༢༠༡༩ ཟླ་ ༣ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༩ ཟླ་ ༣ ཚེས་ ༧ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་རྣམས་དང་མཇལ་འཕྲད་གནང་འདུག སྐབས་དེར་བོད་མཐོ་སྒང་གི་ཁོར་ཡུག་གནས་སྟངས་ལ་སྲིད་སྐྱོང་མཆོག་གིས་སེམས་འཚབ་ཤུགས་ཆེ་གནང་བ་དང་། བོད་མཐོ་སྒང་གི་ཁོར་ཡུག་ལ་མཚོན་ན་བོད་མི་ས་ཡ་དྲུག་ཙམ་མ་ཟད་ཁྱིམ་མཚེས་རྒྱལ་ཁབ་མང་པོ་ཞིག་གི་ཆུའི་འབྱུང་ཁུངས་དང་། འཛམ་གླིང་སྤྱིའི་ཁོར་ཡུག་ལའང་ཤུགས་རྐྱེན་ཆེན་པོ་ཐེབས་བཞིན་ཡོད་སྟབས། གོ་ལའི་ཚ་དྲོད་མྱུར་པོར་རྒྱས་བཞིན་པ་དེའི་ཤུགས་རྐྱེན་བོད་མཐོ་སྒང་ལ་ཐེབས་སླ་བ་དང་། དེ་ལ་བརྟེན་ནས་བོད་ནང་གི་སྲིད་པའི་གངས་རི་མྱུར་པོར་བྲི་བ་མ་ཟད། འཁྱགས་རོམ་མྱུར་པོར་ཞུ་བ། དེ་ལ་བརྟེན་རྒྱ་མཚོའི་མཐོ་ཚད་འཕར་བ་དང་། འཛམ་གླིང་ནང་གི་མི་འབོར་བརྒྱ་ཆ་ལྔ་བཅུ་ལྷག་མཚོ་མཐའི་ས་ཁུལ་ནང་འཚོ་སྡོད་བྱེད་བཞིན་ཡོད་པ་དེ་དག་ལའང་ཉེན་ཧ་བཟོ་བཞིན་ཡོད་པ།
རྒྱ་ནག་གཞུང་གིས་འཇིག་སླ་བའི་བོད་མཐོ་སྒང་གི་ཁོར་ཡུག་ལ་བརྩི་མེད་ཐོག་བོད་ནང་འཛུགས་སྐྲུན་ལས་གཞི་ཧ་ཅང་རྒྱ་ཆེན་པོ་སྤེལ་བཞིན་ཡོད། བོད་ནང་ཆུ་མཛོད་ཆེན་པོ་དེ་འདྲ་བརྒྱབ་པ་དེས་སྣོད་བཅུད་རྟེན་འབྲེལ་གྱི་རང་བཞིན་འབྲེལ་བ་ཉམ་དམས་སུ་གཏོང་བཞིན་པ། ལྷག་པར་རྒྱ་ནག་གིས་བོད་ས་མཐོ་བར་བརྟེན་གཙང་ཆུ་ཁག་ལ་དབང་སྒྱུར་བྱེད་ཆེད་ཆུ་མཛོད་ཆེ་ཆུང་སྣ་མང་ཆེད་མངགས་བརྒྱབ་ནས་གཤམ་འོག་ལྷོ་དང་ལྷོ་ཤར་ཨེ་ཤི་ཡའི་རྒྱལ་ཁབ་ལ་གནོན་ཤུགས་སྤྲོད་ཐབས་བྱེད་བཞིན་ཡོད་པ།
ད་ཆ་བོད་མི་ཚོར་རང་སྐྱོང་གི་གནས་བབ་ཚད་ལྡན་ཞིག་ཐོབ་པ་ཡིན་ན་བོད་མི་རྣམས་ནི་སྲོལ་རྒྱུན་ནས་ཁོར་ཡུག་དང་འགྲོགས་འདྲིས་བཟང་བར་བརྟེན་ཁོར་ཡུག་སྲུང་སྐྱོབ་བྱེད་ཐུབ་པ་དང་། གོ་ལའི་གནམ་གཤིས་འགྱུར་ལྡོག་གི་ཤུགས་རྐྱེན་དེ་བོད་མི་ཚོར་ཐད་ཀར་ཐེབས་བཞིན་ཡོད་སྟབས་རྒྱ་ནག་གཞུང་གིས་བོད་མིའི་མངོན་འདོད་ལ་བརྩི་མེད་རྡོག་རོལ་བཏང་ཀྱང་བྱས་པ་མ་ཟད། བོད་མཐོ་སྒང་གི་ས་མཐོའི་ཁེ་ཕན་སྤྱད་དེ་རྒྱལ་ཁབ་གཞན་ལ་གནོན་ཤུགས་སྤྲོད་བཞིན་པ་དེ་དག་མཚམས་འཇོག་བྱེད་དགོས་སྐོར་གསུངས།
དེ་བཞིན་སྲིད་སྐྱོང་མཆོག་གིས་རྒྱ་ནག་གཞུང་ནས་ཁོར་ཡུག་དང་ཡར་རྒྱས་ཀྱི་སྲིད་བྱུས་ཚད་ལྡན་ཞིག་བོད་ནང་ལག་བསྟར་མ་བྱས་པར་རང་བྱུང་འཐོན་སྐྱེས་ཀྱིས་ཕྱུག་པའི་བོད་མཐོ་སྒང་འདི་ཉིད་གཏེར་ཁ་སྔོག་ས་ཞིག་དང་ཆུ་མཛོད་རྒྱག་ས་ལྟ་བུར་བརྩི་ནས་འཛུགས་སྐྲུན་རྒྱ་ཆེ་བྱས་པའི་ཉེར་ལེན་ལ་བརྟེན་ནས་ཨེ་ཤི་ཡའི་གནམ་གཤིས་ལ་ཤུགས་རྐྱེན་ཐེབས་བཞིན་པ་མ་ཟད། གོ་ལ་སྤྱིའི་གནམ་གཤིས་ལའང་ཤུགས་རྐྱེན་ཡོང་ངེས་སྐོར་སོགས་གསུངས།
