༢༠༡༩ ཟླ་ ༢ ཚེས་ ༢༠ རེས་གཟའ་ལྷག་པ།
༄༅། །འདི་གར་བྷར་སེལ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཁ་སང་ཕྱི་ཟླ་ ༢ ཚེས་ ༡༩ སྟེ་ཆོ་འཕྲུལ་དུས་ཆེན་ཉིན་མོར་སྦེལ་ཇམ་གྲོང་འཁྱེར་ཨན་ཝེ་པན་དུ་བོད་བརྒྱུད་ནང་བསྟན་བཤད་སྒྲུབ་བསྟན་རྒྱས་གླེང་གིས་གོ་སྒྲིག་འོག་རིས་མེད་ཆོས་བརྒྱུད་ཁག་གི་ལྟ་གྲུབ་བགྲོ་གླེང་ཆེན་མོ་ཐེངས་དང་པོ་ཚོགས་གནང་སོང་།
དེ་ཡང་ཆུ་ཚོད་བཞིའི་རིང་ཚོགས་པའི་བགྲོ་གླེང་སྐབས་སྤྲུལ་སྐུ་དང་། དགེ་བཤེས། མཁས་པ་ཁག་བདུན་ནས་གསུང་བཤད་གནང་རྗེས་དྲི་བ་དྲིས་ལན་གནང་འདུག སྐབས་དེར་མེ་ཏོག་རིན་པོ་ཆེ་མཆོག་ནས་རྟེན་འབྲེལ་ལྟོས་གྲུབ་སྐོར་གསུང་པ་དང་། སུད་སི་ནས་དགེ་བཤེས་བྱམས་པ་རབ་བརྟན་ལགས་ཀྱིས་བདག་མེད་པའི་ལྟ་གྲུབ་སྐོར་དང་། ར་ཉག་དཔལ་སྤྲུལ་རིན་པོ་ཆེ་མཆོག་གིས་བདེན་གཉིས་སྐོར། དགེ་བཤེས་ལྷ་རམས་པ་དགེ་ཟླ་བཟང་ལགས་ཀྱིས་ཕྱི་ནང་གི་ལྟ་གྲུབ་དང་སྡེ་སྣོད་གསུམ་སྐོར། རྒན་བཀྲ་ཤིས་ཚེ་རིང་ལགས་ཀྱིས་ནང་པའི་ལྟ་བའི་སྐོར། མགོ་ལོག་སྒྱུ་རྩལ་བ་དགེ་ཟླ་བྷེ་ལགས་ཀྱིས་བོད་པའི་སྤྱི་ཚོགས་དང་ཆོས་ལུགས་ནང་ཁུལ་མཐུན་སྒྲིལ་ཆེད་རེ་སྐུལ་གནང་སོང་། མཐར་རྒན་བློ་བཟང་ཚེ་བརྟན་ལགས་ཀྱིས་དབུ་མའི་ལྟ་གྲུབ་སྐོར་གསུང་གནང་སོང་།
གོང་གི་མཛད་རིམ་དབུ་འཛུགས་མ་གནང་གོང་ཆོས་ཚོགས་ཀྱི་འགན་འཛིན་ཚེ་བརྟན་ཕུན་ཚོགས་ནས་བགྲོ་གླེང་ངོ་སྤྲོད་དང་། མཁས་པ་ཁག དེ་བཞིན་སྐུ་མགྲོན་གཙོ་བོ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་དོན་ཁང་གི་དྲུང་ཆེ་མཐུ་སྟོབས་རྣམ་རྒྱལ། གཞན་ཡང་སྐུ་མགྲོན་རྣམ་པ་ཡོངས་ལ་འཚམས་འདྲི་དང་ཆོས་ཚོགས་ཀྱི་ངོ་སྤྲོད་གནང་སོང་།
སྐུ་མགྲོན་གཙོ་བོས་བོད་བརྒྱུད་ནང་བསྟན་རིག་པའི་ངོ་སྤྲོད་དང་བོད་ནང་རྒྱ་གར་པཎ་གྲུབ་རྣམས་ཀྱིས་སངས་རྒྱས་ཀྱི་བསྟན་པ་དར་སྤེལ་མཛད་པའི་བཀའ་དྲིན་རྗེས་དྲན་ཐོག དཔལ་ནཱ་ལེནྡའི་ལྟ་གྲུབ་ད་བར་མི་ཉམ་རྒྱུན་འཛིན་དང་ཉམ་པ་སླར་གསོའི་བརྒྱུད་རིམ། ལྷག་པར་དེང་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་རླབས་ཆེན་མཛད་ཁུར་བཞི་པ་རྒྱ་གར་གནའ་རབས་སེམས་ཁམས་རིག་པའི་ལྟ་གྲུབ་དང་འབྲེལ་བའི་ལེགས་བཤད་དེ་དག་རྒྱལ་སྤྱི་དང་ལྷག་པར་རྒྱ་གར་ནང་སླར་གསོ་མཛད་བཞིན་པ་དེས་སངས་རྒྱས་ཀྱི་བསྟན་པར་ཞབས་འདེགས་རླབས་པོ་ཆེ་ཞུ་བཞིན་ཡོད་པ་སོགས་གསུངས། གཞན་ཡང་རྒན་ཚེ་བརྟན་ཕུན་ཚོགས་ལགས་ཀྱིས་བོད་ཀྱི་རིག་གནས་ཐོག་འབད་བརྩོན་གནང་བཞིན་པར་ངོས་འཛིན་རྒྱབ་སྐྱོར་དང་། འབྱུང་འགྱུར་ཡང་མཁས་པ་ནང་ཁུལ་ཙམ་དུ་མ་ཟད། མང་ཚོགས་དཀྱུས་མ་དང་ཕྱི་རྒྱལ་མི་རིགས་ནང་ཆོས་རྗེས་འབྲང་པ་ཚོའི་དབར་བགྲོ་གླེང་གནང་ཐབས་ཡོང་བའི་འབོད་སྐུལ་ཀྱང་ཞུས་སོང་།
