ཕྱི་ལོ་ ༢༠༡༩ ཟླ་ ༢ ཚེས་ ༡༨ རེས་གཟའ་ཟླ་བ།
༄༅། ། ཕྱི་ལོ་ ༢༠༡༩ ཟླ ༢ ཚེས་ ༡༦ དང་ ༡༧ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་ལས་འཆར་ཚན་པས། ཅན་ངྷི་གྷར་ཁུལ་གྱི་མཐོ་སློབ་ཁག་གི་ནང་སློབ་སྦྱོང་བྱེད་བཞིན་པའི་བོད་པའི་སློབ་ཕྲུག་ཁག་གཅིག་ལ་ཅན་ངྷི་གར་དུ་ཡོད་པའི་ Hotel Pride ཞེས་པའི་གསོལ་མགྲོན་ཁང་དུ་གཉིས་སྨན་དབུ་མའི་ལམ་གྱི་སྐོར་གོ་རྟོགས་དང་འབྲེལ་བའི་ཟབ་སྦྱོང་ཞིག་གོ་སྒྲིག་གནང་ཡོད།
དེ་ཡང་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣ ཐོག་གཉིས་སྨན་དབུ་མའི་ལམ་གྱི་སྲིད་བྱུས་སྐོར་ལ་ངོ་སྤྲོད་གསུང་བཤད་ཟབ་རྒྱས་གནང་ཡོད་པ་མ་ཟད། ཟབ་སྦྱོང་བ་རྣམས་ཀྱི་དོགས་འདྲི་མང་པོ་ཞིག་ལ་གསལ་བཤད་དང་འབྲེལ་ནས་དབུ་མའི་ལམ་གྱི་སྲིད་བྱུས་ཀྱི་བྱུང་རིམ་དང་། རྒྱབ་ལྗོངས་ལོ་རྒྱུས། དེ་བཞིན་དབུ་མའི་ལམ་གྱི་གྲུབ་འབྲས་སོགས་ཀྱི་སྐོར་ལ་ངོ་སྤྲོད་གནང་ཡོད།
སྐབས་དེར་ཟབ་ཁྲིད་གནང་མཁན་ཕྱི་འབྲེལ་དྲུང་འཕར་འཆི་མེད་ཚེ་དབྱངས་ལགས་ཀྱིས་ཐེངས་འདིའི་ཟབ་སྦྱོང་ཚོགས་དགོས་པའི་དམིགས་ཡུལ་དང་། རྒྱུ་མཚན་སོགས་ངོ་སྤྲོད་གནང་།
སྤྱིར་ཉིན་གྲངས་གཉིས་རིང་གི་་ཟབ་སྦྱོང་ནང་འཛུལ་ཞུགས་གནང་མཁན་བུ་གྲངས་ ༡༡ དང་བུད་མེད་ ༡༧ བཅས་ཁྱོན་སློབ་ཕྲུག་གྲངས་ ༢༨ མཉམ་ཞུགས་གནང་ཡོད། སློབ་ཕྲུག་དེ་དག་གི་ཁོངས་ནས་མང་ཆེ་བ་ཉེ་བའི་གཙུག་ལག་རམ་འབྱམས་པར་སློབ་སྦྱོང་གནང་བཞིན་ཡོད་འདུག་པ་དང་། ཟབ་ཁྲིད་གནང་མཁན་ཕྱི་དྲིལ་ལས་བྱེད་འབྲུག་ལྡན་སྐྱིད་ལགས་དང་། མཁའ་འགྲོ་སྒྲོལ་མ་ལགས། ཚེ་རིང་མཆོག་ལེགས་ལགས་བཅས་ཡིན་འདུག་པ་བཅས།།
