངོ་ ༦༠ འགོར་བ་རེད་དེ་བོད་དོན་ཐོག་དོ་སྣང་ཤུགས་ཆེ་རུ་འགྲོ་གི་ཡོད་པ་དང་། རྒྱལ་སྤྱིའི་འགྱུར་འགྲོས་དང་བསྟུན་ནས་བོད་དོན་ཐོག་སྔར་ལྷག་ལས་འགུལ་སྤེལ་དགོས་པའི་དུས་ཚོད་སླེབ་མེད་དམ་སྙམ་པའི་ཚོར་བ་ཤུགས་ཆེན་པོ་བྱུང་། ཞེས་ཞུ་རྒྱུ་ཡིན།