ཕྱི་ལོ་ ༢༠༡༩ ཟླ་ ༣ ཚེས་ ༡༧ རེས་གཟའ་ཉི་མ།
༄༅། །ཕྱི་ལོ་ ༢༠༡༩ ཟླ་ ༣ ཚེས་ ༤ ཉིན་ཨ་རིའི་ཨ་ཡོ་ཝ་ Iowa མངའ་སྡེའི་ཡེ་ཤུའི་མཆོད་དཔོན་སྐུ་ཞབས་ཐོ་མ་སི་ཨར་དིན་ཀུ་ལ་ Bishop Thomas R. Zinkula མཆོག་བཞུགས་སྒར་དུ་བཅར་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཞི་བདེ་དང་རང་དབང་གི་གཟེངས་རྟགས་ Pacem in Terris Peace and Freedom Award ཞེས་པ་འབུལ་ལམ་ཞུས་འདུག གནས་ཚུལ་དེ་ཡེ་ཤུའུ་ཆོས་ལུགས་ཀྱི་བྱེད་སྒོ་དང་འབྲེལ་བའི་གནས་ཚུལ་དྲིལ་བསྒྲགས་གནང་མཁན་ཁག་དྲ་ CRUX ཡིས་ཕྱི་ལོ་ ༢༠༡༩ ཟླ་ ༣ ཚེས་ ༡༦ ཉིན་འདོན་སྤེལ་གནང་འདུག སྤྱིར་གཟེངས་རྟགས་དེ་བཞིན་དེ་སྔ་འཛམ་གླིང་ནང་ཞི་བདེ་གོང་སྤེལ་ལས་འགུལ་ཐོག་གཟེངས་སུ་འཐོན་པའི་ཕྱག་ལས་གནང་མཁན་མི་རིགས་ནག་པོའི་རང་དབང་དང་འདྲ་མཉམ་འཐབ་རྩོད་པ་སྐུ་ཞབས་མར་ཊིན་ལུ་ཐར་ཀིངྒ་ Rev. Martin Luther King Jr དམ་པ་མཆོག་དང་། ལྷོ་ཨ་ཕི་རི་ཀའི་ཡེ་ཤུའི་བླ་ཆེན་ཌེ་སི་མོན་ཊུ་ཊུ་ Archbishop Desmond Tutu མཆོག དེ་བཞིན་ལྕམ་སྐུ་དོ་རོ་ཐི་ཌེ་ Dorothy Day མཆོག་བཅས་ལ་ཕུལ་ཟིན་ཡང་། ད་བར་གཟེངས་རྟགས་བཞེས་མཁན་རྣམས་གཟེངས་རྟགས་འབུལ་སར་བཅར་ཡོད་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བར་ལམ་ནས་བཟུང་དུས་ཡུན་རིང་པོ་བགོར་རྒྱུའི་འགྲུལ་བཞུད་རིགས་མཛད་ཀྱི་མེད་སྟབས། ཚོགས་པའི་སྐུ་ཚབ་ཞབས་ཀེན་ཕེ་རི་སི་མཆོག་གིས་གསུང་དོན། “འཛམ་གླིང་དབུ་ཁྲིད་རྣམ་པས་གཟེངས་རྟགས་འབུལ་བཞེས་མཛད་སྒོར་དངོས་སུ་བཅར་ཐུབ་པ་ཡིན་ཚེ་དགེ་ཚན་ཧ་ཅང་ཆེན་པོ་འདུག གང་ཡིན་བརྗོད་ན། ས་གནས་མང་ཚོགས་རྣམས་ཀྱིས་དབུ་ཁྲིད་མཆོག་གི་དྲུང་ནས་བཀའ་སློབ་ལམ་སྟོན་ཞུ་རྒྱུའི་གོ་སྐབས་ཐོབ་རྒྱུ་རེད། འོན་ཀྱང་༸གོང་ས་ཏཱ་ལའི་བླ་མ་མཆོག་འགྲུལ་བཞུད་རིང་པོ་མ་མཛད་པར་བརྟེན། ང་ཚོ་རྒྱ་གར་དུ་ཡོང་ནས་ཁོང་ལ་ཆེ་མཐོང་ཞུ་རྒྱུའི་གོ་སྐབས་འདི་བླངས་པ་ཡིན། “ཞེས་གསུངས།
རྡ་ས་བཞུགས་སྒར་༸རྒྱལ་བའི་ཕོ་བྲང་དུ་དངོས་སུ་ཞི་བདེའི་གཟེངས་རྟགས་འབུལ་ཆེད་ཆེད་བཅར་ཞུ་མཁན་ཡེ་ཤུའི་མཆོད་དཔོན་སྐུ་ཞབས་ཐོ་མ་སི་ཨར་དིན་ཀུ་ལ་ Bishop Thomas R. Zinkula མཆོག་གིས་གསུང་དོན། “༸གོང་ས་ཏཱ་ལའི་བླ་མ་མཆོག་གིས་སྐུ་ཚེ་ཧྲིལ་པོའི་རིང་མིའི་བསམ་བློ་དང་འཛམ་གླིང་ཁྱོན་དུ་ཞི་བདེ་སྐྲུན་ཐབས་མཛད་པའི་རླབས་ཆེན་གྱི་མཛད་བཟང་ལ་ཐེངས་འདིར་རང་དབང་དང་ཞི་བདེའི་གཟེངས་རྟགས་བརྒྱུད་ཆེ་མཐོང་ཞུ་སླད། ངས་འཛམ་གླིང་གི་ལམ་ཕྱེད་ཙམ་འགྲུལ་བཞུད་བྱེད་དགོས་ཀྱང་སེམས་ནང་སྤྲོ་སྣང་དང་བཅས་བྱས་པ་ཡིན།”ཞེས་གསུངས།
དེ་ཡང་ཕྱི་ཟླ་ ༣ ཚེས་ ༤ ཉིན་ཡེ་ཤུའི་མཆོད་དཔོན་སྐུ་ཞབས་ཐོ་མ་སི་ཨར་དིན་ཀུ་ལ་ Bishop Thomas R. Zinkula མཆོག་བཞུགས་སྒར་དུ་བཅར་ནས་༸གོང་ས་༸སྐྱབས་མགོན་ཆེན་པོ་མཆོག་ལ་གཟེངས་རྟགས་འབུལ་བཞེས་མཛད་སྐབས། མཆོད་དཔོན་མཆོག་གིས་གཟེངས་རྟགས་ཀྱི་རྒྱབ་ལྗོངས་ལོ་རྒྱུས་དང་ཚོགས་པ་ཁག་གཅིག་ཐུན་མོང་གིས་གཟེངས་རྟགས་ཕུལ་བ་ཡིན་སྟབས་ཚོགས་མི་རྣམས་ངོ་སྤྲོད་ཞུས་འདུག སྐབས་དེར་མགོན་པོ་གང་ཉིད་ཀྱིས་ཐུགས་དགྱེས་ཚོར་ངང་མཐོང་གྲོལ་འཛུམ་ཞལ་དང་བཅས་མཆོད་དཔོན་མཆོག་ལ་ཕྱག་གཏོང་གནང་མཛད་དེ་སྐར་མ་བཅུ་ཙམ་རིང་དབུ་ཁྲིད་རྣམ་གཉིས་འཚམས་འདྲི་མཛད། དེ་ཡང་མཆོད་དཔོན་མཆོག་གིས་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ལ་ཞུ་དོན། “ཚོགས་པ་ཐུན་མོང་ནས་སྐུ་ཉིད་མཆོག་གི་ཐུགས་ཀྱི་འཆར་སྣང་དང་འགྲོ་བ་མིའི་ཐོབ་ཐང་སྲུང་སྐྱོབ་ཐད་རླབས་ཆེན་དགོངས་བཞེས་རྒྱུན་སྐྱོང་མཛད་པའི་ཆོད་སེམས། དེ་བཞིན་རྩོད་རྙོག་རྣམས་འཚེ་མེད་ཞི་བའི་ལམ་ནས་སེལ་ཏེ་འཛམ་གླིང་ཞི་བདེ་གོང་འཕེལ་གྱི་མཛད་བཟང་ལ་ངོས་འཛིན་ཞུ་བཞིན་ཡོད། སྐུ་ཉིད་མཆོག་གིས་ཞལ་ནས་ཞི་བདེ་གསུང་པ་ལྟར་ཕྱག་བསྟར་ཡང་མཛད་བཞིན་ཡོད་སྟབས། ཞེ་ཐག་པ་ནས་ཞི་བདེ་གོང་སྤེལ་མཛད་མཁན་ཞིག་ཡིན་པ་གསལ་འདོན་མཛད་ཡོད། སྐུ་ཉིད་མཆོག་གིས་བོད་མིའི་རིག་གཞུང་གི་ཆེ་མཐོང་མི་ཉམས་རྒྱུན་འཛིན་དང་གོང་འཕེལ་མཛད་བཞིན་པ་འདིས་གཉའ་གནོན་འོག་ཚུད་པའི་མི་མང་རྣམས་ལའང་ཞི་བདེའི་ལམ་ནས་དྲང་བདེན་ལ་རྒྱལ་ཁ་ཐོབ་རྒྱུ་ཡིན་པའི་རེ་བ་གསར་པ་ཞིག་སྦྱིན་བཞིན་ཡོད། སྐུ་ཉིད་མཆོག་གི་ཉམས་ལེན་དེས་ཡེ་ཤུའི་བླ་ཆེན་པོབ་ཁྲི་ཐོག་ ༢༣ མཆོག་གི་བསླབ་བྱ་མཚོན་པར་བྱེད། “ཅེས་གསུངས། ཐེངས་འདིར་གཟེངས་རྟགས་འབུལ་མཁན་ཚོགས་མིའི་ཁོངས་ཡེ་ཤུ་མཙ་མ་ཟད། ཇིའུ་མི་རིགས་དང་ཁ་ཆེ་ཡོད་སྐོར་ལྷ་སྙན་སྒྲོན་འབུལ་ཞུ་སྐབས་མགོན་པོ་མཆོག་ཐུགས་དགྱེས་ཚོར་མཛད་པ་དང་སྦྲགས། ཐེངས་འདིར་གཟེངས་རྟགས་དེ་ལྟར་ཕུལ་བར་མགོན་པོ་མཆོག་ལ་ཆེ་མཐོང་ཐོབ་པ་ཞིག་བྱུང་སྐོར་དང་། སྤྱིར་འཛམ་གླིང་ནང་ཆོས་ལུགས་འདྲ་མིན་ཡོད་ཀྱང་ཆོས་ལུགས་ཚང་མས་བྱམས་བརྩེའི་བསླབ་བྱ་གསུང་བཞིན་ཡོད་པ་གཅིག་མཚུངས་ཡིན་སྐོར་བཀའ་ལན་སྩལ་དོན། “ཡེ་ཤུའི་ཆོས་ལུགས་ནང་གསུང་པ་ལྟར་ན། འགྲོ་བ་མི་ཚང་མ་ཐམས་ཅད་དཀོན་མཆོག་གིས་བཀོད་པ་རེད། དེར་བརྟེན་ང་ཚོ་ཚང་མ་དོན་དངོས་སྤུན་མཆེད་ཕོ་མོ་ཡིན། ང་ཚོ་ཚང་མ་གཞི་རྩའི་འགྲོ་བ་མི་ཡིན་པ་གཅིག་གྱུར་ཡིན་སྟབས་ཕན་ཚུན་གུས་བརྩི་དང་བརྩེ་བ་བྱེད་དགོས། དེང་སྐབས་འཛམ་གླིང་ནང་བྱམས་བརྩེ་དང་ཞི་བདེ་སྔར་བས་ཤུགས་ཆེ་བ་དགོས་མཁོ་ཆགས་ཡོད་སྐོར་བཀའ་ལན་སྩལ།
གཟེངས་རྟགས་མཛད་སྒོ་སྟབས་བདེ་ཞིག་འདི་ལོའི་ཕྱི་ཟླ་ ༤ ཚེས་ ༩ ཉིན་ཨ་ཡོ་ཝ་མངའ་སྡེའི་རྒྱལ་ས་ཌེ་ཝན་པོཌ་Davenport ནང་རྟེན་གཞི་བྱས་པའི་སན་ཨེམ་བྷོ་རོ་སི་མཐོ་སློབ་ཁང་St. Ambrose University དུ་སྲུང་བརྩི་ཞུ་རྒྱུ་ཡིན་འདུག
