ཕྱི་ལོ་ ༢༠༡༩ ཟླ་ ༣ ཚེས་ ༢༠ རེས་གཟའ་ལྷག་པ།
༄༅། །དགུང་ལོ་ ༩༤ ལ་སོན་པའི་ཨ་རིའི་སྲིད་འཛིན་ཟུར་པ་སྐུ་ཞབས་ཇོར་ཇི། ཨེཇ། ཌབ་ལུ། བྷུཤ་ George H.W. Bush མཆོག་ཕྱི་ལོ་ ༢༠༡༨ ཟླ་ ༡༡ ཚེས་ ༣༠ ཉིན་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་བྱུང་འདུག་པ་དང་། དམ་པ་ཁོང་ནི་ཡབ་པེ་རེས་ཀོཊ། ཤེལ་ཌོན། བྷུཤ་ Prescott Sheldon Bushདང་ཡུམ་ཌོ་རོ་ཐི། ཝོ་ཀར། བྷུཤ་ Dorothy Walker Bush གཉིས་ཀྱི་སྲས་སུ་ཕྱི་ལོ་ ༡༩༢༤ ཟླ་ ༦ ཚེས་ ༡༢ ཉིན་ཨ་རི་ས་ཁུལ་མྰ་སེ་ཆུ་སིཌ་ Massachusetts མངའ་སྡེའི་ས་གནས་མིལ་ཊོན་ Milton དུ་སྐུ་འཁྲུངས་ཤིང་། ཨ་རིའི་སྲིད་འཛིན་ཐེངས་ ༤༡ པ་དེ་ཡིན་པ་མ་ཟད། སྐུ་ཚེ་ཧྲིལ་པོར་ཨ་རིིའི་མི་མང་གི་བདེ་དོན་ཆེད་ཞབས་ཞུ་གནང་མཁན་ཞིག་ཆགས་འདུག
དམ་པ་དེ་ཉིད་དགུང་ལོ་ ༡༨ ཐོག་ཕི་ལིཔ་སི་ཤེས་ཡོན་ལྟེ་གནས་ཁང་ནས་ Phillips Academy ཐོན་མཚམས་ཨ་རིིའི་མཚོ་དམག་ཁོངས་སུ་དང་བླངས་འཛུལ་ཞུགས་ཀྱིས་མཚོ་དམག་གི་གནམ་གྲུའི་ཁ་ལོ་པ་ Naval Aviator གཞོན་ཤོས་གྲས་ཀྱི་གཅིག་ཆགས་པ་དང། ཁོང་གིས་ཕྱི་ལོ་ ༡༩༤༥ ཟླ་ ༩ པ་བར་མཚོ་དམག་ནང་ཞབས་ཞུ་བསྒྲུབས་འདུག དེའི་རྗེས་སུ་དམ་པ་ཁོང་ཨ་རི་ཡེལ་གཙུག་ལག་སློབ་ཆེན་དུ་འཛུལ་ཞུགས་ཀྱིས་ཕྱི་ལོ་ ༡༩༤༨ ནང་སློབ་མཐར་ཕྱིན་པ་དང་སྣུམ་གྱི་ཚོང་ལས་གཉེར་འགོ་ཚུགས་ཤིང། ཕྱི་ལོ་ ༡༩༦༤ ལོར་དགུང་ལོ་ ༤༠ སོན་སྐབས་ཨ་རིའི་ཕྱུག་བདག་གྲས་སུ་ཚུད་ནས་སྒེར་གྱི་སྣུམ་ཚོང་ཡང་འགོ་འཛུགས་གནང་། ཕྱི་ལོ་ ༡༩༦༦ ལོར་ཨ་རི་ཊྲེ་སེས་ Texas མངའ་སྡེ་ནས་གྲོས་ཚོགས་འོག་མའི་འཐུས་མིར་འོས་འདེམས་བྱུང་བ་ནས་བཟུང་མུ་མཐུད་གྲོས་ཚོགས་འཐུས་མིར་འོས་འདེམས་བྱུང་ཡོད། ཕྱི་ལོ་ ༡༩༧༡ ལོར་མཉམ་འབྲེལ་རྒྱལ་ཚོགས་ནང་ཨ་རིའི་གཞུང་ཚབ་ US Ambassador to the United Nations ཏུ་བསྐོ་གཞག་གནང་ཡོད་པ་དང་། ཕྱི་ལོ་ ༡༩༧༤ ལོར་རྒྱ་ནག་ནང་ཨ་རིའི་འབྲེལ་མཐུད་ཁང་གི་སྤྱི༌ཁྱབ༌ Chief of the U.S. Liaison Office in China བསྐོ་གཞག་གནང་བ་དང་། ཕྱི་ལོ་ ༡༩༧༦ ལོར་ཨ་རིའི་དབུས་གསང་བའི་ལས་ཁུངས་ཀྱི་ Director of Central Intelligence ངེས་སྟོན་པར་བསྐོ་གཞག་གནང་འདུག ཕྱི་ལོ་ ༡༩༨༡ ནས་ ༡༩༨༩ བར་ལོ་བརྒྱད་ཀྱི་རིང་ཨ་རིའི་སྲིད་འཛིན་གཞོན་པ་ ༤༣ པ་གནང་བ་དང་། ཕྱི་ལོ་ ༡༩༨༩ ནས་ ༡༩༩༣ བར་ཨ་རིའི་སྲིད་འཛིན་ ༤༡ པར་འོས་འདེམས་བྱུང་བ་བཞིན་སྲིད་འཛིན་ཀྱི་ཕྱག་ལས་གནང་། དམ་པ་དེ་ཉིད་ཀྱིས་ཨ་རིའི་སྲིད་འཛིན་གནང་སྐབས་འཛམ་གླིང་ནང་དམག་འཁྲུག་ཡོད་པའི་རྒྱལ་ཁབ་དབར་ཞི་འཇགས་བཟོ་རྒྱུར་སྐུ་ལས་ཧ་ཅང་ཆེན་པོ་བསྐྱོན་ཡོད་པ། དཔེར་ན། ཤར་འཇར་མ་ནི་དང་ནུབ་འཇར་མ་ནི་དབར་གཅིག་སྒྲིལ་ཡོང་བ་དང་། དེ་བཞིན་ཨུ་རུ་སུ་སྤྱི་མཐུན་རྒྱལ་ཁབ་ USSR Soviet Union ཁ་འཐོར་སྐབས་རྒྱལ་ཕྲན་ནང་ཁུལ་དུ་འཁོན་འཛིན་གྱིས་དམག་འཁྲུག་མ་ཡོང་བ་བཅས་ཀྱི་ཐོག་སྐུ་ལས་ཆེན་པོ་བསྐྱོན་ཡོད་པ་རེད། དམ་པ་དེ་ཉིད་སྲིད་འཛིན་གྱི་ལས་གནས་ནས་འཁྱུར་རྗེས་སུ་མུ་མཐུད་སྤྱི་ཚོགས་ཞབས་ཞུའི་ལས་དོན་རིགས་གནང་ནས་བཞུགས་ཡོད་པ་དང། ལྷག་པར་ཕྱི་ལོ་ ༡༩༩༠ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཀྱིས་ཨ་རིའི་སྲིད་འཛིན་གྱི་ལོ་རྒྱུས་ནང་༸མགོན་པོ་མཆོག་དང་མཇལ་འཕྲད་གནང་མཁན་གྱི་སྲིད་འཛིན་དང་པོ་དེ་ཆགས་ཡོད་པས། དམ་པ་ཁོང་ཚེ་ལས་འདས་པའི་གནས་ཚུལ་གསན་རྗེས་སྤྱི་ནོར་༸གོང་ས་༸སྐྱབས་མགོན་ཆེ་པོ་མཆོག་གིས་ཁོང་གི་ནང་མི་ཉེ་འབྲེལ་རྣམས་ལ་གནང་བའི་ཐུགས་གསོའི་གསུང་འཕྲིན་ནང་དམ་པ་ཁོང་དང་མཇལ་འཕྲད་སྐབས་ཁོང་གིས་བོད་མི་དང་བོད་ནང་གི་གནས་སྟངས་ལ་དོན་དམ་གྱིས་ཐུགས་འཁུར་ཆེ་བཞེས་གནང་བར་བརྟེན་ངོས་ལ་སེམས་འགུལ་ཤུགས་ཆེ་ཐེབས་བྱུང་། ཞེས་བཀོད་གནང་ཡོད་པ་རེད། དེ་ཡང་སྤྱི་ལྷན་གྱི་ཐུགས་གསོའི་ཡིག་ཆུང་ནང་དུ་དམ་པ་དེ་ཉིད་ཀྱིས་རྒྱ་ནག་གཞུང་དང་༸གོང་ས་མཆོག་གི་སྐུ་ཚབ་དབར་གྲོས་མོལ་སླར་གསོའི་ཐོག་མུ་མཐུད་རྒྱ་གཞུང་ལ་རེ་སྐུལ་ཤུགས་ཆེ་གནང་མྱོང་སྐོར་བཀོད་ཡོད།
མདོ་དོན་དམ་པ་དེ་ཉིད་ཀྱིས་བོད་ཀྱི་འཐབ་རྩོད་ཐོག་རྒྱབ་སྐྱོར་ཤུགས་ཆེར་གནང་ཡོད་པ་དང་། ཨ་རི་སྲིད་འཛིན་གྱི་དུས་ཡུན་གཙང་རྗེས་སུའང་བོད་ནང་གི་འགྲོ་བ་མིའི་ཐོབ་ཐང་ཐོག་རྒྱ་གཞུང་ལ་འབོད་སྐུལ་ཤུགས་ཆེ་གནང་ཡོད་པ་མ་ཟད། ཁོང་གི་བུ་སྐུ་ཞབས་ཇོར་ཇི། ཌབ་ལུ། བྷུཤ་ George W. Bush མཆོག་གིས་ཀྱང་བོད་ཀྱི་གནད་དོན་ཐོག་ཐུགས་འཁུར་ཆེ་བཞེས་གནང་ཡོད་ལ། ༸གོང་ས་མཆོག་གིས་ཐུགས་མཉེས་པོ་གནང་ས་ཞིག་ཀྱང་ཡིན།
གྲོས་ཆོད།
སྐུ་གཤེགས་དམ་པ་དེ་ཉིད་ཀྱི་རྨད་བྱུང་མཛད་རྗེས་རྣམས་ལ་གུས་བཀུར་ཆེ་བསྟོད་ཀྱིས་བསྔགས་བརྗོད་ཞུ་རྒྱུ་དང་། ཁོང་ཉིད་སྐུ་ཚེ་མ་ཟིན་པ་འདིས་བོད་དོན་འཐབ་རྩོད་ལའང་གྱོང་གུད་གོད་ཆག་བྱུང་བར་བརྟེན་ཤུལ་བཞུགས་ནང་མི་ལྟོས་བཅས་རྣམས་ལ་བོད་མི་མང་སྤྱི་འཐུས་ལྷན་ཚོགས་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྙིང་དབུས་ནས་ཐུགས་གསོ་ཞུ་རྒྱུ་དང་། དམ་པ་ཁོང་གི་ཕུགས་འདུན་བཟང་པོ་རྣམས་ཡོངས་སུ་འགྲུབ་ཅིང་། བྱས་བསགས་ཉེས་ལྟུང་མཐའ་དག་བྱང་ཞིང་དག་ནས་བདེ་ནས་བདེ་བར་བགྲོད་པའི་སྨོན་ལམ་ཤུགས་དྲག་ཞུ་རྒྱུ་བཅས་ཀྱི་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༩ ཟླ་ ༣ ཚེས་ ༡༩ ལ།།
གོང་གསལ་གྲོས་ཆོད་འདི་བཞིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༧ པའི་ཐོག་སྤྱི་མོས་ཀྱིས་གཏན་འབེབས་གནང་། ཕྱི་ལོ་ ༢༠༡༩ ཟླ་ ༣ ཚེས་ ༡༩ ལ།།
