ཕྱི་ལོ་ ༢༠༡༩ ཟླ་ ༣ ཚེས་ ༡༠ རེས་གཟའ་ཉི་མ།
༄༅། །ཕྱི་ལོ་ ༢༠༡༩ ཟླ་ ༣ ཚེས་ ༡༠ ཉིན་བཞུགས་སྒར་རྡ་རམ་ས་ལའི་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་བོད་མིའི་གསུམ་བཅུའི་དུས་དྲན་ཐེངས་ ༦༠ མཛད་སྒོའི་སྐུ་མགྲོན་གཙོ་བོ་དེ་སྔ་གླིང་ཆེན་ཨ་ཕི་རི་ཀའི་བྷོཌ་སྭ་ནའི་སྲིད་འཛི་ཟུར་པ་སྐུ་ཞབས་ཨི་ཡན་ཀ་མ་མཆོག་གིས་གསུང་བཤད་གནང་དོན། དེ་རིང་བོད་མིའི་གསུམ་བཅུའི་དུས་དྲན་ཐེངས་ ༦༠ མཛད་སྒོའི་སྐུ་མགྲོན་གཙོ་བོར་མགྲོན་འབོད་གནང་བར་ང་ལ་ཆེ་མཐོང་ཧ་ཅང་ཐོབ་པ་བྱུང་། ངའི་ལུང་པའི་ནང་གི་མི་མང་ཕོ་མོ་མང་པོ་ཞིག་གིས་དེ་རིང་མཛད་སྒོ་འདི་བརྒྱུད་ཁྱེད་བོད་མི་རྣམས་ལ་འཚམས་འདྲི་གནང་སོང་། ཁ་སང་དགོང་དྲོ་བོད་ཀྱི་ཟློས་གར་ཚོགས་པའི་རིག་གཞུང་གི་གཞས་སྣ་འཁྲབ་སྟོན་གནང་བ་མཐོང་བྱུང་།
དེ་རིང་འདིར་ཡང་བོད་ཀྱི་རྒྱལ་དར་མང་པོ་མཇལ་རྒྱུ་འདུག ཕ་གེར་བོད་མི་གཞོན་སྐྱེས་གཉིས་ཀྱི་གདོང་པར་བོད་ཀྱི་རྒྱལ་དར་གྱི་རི་མོ་བྲིས་འདུག གཏམ་བཤད་ཚར་རྗེས་ངས་ཁོང་གཉིས་དང་ལྷན་པར་བརྒྱབ་ནས་རྒྱ་ནག་གཞུང་ཚབ་ཁང་ལ་གཏོང་རྒྱུ་ཡིན། ཕྱི་ལོ་ ༡༩༥༩ ལོར་དེ་རིང་གི་ཉིན་མོར་བོད་མི་སྟོང་ཕྲག་མང་པོས་སྤྱི་ནོར་༸གོང་ས་ཏཱ་ལའི་བླ་མ་མཆོག་གི་༸སྐུ་ཕྱྭའི་ཉེན་སྲུང་ཆེད་ངོ་རྒོལ་སྐད་འབོད་བྱས་ཡོད། བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དྲག་གནོན་སྲིད་བྱུས་ཇེ་སྡུག་ཏུ་འགྲོ་བཞིན་པའི་གནས་སྟངས་ལ་གདོང་ལེན་ཆེད་ངོ་རྒོལ་རྔམ་སྟོན་བྱས་ཡོད། འོན་ཀྱང་རྒྱ་ནག་བཅིངས་བཀྲོལ་དམག་གིས་མཚོན་ཆ་མ་ཐོགས་པའི་བོད་མིའི་ཐོག་དྲག་གནོན་ཚབས་ཆེ་བྱས་མཐར་༸གོང་ས་ཏཱ་ལའི་བླ་མ་མཆོག་གིས་གཙོས་བོད་མི་ཁྲི་བརྒྱད་ལྷག་རྒྱ་གར་དུ་བྲོས་བྱོལ་ལ་ཕེབས་དགོས་བྱུང་བ་རེད། དེར་བརྟེན་ངས་དེ་རིང་གོ་སྐབས་འདི་བརྒྱུད་རྒྱ་གར་གྱི་སྲིད་གཞུང་རིམ་པས་བོད་མི་བཙན་བྱོལ་བ་རྣམས་ལ་ད་བར་རྒྱབ་སྐྱོར་གནང་བར་ཡི་རང་བསྔགས་བརྗོད་ཞུ་རྒྱུ་ཡིན།
ང་རང་གིས་གཙོས་འདིར་དབུ་ཁྲིད་རྣམ་པས་རྒྱལ་སྤྱིའི་སྤྱི་ཚོགས་མཚོན་བཞིན་ཡོད། ང་ཚོ་འདིར་ཡོང་བ་འདིས་རྒྱལ་སྤྱིའི་སྤྱི་ཚོགས་ཀྱིས་བོད་མིའི་དཀའ་སྡུག་ནམ་ཡང་རྗེད་ཐབས་མེད་པའི་བརྡ་ལན་ཞིག་མཚོན་ཐུབ། བཙན་བྱོལ་བོད་མིའི་སྒྲིག་འཛུགས་ཀྱིས་༸གོང་ས་ཏཱ་ལའི་བླ་མ་མཆོག་གིས་ལམ་སྟོན་མཛད་པ་ལྟར་འཚེ་མེད་ཞི་བའི་ལམ་ནས་གཉིས་སྨན་དབུ་མའི་ལམ་གྱི་སྲིད་བྱུས་འོག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་འོག་རང་སྐྱོང་གི་གནས་བབ་ཚད་ལྡན་ཞིག་རྩོད་བཞིན་ཡོད། བོད་མི་ཚོས་མའི་ཙེ་ཏུང་དུས་སྐབས་དང་མའོ་ཙེ་ཏུང་རྗེས་ཀྱི་དུས་སྐབས་སུའང་དཀའ་སྡུག་ཧ་ཅང་མྱངས་ཡོད་བཞིན་དུ་བོད་རྒྱ་མི་རིགས་གཉིས་སྨན་གྱི་ཐབས་ལམ་བདམས་པ་དེ་ནི་ངོ་མཚར་ལྡན་པ་ཞིག་རེད།
བོད་མཐོ་སྒང་གི་ཁོར་ཡུག་ལ་མཚོན་ན་ཉེ་ལམ་ཁོར་ཡུག་ཚན་རིག་པ་ཚོས་བོད་མཐོ་སྒང་གི་ཁོར་ཡུག་དེ་བཞིན་ཧ་ཅང་གལ་འགངས་ཆེན་པོ་ཡིན་པ་བརྗོད་ཡོད། འཛམ་གླིང་ལྷོ་བྱང་གི་སྣེ་གཉིས་ཕུད་འཁྱགས་རོམ་ཆེ་ཤོས་དེ་བོད་མཐོ་སྒང་སྟེང་ཡོད། ཨེ་ཤི་ཡའི་གཙང་པོ་ཆེ་ཁག་བཅུའི་འབྱུང་ཁུངས་བོད་མཐོ་སྒང་ཆགས་ཡོད། རྒྱུ་མཚན་དེ་དག་ལ་བརྟེན་ནས་བོད་ནང་ཆུ་མཛོད་ཧ་ཅང་མང་པོ་བརྒྱབ་དང་རྒྱག་བཞིན་པ་དང་། ཤིང་ནགས་ཧ་ཅད་གཅོད་བྲེག་བྱེད་བཞིན་པ་དེ་དག་ལ་བརྟེན་ནས་གོ་ལའི་གནམ་གཤིས་འགྱུར་ལྡོག་ལ་ཤུགས་རྐྱེན་ཆེན་པོ་ཐེབས་བཞིན་ཡོད་པ་རྒྱལ་སྤྱིའི་ཁོར་ཡུག་ཉམས་ཞིབ་པའི་ཁྲོད་བསམ་ཚུལ་གཅིག་མཚུངས་ཡོང་བཞིན་ཡོད། བོད་ནང་བོད་མིའི་མི་རབས་གསུམ་གྱི་རིང་རྒྱ་ནག་གིས་ཆབ་སྲིད་དམ་བསྒྲགས་འོག་གཞི་རྩའི་བོད་མིའི་སྨྲ་བརྗོད་དང་ཆོས་དད་རང་དབང་ལ་བརྩི་མེད་རྡོག་རོལ་བཏང་དང་གཏོང་བཞིན་ཡོད། བོད་ནང་གི་བོད་མི་ཚོས་༸གོང་ས་ཏཱ་ལའི་བླ་མ་མཆོག་གི་༸སྐུ་པར་ཙམ་ཡང་ཉར་བ་ཡིན་ཚེ་བཙོན་འཇུག་གི་ཉེས་ཆད་ཕོགས་ཀྱི་ཡོད། ལྷག་པར་རྒྱ་ནག་གཞུང་གིས་བོད་མིའི་ཆོས་སྡེ་ཁག་གི་དགེ་བཙུན་རྣམས་ཀྱི་ཆོས་ཕྱོགས་ཀྱི་བྱེད་སྒོར་སྟངས་འཛིན་ཤུགས་ཆེ་བྱས་པ་མ་ཟད། དགོན་པ་ནས་གྲྭ་བཙུན་མང་པོ་བཙན་དབང་འོག་ཕྱིར་འབུད་བཏང་དང་གཏོང་བཞིན་ཡོད།
ད་རང་སྔ་དྲོ་ང་རང་སྤྱི་ནོར་༸གོང་ས་ཏཱ་ལའི་བླ་མ་མཆོག་མཇལ་རྒྱུའི་སྐལ་བཟང་གོ་སྐབས་ཐོབ་བྱུང་། ཁོང་ནི་ཧ་ཅང་བྱམས་བརྩེ་ལྡན་ཞིང་གཞན་ལ་ཐུགས་བརྩེ་ཧ་ཅང་མཛད་མཁན་ཁེངས་དྲེགས་རྩ་བ་ནས་མེད་པའི་གང་ཟག་ཞིག་ཏུ་མཇལ་བྱུང་། ཁོང་གིས་དུས་རབས་འདི་ནི་དེ་སྔ་དང་མི་འདྲ་བར་དཀའ་རྙོག་རྣམས་དྲག་པོའི་ལམ་ནས་མིན་པར་འཚེ་མེད་ཞི་བའི་ལམ་ནས་སེལ་དགོས་པ་བཀའ་སློབ་སྩོལ་བཞིན་ཡོད།
རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་༸གོང་ས་ཏཱ་ལའི་བླ་མ་མཆོག་དང་བོད་མིར་འདི་ལྟ་བུའི་འཇིགས་སྣང་བྱེད་དགོས་པ་གང་ཡིན། ༸གོང་ས་ཏཱ་ལའི་བླ་མ་མཆོག་ལ་མེ་མདའ་དང་རྡུལ་ཕྲན་མཚོན་ཆ་མེད་ལ། ལྕགས་ཁྲབ་འཁོར་ལོ་དང་མཚོ་དམག་གི་གྲུ། དམག་གི་གནམ་གྲུའང་མེད། ཁོང་ལ་རྒྱ་ནག་གི་སྲིད་འཛིན་བྱེད་དགོས་བསམ་པའང་མེད། ༸གོང་ས་ཏའ་ལའི་བླ་མ་མཆོག་ལ་ཡོད་པ་ནི་བྱམས་པ་དང་བརྩེ་བ་རེད། དེ་ལ་རྒྱ་ནག་གིས་ཞེད་ཀྱི་ཡོད་པ་རེད།
ཕྱི་ལོ་ ༢༠༡༧ ལོར་ང་རང་བྷོཌ་སྭ་ནའི་སྲིད་འཛིན་ཡིན་སྐབས་རྒྱ་ནག་གི་གནོན་ཤུགས་ལ་མ་འཛེམས་པར་༸གོང་ས་ཏཱ་ལའི་བླ་མ་མཆོག་གདན་ཞུའི་མགྲོན་བརྡ་ཕུལ་བ་ཡིན། སྐབས་དེར་རྒྱལ་སའི་ནང་དུ་སེམས་དང་སྲོག་གི་བགྲོ་གླེང་ལྷན་ཚོགས་ཤིག་ཚོགས་སྐབས་རེད། ལྷན་ཚོགས་དེ་ནི་ཨ་ཕི་རི་ཀའི་ཡུལ་གྱི་སྲོལ་རྒྱུན་གྱི་བསམ་བློ་གཏོང་སྟངས་ Ubuntu ཞེས་པ་དེར་གཞི་བཅོལ་ནས་ཚོགས་ཡོད། དེའི་གོ་དོན་ནི་གཞན་ལ་བརྟེན་ནས་རང་ཉིད་འཚོ་ཐུབ་པའི་དོན་རེད། ངའི་ལུང་པའི་སྲིད་གཞུང་ལ་མཚོན་ན་རྒྱ་ནག་གཞུང་གི་གནོན་ཤུགས་འོག་འགྲོ་བཞིན་པ་མཐོང་སྐབས་ང་རང་ཧ་ཅང་ངོ་ཚ་པོ་འདུག ངའི་ལུང་པའི་སྲིད་གཞུང་ནས་ཀྱང་རྒྱ་ནག་གཞུང་དང་མཚུངས་པར་༸གོང་ས་ཏཱ་ལའི་བླ་མ་མཆོག་མཇལ་བཅར་ཞུ་མཁན་རྣམས་ལ་དངོས་ཤུགས་བརྒྱུད་ནས་གནོན་ཤུགས་སྤྲོད་ཐབས་བྱེད་བཞིན་ཡོད། ཐེངས་འདིར་ང་རང་རྡ་རམ་ས་ལར་༸གོང་ས་ཏཱ་ལའི་བླ་མ་མཆོག་མཇལ་བཅར་ཞུ་རྒྱུར་འགོག་རྐྱེན་བཟོ་ཐབས་བྱས་བྱུང་།
༸གོང་ས་ཏཱ་ལའི་བླ་མ་མཆོག་གི་མཚན་སྙན་ནི་འཛམ་གླིང་ནང་ལོ་ལྟར་གྲགས་ཆེ་བའི་མི་སྣའི་མཚན་གཞུང་ནང་ལོ་བསྟུད་མར་འཐོན་བཞིན་ཡོད། དེར་བརྟེན་ཁོང་༸སྐུ་དངོས་ཕེབས་རྒྱུར་འགོག་རྐྱེན་བཟོས་པ་ཡིན་ན་ཁོང་གི་ཆེ་མཐོང་ཉམ་དམས་སུ་འགྲོ་རྒྱུའི་རེ་བ་དེ་ནི་རྒྱུ་མཚན་ཁུངས་ལུང་མེད་པ་ཞིག་རེད། ཅེས་སོགས་ཀྱི་གསུང་བཤད་གནང་།
