ཕྱི་ལོ་ ༢༠༡༩ ཟླ་ ༢ ཚེས་ ༤ རེས་གཟའ་ཟླ་བ། 

༄༅། །ཨ་རིའི་ནང་རྟེན་གཞི་བྱས་པའི་སྒྱུ་རྩལ་ཚོགས་པ་ Art 4 Peace ཞེས་གཞུང་འབྲེལ་མ་ཡིན་པའི་ཚོགས་པས་ཕྱི་ལོ་ ༢༠༡༦ ནས་འགོ་འཛུགས་ཀྱིས་ལོ་ལྟར་སྤྱི་ཚོགས་ཞབས་ཞུ་དང་ཞི་བདེའི་སྣེ་ཁྲིད་གཟེངས་ཐོན་ཚོགས་སྒེར་ཁག་ཅིག་ལ་སྒྱུ་རྩལ་གྱི་ཞི་བདེའི་གཟེངས་རྟགས་འབུལ་སྲོལ་ཡོད་པ་ལྟར།   འདི་ལོའི་སྒྱུ་རྩལ་ཚོགས་པའི་གཟེངས་རྟགས་དེ་བཞིན་ཕྱི་ལོ་ ༢༠༡༩ ཟླ་ ༢ ཚེས་ ༢ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཏིན་མུར་ཏི་ཚོགས་ཁང་Teen Murti Bhavan Hall དུ་བཙན་བྱོལ་བོད་མིའི་སྤྱི་ཚོགས་ཀྱིས་ཞི་བདེ་དང་མཐུན་སྒྲིལ་གོང་འཕེལ་ཐོག་བདེ་སྐྱིད་ལྡན་པའི་སྤྱི་ཚོགས་མིག་དཔེར་འོས་པ་ཞིག་ལ་ངོས་འཛིན་གནང་སྟེ་འདི་ལོའི་ཞི་བདེའི་གཟེངས་རྟགས་དེ་ཕུལ་བ་ཞིག་ཡིན་འདུག 

དེ་ཡང་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་གིས་གཟེངས་རྟགས་དེ་བཞེས་སྐབས་གསུང་བཤད་གནང་དོན། གཞིས་བྱེས་བོད་མིའི་ཚབ་ཞུས་ཏེ་གོ་སྒྲིག་གནང་མཁན་ཡོངས་ལ་ངས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་།  བོད་མི་
ཚོར་མཚོན་ན་སྒྱུ་སྩལ་ཚོགས་པས་ཐེངས་འདིར་གཟེངས་རྟགས་འདི་ལྟ་བུ་ཞིག་གནང་བ་དེ་ནི་ཧ་ཅང་དགའ་སྤོབས་སྐྱེ་འོས་པ་ཞིག་རེད།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དང་རྣམ་པ་ཀུན་དུ་འཛམ་གླིང་སྟེང་འཚེ་མེད་ཞི་བདེའི་གལ་གནད་སྐོར་བཀའ་སློབ་སྩལ་དང་སྩོལ་བཞིན་ཡོད། ཅེས་སོགས་གསུངས།   དེ་ཡང་མཛད་སྒོའི་ཐོག་མར་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྒྱུ་རྩལ་ཚོགས་པར་སྩལ་བའི་གསུང་འཕྲིན་ཞིག་སྒྲོག་སྦྱངས་ཞུས་འདུག 

གསུང་འཕྲིན་ནང་འཁོད་དོན། སྒྱུ་རྩལ་ཚོགས་པའི་གཟེངས་རྟགས་གོ་སྒྲིག་པ་ཡོངས་ནས་འཛམ་གླིང་ནང་ཞི་བདེ་གོང་མཐོར་གཏོང་བཞིན་པར་རྗེས་སུ་ཡིད་རང་ཞུས་པ་དང་སྦྲགས། སྒྱུ་རྩལ་ཚོགས་པས་བཙན་བྱོལ་བོད་མིའི་སྤྱི་ཚོགས་ལ་གཟེངས་རྟགས་ཕུལ་བར་ཐུགས་རྗེ་ཆེ། ཞེས་འཁོད་འདུག 

སྒྱུ་རྩལ་ཚོགས་པའི་གཟེངས་རྟགས་ཀྱི་མཛད་སྒོར་འཛམ་གླིང་གི་ཡུལ་གྲུ་མང་པོའི་འགོ་ཁྲིད་མི་སྣ་དང་། གཞུང་ཚབ་པ། ཤེས་ཡོན་པ། སྒྱུ་རྩལ་བ་སོགས་ཕེབས་ཡོད། ཕྱོགས་མཚུངས་ལྡི་ལི་སྐུ་ཚབ་དོན་ཁང་གི་ལས་བྱེད་དང་། ལྡི་ལི་བསམ་ཡས་གླིང་བོད་མིའི་ས་གནས་འགོ་འཛིན། ལྡི་ལི་ཁུལ་དུ་གནས་སྡོད་བོད་མི་ཁག་ཅིག་བཅས་མཛད་སྒོར་མཉམ་ཞུགས་གནང་འདུག་པ་བཅས།