ཕྱི་ལོ་ ༢༠༡༩ ཟླ་ ༣ ཚེས་ ༢༩ རེས་གཟའ་པ་སངས།

༄༅། །སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་ཕྱི་ལོ་ ༢༠༡༩ ཟླ་ ༣ ཚེས་ ༡༩ ཉིན་ནས་དབུ་འཛུགས་ཀྱིས་ཚེས་ ༢༩ ཉིན་རྒྱལ་ཁའི་ངང་ནས་གྲོལ་ཡོད་ཅིང་། ཚོགས་དུས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་མཇུག་སྡོམ་གསུང་བཤད་གནང་དོན། དཔལ་ལྡན་སྲིད་སྐྱོང་མཆོག་གིས་དབུས་དཔལ་ལྡན་བཀའ་བློན་རྣམ་པ་དང་། དཔལ་ལྡན་ཚོགས་གཞོན་མཆོག་གིས་དབུས་བཀུར་འོས་སྤྱི་འཐུས་རྣམ་པ་ལ་ཞུ་རྒྱུར། དེ་རིང་སྐབས་བཅུ་དྲུག་པའི་གྲོས་ཚོགས་ཚོགས་དུས་བདུན་པ་འདི་རྩ་བའི་སྔོན་རྩིས་ཀྱི་ཚོགས་དུས་ཆགས་ཀྱི་ཡོད་པ་རེད། ད་རེས་སྔོན་རྩིས་ཀྱི་ཚོགས་འདུས་འདིའི་ནང་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་དྲུག་ཙམ་ཞིག་བཞག་ཡོད། དེ་ཡང་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿཐོག་དགེ་རྩེ་རིན་པོ་ཆེ་འགྱུར་མེད་བསྟན་པ་རྒྱལ་མཚན་མཆོག་དང་། མདོ་སྨད་ཨ་མདོ་རྔ་པ་ནས་ཡིན་པ་རྡོ་པོ་ལགས་སྐུ་ཚེ་མ་ཟིན་པ་དང་།

དེ་དེ་བཞིན་བྱས་ནས་སྤྱི་འཐུས་ལྷན་ཚོགས་ཀྱི་ཚོགས་གཙོ་ཟུར་པ་རྒྱ་རི་རིན་པོ་ཆེ་མཆོག་དང་བོད་མི་མང་དབུས་གཙང་སྤྱི་ཟུར་མངའ་རིས་ཁྱུང་ལྷོ་གྲགས་པ་རྣམ་རྒྱལ་མཆོག རྒྱ་གར་གྱི་མེ་འཁོར་བློན་ཆེན་ཟུར་པ་སྐུ་ཞབས་ཇོར་ཇ་ཕར་ནན་ཌེས་ George Fernandes མཆོག ཨ་རིའི་སྲིད་འཛིན་ཟུར་པ་སྐུ་ཞབས་ཇོར་ཇི། ཨེཇ། ཌབ་ལུ། བྷུཤ་ George H.W. Bush མཆོག་དེ་དག་གཤེགས་པའི་ཐོག་ལ་ང་ཚོས་མྱ་ངན་གུས་འདུད་ཀྱི་གྲོས་ཆོད་བཞག་པ་རེད།
དེའི་རྗེས་ལ་གདུང་སེམས་མཉམ་སྐྱེའི་གྲོས་ཆོད་བཞག་ཡོད། དེ་བཞིན་ངས་གོང་དུ་ཞུས་པ་ནང་བཞིན་གཙོ་བོ་སྔོན་རྩིས་ཀྱི་གྲོས་ཚོགས་ཡིན་སྟབས་དཔལ་འབྱོར་བཀའ་བློན་མཆོག་གིས་སྔོན་རྩིས་གསུང་བཤད་གནང་བ་དང་། ཚོད་དཔག་འཆར་རྩིས་ཚོགས་ཆུང་གི་ཚོགས་གཙོས་ཚོད་དཔག་ཚོགས་ཆུང་གི་སྙན་ཐོ་སྙན་སྒྲོན་གནང་རྗེས་སྤྱི་ཡོངས་ཀྱི་སྔོན་རྩིས་བགྲོ་གླེང་གནང་བ། དེ་ནས་ལས་ཁུངས་རེ་རེ་བཞིན་དུ་ལས་དོན་དང་རྩིས་འགོ་ཐོག་ལ་གོ་བསྡུར་སྦྱང་བཤད་གནང་བ་སོགས་གང་ལྟར་ཡག་ཐག་གཅོད་བྱུང་སོང་།
དེ་ནས་དྲི་བ་དྲི་ལན་གཉིས་ཙམ་བྱུང་ཡོད། ཁྲིམས་བཟོ་ལས་དོན་གསུམ་སླེབས་པའི་ནང་ནས་གཅིག་ཕྱིར་བསྡུ་བྱས་ནས་གཉིས་གཏན་འབེབས་བྱུང་ཡོད། དེ་ནས་བཀའ་ཤག་གིས་གསལ་བཤད་དང་དེའི་ཐོག་བགྲོ་གླེང་གནང་ཚར་བའི་རྗེས་ལ་ལན་འདེབས། དེའི་རྗེས་འབྲེལ་གྲོས་ཆོད་འཇོག་པ། དེ་བཞིན་མང་ཚོགས་རྩིས་ཁྲ་ཚོགས་ཆུང་གི་སྙན་ཐོ་སྙན་སྒྲོན་གནང་ཡོད། དེའི་རྗེས་འབྲེལ་བགྲོ་གླེང་དང་གྲོས་ཆོད་བཞག་པ་སོགས་དེ་དག་བྱུང་ཡོད།
རྩ་བའི་དེ་རིང་ང་ཚོའི་གྲོས་ཚོགས་ནང་དབུ་མའི་ལམ་གྱི་སྐོར་དང་། དོལ་རྒྱལ་གྱི་སྐོར་སོགས་མང་པོ་ཞིག་བསླེབས་སོང་། དབུ་མའི་ལམ་གྱི་དོན་ངོ་མ་ནི་དཔལ་ལྡན་སྲིད་སྐྱོང་མཆོག་གིས་གསུང་པ་ནང་ལྟར་རེད། རྩ་བའི་༸རྒྱལ་བ་རིན་པོ་ཆེ་མཆོག་གི་མ་འོངས་སྔོན་གཟིགས་ཀྱི་བཀའ་དགོངས་ཡིན་པ་གང་ཞིག་ལ་གཞིས་བྱེས་བོད་མི་རྒྱ་ཆེ་མང་ཚོགས་ཀྱིས་རྒྱབ་སྐྱོར་ཤུགས་ཆེན་པོ་ཡོད་པའི་ཐོག་ནས་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བ་ཞིག་ཆགས་ཡོད། དེར་བརྟེན་དེའི་ཐོག་ང་ཚོ་ཚང་མས་མཇུག་སྐྱོང་གནང་དགོས་རྒྱུ་གལ་ཆེན་པོ་ཞིག་རེད། ཅེས་ཞུ་རྒྱུ་ཡིན།

དོལ་རྒྱལ་སྐོར་དེ་བོད་པ་གཅིག་ཡིན་ནའང་ཚུར་སྡུད་དགོས་ཀྱི་རེད། འོན་ཀྱང་བོད་པ་ཞིག་གི་ངོ་བོའི་ཐོག་ནས་སོ་སོས་སྲུང་དགོས་རྒྱུ་མང་པོ་ཞིག་ཡོད་པ་དེ་ཚོ་སྲུང་དགོས་རེད་མ་གཏོགས་རྒྱབ་འགལ་རང་བྱས་པ་ཡིན་ན། ང་ཚོས་ཚུར་ལེན་ཐུབ་ཐབས་མེད། དེར་བརྟེན་གང་ལྟར་ཁ་སྔོན་སྤྱི་འཐུས་འགའ་ཤས་ཀྱིས་རྒྱབ་ལྗོངས་རྒྱུ་མཚན་དང་བཅས་པ་གསལ་བཤད་ཡག་ཐག་གཅོད་གནང་སོང་། དེ་ག་རང་ཆགས་ཡོད།དེར་བརྟེན་ཁོ་ཚོས་བླང་དོར་ལྡོག་ཤེས་བྱས་པ་ཡིན་ན། ག་དུས་ཡིན་ནའང་ང་ཚོས་ཚུར་བསྡུ་དགོས་ཀྱི་རེད། མ་བྱུང་ན་ཡོང་རྒྱུ་ཡོད་པ་མ་རེད། དེ་གཅིག་ཞུ་འདོད་བྱུང་།

ད་རེས་གྲོས་ཚོགས་ཚོགས་པའི་སྐབས་ལ་སྤྱི་ཚོགས་བདེ་དོན་དང་། འཕྲོད་བསྟེན། ཤེས་ཡོན་སོགས་ཀྱི་ཐོག་ལ་དགོངས་འཆར་ཧ་ཅང་ཡག་པོ་གནང་སོང་། འཛིན་སྐྱོང་ལ་ཐུགས་ཕན་གསོ་སོང་གསུང་གི་འདུག དངོས་གནས་གསོ་འོས་པ་ཆགས་སོང་བསམ་པ་བྱུང་སོང་། འཛིན་སྐྱོང་བཀའ་ཤག་གི་ངོས་ནས་གནད་དོན་གང་དང་གང་ཡིན་པ་ཡིན་ནའང་ཧ་ཅང་གསལ་པོ་བཀའ་གནང་སོང་། དེ་དག་ཚང་མ་ལ་ལེགས་སོ་བསྔགས་བརྗོད་ཞུ་རྒྱུ་ཡིན།

ང་ཚོ་ཚང་མ་བོད་དང་བོད་མི་མང་གི་ཆེད་དུ་ལས་ཀ་བྱེད་རྒྱུར་མང་ཚོགས་ནས་བདམས་པ་ཞིག་ཆགས་ཡོད་སྟབས། ང་ཚོ་ཚང་མ་ནུས་པ་མཉམ་སྤུངས་དང་རྡོག་རྩ་གཅིག་ཏུ་སྒྲིལ་བའི་ཐོག་ནས་གང་གནང་རྒྱུ་འདུག་དེའི་ཐོག་རིག་པ་རྩལ་བཏོན་ནས་ཡག་ཐག་གཅོད་གནང་སོང་། མ་འོངས་པར་མུ་མཐུད་བོད་མི་རིགས་དང་བོད་སྤྱི་པ། བོད་རྒྱལ་ཁབ་ཀྱི་ཆེད་དུ་སོ་སོའི་བློ་རྩེ་ནུས་པ་གང་གདོན་རྒྱུ་ཡོད་ན་བཏོན་གནང་དགོས་རྒྱུ་གལ་ཆེན་པོ་རེད།

དེ་རེས་ལས་རིམ་གཅིག་གི་ནང་དཔལ་ལྡན་སྲིད་སྐྱོང་མཆོག་གིས་སྒྲིག་གཞི་དགོངས་དོན་བཀའ་བློན་འོས་མི་ཞིག་འདོན་གནང་བ་རེད། གྲོས་ཚོགས་ནང་ཚོགས་གཙོས་སྔོན་ནས་གསལ་བཤད་བྱས་པ་ནང་བཞིན། ངོ་ཡོད་གསུམ་ཆ་གཉིས་ཡོད་ན་བརྒྱ་ཆ་ཉི་ཤུ་རྩ་གཅིག་དང་གྲངས་ཆུང་ལྔ་ལོང་དགོས་ཀྱི་ཡོད་པ་དེ་དག་འོས་གྲངས་བཤེར་མ་བྱས་གོང་ལ་ཚོགས་གཙོས་གསལ་བསྒྲགས་བྱས་པ་ཡིན། དེའི་རྗེས་འོས་གྲངས་བཤེར་ལོངས་བའི་སྐབས་སྤྱི་འཐུས་ཉི་ཤུ་རྩ་གཅིག་གི་རྒྱབ་གཉེར་བྱུང་བ་རེད། སྤྱི་འཐུས་ཉི་ཤུ་རྩ་གཅིག་གི་རྒྱབ་གཉེར་བྱུང་བ་ཡིན་སྟབས། བཅའ་ཁྲིམས་དོན་ ༤༩ པའི་ནང་གསས་དང་པོ་ནང་ལ་སྤྱི་འཐུས་ལྷན་ཚོགས་ཀྱི་ལས་དོན་བྱ་རྒྱུ་ཡིན་ནའང་རེད། སྤྱི་འཐུས་རྒྱུན་ལས་ཀྱི་ལས་ཀ་བྱ་རྒྱུ་ཡིན་ནའང་རེད། རྩ་འབོར་དང་ངོ་ཡོད་རྩི་པའི་སྐབས་སྐར་ཆ་བརྩི་མ་དགོས་ཞེས་གསུང་ཡོད། དེར་བརྟེན་བརྒྱ་ཆ་ཉི་ཤུ་རྩ་གཅིག་དང་གྲངས་ཆུང་ལྔ་འདི་རྩིས་ཇི་ལྟར་སྐོར་གྱི་ཡོད་ནའང་།   དེང་སྐབས་མི་མང་པོ་ཞིག་གིས་རྒན་གྷུ་གྷལ་ Google ལ་ཁུངས་གཏུག་གི་ཡོད་པ་རེད། རྣམ་པ་ཚོས་ ༤༣ འདི་གྷུ་གྷལ་བརྒྱུད་ནས་བརྒྱ་ཆ་ ༥༠ ལ་སྐོར་བ་ཡིན་ན་ག་ཚོད་ཆགས་ཀྱི་འདུག འདི་གཅིག་གཟིགས་དང་། བརྒྱ་ཆ་ཉི་ཤུ་རྩ་གཅིག་དང་གྲངས་ཆུང་ལྔ་ཆགས་འགྲོ་གི་རེད། དེར་བརྟེན་ང་ཚོ་ངོས་ནས་བརྒྱ་ཆ་ལོངས་བ་ཞིག་ལ་ངོས་འཛིན་བྱས་པའི་ཐོག་ནས་ཐག་གཅོད་བྱས་པ་རེད། འོན་ཀྱང་ཆེས་མཐོའི་ཁྲིམས་ཞིབ་ཁང་ནས་བརྒྱ་ཆ་ལོངས་མི་འདུག་གསུངས་ནས་ད་ལྟའི་གནས་སྟངས་འདི་འདྲ་ཞིག་ཆགས་ཡོད། བརྒྱ་ཆ་སྐོར་ཕྱོགས་འདི་ཕྱོགས་མི་འདྲ་བ་རེད། ང་ཚོ་ངོས་ནས་སྔོན་མ་ནས་བསྐོར་བ་འདི་གཞི་རྩར་བཟུང་བ་རེད། གྷུ་གྷལ་བསྔོགས་པ་ཡིན་ནའང་འདི་ག་རང་ཐོན་ཡོང་གི་འདུག འདི་མ་འགྲིག་པ་ཞིག་ཡིན་པ་མཐོང་གི་མི་འདུག

མང་ཚོགས་རྩིས་ཁྲ་ཚོགས་ཆུག་གིས་སྙན་ཐོ་སྙན་སྒྲོན་ཞུས་པའི་ཐོག་བགྲོ་གླེང་གནང་བ་རེད། གང་ལྟར་ཚོགས་ཆུང་འཛུགས་རྒྱུ་ཞིག་རྒྱབ་གཉེར་ནང་ཡོད་པ་རེད། ཚོགས་ཆུང་ཇི་ལྟར་འཛུགས་དགོས་ཀྱི་འདུག་རྗེས་ལ་སྤྱི་འཐུས་རྒྱུན་ལས་ནང་གོ་བསྡུར་ཞུ་རྒྱུ་ཡིན། སྤྱི་འཐུས་ལྷན་ཚོགས་རང་གིས་འཛུགས་ཐུབ་རྒྱུ་ཞིག་རེད་ཡང་ན་འཛིན་སྐྱོང་དང་ལྷན་གོ་བསྡུར་བྱས་ནས་གནང་རྒྱུ་རེད་འདི་རྗེས་ལ་བབ་གཟིགས་ཞུ་རྒྱུ་ཡིན།

དེ་ནས་མང་ཚོགས་རྩིས་ཁྲ་ཚོགས་ཆུང་གི་སྙན་ཐོ་ནང་གང་གསལ་བ་དེ་དག་ས་བགོས་ལ་ཕེབས་པའི་སྐབས་སུ་སོ་སོ་དང་འབྲེལ་བ་ཡོད་པའི་གནས་ཚུལ་གང་འདུག་དེ་དག་གཟིགས་དགོས་འདུག  དེ་དག་གཟིགས་ནས་ས་གནས་སོ་སོར་སྐྱོན་གནས་གང་འདུག་དེ་དག་གསལ་པོ་བཟོ་དགོས་པ་ཞིག་དང་། དེ་ནས་སྙན་ཐོ་ནང་མང་པོ་ཡོང་དགོས་པ་ཇི་ལྟར་ཆགས་ཀྱི་འདུག་ཅེ་ན། རྩིས་ཞིབ་གནང་སླད་ཕེབས་པའི་སྐབས་གསལ་པོ་མ་གསུངས་བའི་རྐྱེན་གྱིས་སྙན་ཐོའི་ནང་སླེབ་ཡོང་གི་འདུག དེར་བརྟེན་གསལ་པོ་གང་བཟོ་རྒྱུ་ཡོད་ནའང་རྩིས་ཞིབ་གནང་བའི་སྐབས་བཟོ་དགོས་རྒྱུ་གལ་ཆེན་པོ་རེད་འདུག དེར་བརྟེན་བཀུར་འོས་སྤྱི་འཐུས་རྣམ་པ་ཕྱོགས་མཐའ་ཁག་ལ་ཕེབས་པའི་སྐབས་འདི་ཚོའི་གྲས་ལམ་སྟོན་གནང་དགོས་རྒྱུ་གལ་ཆེན་པོ་འདུག ཅེས་ཞུ་འདོད་བྱུང་།

དེ་ནས་ཚོགས་གཙོ་ཁ་སང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་པའི་སྐབས་ལ་བཀའ་སློབ་ཕེབས་རྒྱུ་གཅིག་དེ། སྔོན་མ་སྐབས་བཅུ་གསུམ་པའི་སྐབས་སུ་ལས་ཀ་བྱས་པའི་སྐབས་སུ་ལས་ཀ་འཕྲོ་ལྷག་པ་ཞིག་ཡོད་པ་རེད། གང་ལྟར་ང་རང་ཚོ་རྒྱ་གར་ནང་བོད་པ་ཕོན་ཆེན་པོ་ཞིག་གནས་བསྡད་ཀྱི་ཡོད་པ་རེད། དེ་ཡིན་ཙང་རྒྱ་གར་གྱི་མངའ་སྡེའི་གྲོས་ཚོགས་ཁག་ལ་བོད་དོན་རྒྱབ་སྐྱོར་ཚོགས་པ་བཙུགས་དགོས་པ་དེ་གལ་ཆེན་པོ་ཞིག་ཡིན་པ་དེ་༸སྐྱབས་མགོན་རིན་པོ་ཆེས་དེ་ག་རང་དགོངས་བཞེས་གནང་གི་འདུག ད་རེས་ཡིན་ནའང་བཀའ་སློབ་ད་ག་རང་ཕེབས་སོང་། སྔ་འཕྲོས་རིང་དེར་ང་རང་ཚོ་བོད་པ་གནས་ས་འདི་ཚོར་བཙུགས་དགོས་ཀྱི་འདུག་ཅེས་གསུངས་སོང་། དེ་འདྲ་ཡིན་ཙང་ང་རང་ཚོ་ད་ལྟ་བཀུར་འོས་སྤྱི་འཐུས་རྣམ་པ་ཚོ་ཕྱོགས་མཐའ་ཁག་ལ་ཕེབས་པའི་སྐབས་སུ་མངའ་སྡེའི་གྲོས་ཚོགས་འཐུས་མི་དེ་དག་མཇལ་འཕྲད་གནང་རྒྱུ། བཙུགས་ཐུབ་པ་ཡིན་ན་རྩེད་གྲ བཙུགས་མ་ཐུབ་པ་ཡིན་ནའང་གང་ལྟར་ལས་འགུལ་ཞིག་འགོ་བཙུགས་ཐུབ་དགོས་པ་དེའང་གལ་ཆེན་པོ་ཞིག་རེད་འདུག མཇུག་སྐྱོང་དེ་ས་གནས་འགོ་འཛིན་སོ་སོས་གནང་དགོས་པ་ཆགས་ཀྱི་རེད་བསམ་གྱི་འདུག སྤྱི་འཐུས་རྣམ་པ་ག་དུས་ཡིན་ནའང་ས་གནས་ལ་ཡོད་པ་མ་རེད། དེར་བརྟེན་ས་གནས་ས་ཐོག་ནས་ས་གནས་འགོ་འཛིན་རེད། ས་གནས་འཐུས་ཚོགས་རེད། དེ་དག་གི་མཇུག་སྐྱོང་གནང་དགོས་ཀྱི་རེད་ཅེས་ཞུ་འདོད་བྱུང་།

དེ་ནས་ད་རེས་ཀྱི་གྲོས་ཚོགས་འདི་འགོ་བཙུགས་པ་དང་ང་ཚོའི་ཚོགས་དྲུང་སྙུང་གཞི་བྱུང་ནས་བཤགས་བཅོས་གནང་དགོས་པ་ཆགས་པ་རེད། དེ་ནས་ང་ཚོའི་ལས་བྱེད་ཚེ་བརྟན་བསྐལ་བཟང་གཙོ་བོར་གྱུར་པའི་ལས་བྱེད་ཚང་མས་ཧུར་ཐག་རྦད་ཐག་གནང་སྟེ། གང་ལྟར་ད་རེས་འཐུས་ཤོར་མེད་པ་ཞིག་བྱུང་སོང་། དེར་བརྟེན་ཚོགས་དྲུང་ལས་ཁུངས་ཀྱི་ལས་བྱེད་ཆེ་ཕྲ་ཆུང་གསུམ་ཚང་མ་ལོག་ལ་ཐུགས་རྗེ་ཆེ་ཞེས་ཞུ་རྒྱུ་ཡིན། མུ་མཐུད་དེ་ལྟར་གནང་དགོས་པ་དེ་གལ་ཆེན་པོ་རེད་འདུག་ཞུ་རྒྱུ་ཡིན། དེ་བཞིན་ང་རང་ཚོ་གྲོས་ཚོགས་ཚོགས་པའི་དུས་ལ་བདེ་སྲུང་ལས་ཁུངས་ཀྱི་ལས་བྱེད་ཚོས་ཀྱང་སྲུང་བྱ་ཧ་ཅང་གི་ཡག་པོ་གནང་སོང་། དེ་དེ་བཞིན་གྱི་ང་ཚོ་སྒྲ་བརྙན་སྡེ་ཚན་གྱི་ཕྱག་ལས་གནང་མཁན་རེད། དེ་དག་ཚང་མས་ཕྱག་ལས་ཧུར་ཐག་རྦད་ཐག་གནང་སོང་། ཐུགས་རྗེ་ཆེ་ཞེས་ཞུ་རྒྱུ་ཡིན། རྩ་བའི་ང་ཚོ་གྲོས་ཚོགས་འདི་ཚོགས་པའི་སྐབས་ལ་ལས་ཁུངས་ཚང་མ་དང་འབྲེལ་བ་ཡོད་པ་རེད།

གང་ལྟར་དངོས་སུ་དོན་བསྡད་མཁན་དང་རྒྱབ་ལ་གནང་བསྡད་མཁན་གཙོས་པའི་དངོས་ཤུགས་བརྒྱུད་གསུམ་གྱི་ལས་བྱེད་ཚང་མ་ལོག་དང་འབྲེལ་བ་ཆགས་ཀྱི་ཡོད་པ་རེད། གང་ལྟར་ཚང་མས་ཕྱག་ལས་རེ་རེ་གནང་ཡོད་པ་རེད། ཚང་མ་ལོག་ལ་ཐུགས་རྗེ་ཆེ་ཞུ་རྒྱུ་ཡིན། དམིགས་བསལ་གྱི་ད་རེས་བཀུར་འོས་སྤྱི་འཐུས་རྣམ་པ་ཚོས་དཔེ་མ་སྲིད་པའི་མཐུན་འགྱུར་ཧ་ཅང་ཡག་པོ་གནང་སོང་། གང་ལྟར་ཚོགས་གཙོས་གསལ་བཤད་གནང་བ་དེར་གསན་བཞེས་ཡག་པོ་གནང་སྟེ། ཁ་སང་ངས་གྲོས་ཚོགས་འགོ་བཙུགས་པའི་སྐབས་ལ་གསུངས་པ་ནང་བཞིན། རྒྱ་ཆེའི་མང་ཚོགས་ཐུགས་མ་ཕམ་པ་བཟོ་དགོས་པ་དེ་ང་ཚོའི་འགན་རེད་ཅེས་ཞུས་པ་ནང་བཞིན་དངོས་གནས་ད་རེས་གནང་སོང་བསམ་པའི་ཚོར་བ་ཞིག་བྱུང་། དེར་བརྟེན་ཚང་ལ་ལོག་ལ་ཐུགས་རྗེ་ཆེ་ཞེས་ཞུ་རྒྱུ་ཡིན། མཐའ་མ་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཁྲི་ལོར་བརྟན་པ་དང་། ཐུགས་ཀྱི་བཞེད་དོན་མཐའ་དག་ལྷུན་གྱི་གྲུབ་པའི་སྨོན་འདུན་ཞུ་རྒྱུ་ཡིན། དེ་ནས་ང་ཚོ་རྗེས་མ་གྲོས་ཚོགས་ཚོགས་དུས་བརྒྱད་པའི་སྐབས་ལ་བདེ་ཞིང་སྐྱིད་པའི་ངང་ལ་འཛོམས་རྒྱུའི་རེ་བ་དང་སྨོན་འདུན་ཞུས་པའི་ཐོག་ནས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་བདུན་པ་དེ་གྲོལ་བ་ཡིན། །