༢༠༡༩ ཟླ་ ༢ ཚེས་ ༡༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༩ ཟླ་ ༢ ཚེས་ ༡༢ ཉིན་ཨ་རི་སྐུ་ཚབ་དོན་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་། དེ་བཞིན་རྒྱལ་སའི་མངའ་ཁུལ་བོད་རིགས་ཚོགས་པ་བཅས་ཀྱི་གོ་སྒྲིག་འོག་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཞིག་གོ་སྒྲིག་གནང་སྐབས། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་Nancy Pelosiམཆོག་གིས་གསུང་བཤད་གནང་དོན།
གྲོས་ཚོགས་གོང་མ་དང་། མང་གཙོ་ཚོགས་པ། སྤྱི་མཐུན་ཚོགས་པ་བཅས་ཀྱི་ཚབ་ཞུས་ནས་བརྗོད་རྒྱུར། བོད་ནང་དུ་འཕྲད་བཞིན་པའི་དཀའ་ངལ་དེ་དག་ངེས་པར་དུ་སེལ་ཐབས་བྱེད་དགོས། རྒྱ་ནག་དང་ཚོང་འབྲེལ་བྱེད་སྐབས་དོ་ཕོག་འགྲོ་རྒྱུ་རེད་བསམ་ནས་བོད་དོན་ཐོག་རྒྱབ་སྐྱོར་བྱ་རྒྱུར་ཐེ་ཚོམ་བྱས་མི་རུང་། ངས་ཡང་ཡང་བཤད་པ་ལྟར། གལ་ཏེ་ང་ཚོས་བོད་ནང་དུ་བྱུང་བཞིན་པའི་གནས་སྟངས་སྐོར་སྐད་ཆ་བཤད་མ་ཐུབ་ཚེ། འཛམ་གླིང་གི་ས་ཕྱོགས་གཞན་དང་གཞན་དུ་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པར་གདོང་ལེན་བྱ་རྒྱུའི་བཟང་སྤྱོད་ཀྱི་ཐོབ་ཐང་བརླག་འགྲོ་བ་རེད། དེར་བརྟེན་བོད་དོན་ཐོག་རྒྱབ་སྐྱོར་བྱེད་རྒྱུ་ནི་འཛམ་གླིང་སྤྱི་ལ་དཀྲི་བའི་བཟང་སྤྱོད་ཀྱི་ལས་འགན་གལ་ཆེན་ཞིག་ཆགས་ཡོད། འབུམ་རམས་པ་བློ་བཟང་སེངྒེ་མཆོག་གི་དབུ་ཁྲིད་ལམ་སྟོན་ལ་ང་ཚོས་ཡི་རང་བསྔགས་བརྗོད་ཞུ་བཞིན་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་ཁྱེད་ཀྱིས་དབུ་ཁྲིད་པའི་ལས་དོན་གནང་ཕྱོགས་དེར་ཐུགས་སྤོབས་རྒྱ་ཆེ་མཛད་བཞིན་ཡོད་པ་ངས་ཤེས་ཀྱི་ཡོད།
འབུམ་རམས་པ་བློ་བཟང་སེངྒེ་མཆོག་གིས་ང་ཚོའི་སྲིད་འཛིན་རིམ་བྱོན་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྩི་བཀུར་ཇི་ལྟར་ཞུས་པ་དང་། ཐུགས་ཉེས་པོའི་ཐོག་ནས་མཛའ་བརྩེའི་འབྲེལ་ལམ་རྒྱུན་སྐྱོང་གནང་བའི་སྐོར་གསུང་སོང་། ངས་འདིར་སྲིད་འཛིན་ཟུར་པ་སྐུ་ཞབས་ཇོར་ཇི་ཌབ་ལུ་བྷུ་ཤི་མཆོག་དང་༸གོང་ས་༸སྐྱབས་མགོན་ཏཱ་ལའི་བླ་མའི་མཛའ་བརྩེའི་འབྲེལ་ལམ་སྐོར་གྱི་གནས་ཚུལ་གཅིག་ཞུ་རྒྱུ་ཡིན། ༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་རྟགས་མ་འབུལ་ལམ་ཞུ་སྐབས་(༸གོང་ས་ཏཱ་ལའི་བླ་མ་མཆོག་ལ་གསེར་གྱི་རྟགས་མ་ཕུལ་བ་དེས་ཨ་རིའི་གྲོས་ཚོགས་ལ་ཆེ་མཐོང་ཐོབ་པ་ཞིག་བྱུང་) སྲིད་འཛིན་མཆོག་སྐུ་དངོས་མཛད་སྒོར་ཕེབས་ནས་གསེར་གྱི་རྟགས་མ་དེ་བཞིན་༸གོང་ས་ཏཱ་ལའི་བླ་མ་མཆོག་ལ་ཕུལ་བ་མ་ཟད། ལྕམ་སྐུ་བྷུ་ཤི་མཆོག་ཀྱང་མཛད་སྒོར་ཕེབས་ཡོད། དེ་ནི་ཆེ་མཐོང་ཧ་ཅང་ཞུས་པ་ཞིག་མཚོན།
བོད་ནང་འགྲོ་འོང་ཆོག་པའི་ཁྲིམས་འཆར་དེ་ཁྲིམས་སུ་གཏན་འབེབ་ཐུབ་པ་དེའང་གྲོས་ཚོགས་གོང་འོག་གཉིས་ཀའི་མང་གཙོ་དང་སྤྱི་མཐུན་ཚོགས་པ་ཐུན་མོང་གིས་རྒྱབ་སྐྱོར་གནང་བའི་གྲུབ་འབྲས་རླབས་ཆེན་ཞིག་རེད། ང་ཚོ་བོད་ནང་ལྟ་སྐོར་དུ་སྐྱོད་སྐབས་སྐུ་ཞབས་ཇིམ་མེག་གྷོ་ཝན་Mr McGovernམཆོག་གིས་རྒྱ་ནག་ས་གནས་ལས་བྱེད་དང་ལྷན་ཚོགས་འདུ་ནམ་ཚོགས་སྐབས་ཕེབས་པ་མ་ཟད། ཚོགས་བཅར་བ་རྒྱ་ནག་ལས་བྱེད་མཐོ་དམའ་ཡོད་དོ་ཅོག་དང་ཐུག་པ་རེད། པེ་ཅིང་དུ་ཡོད་སྐབས་ཁོང་གིས་བོད་ནང་འགྲོ་འོང་ཆོག་པའི་གོ་སྐབས་བརྗེ་ལེན་དགོས་གལ་གྱི་བསམ་འཆར་བཏོན་པ་རེད། བསམ་འཆར་དེ་ད་ཆ་ཁྲིམས་སུ་གཏན་འབེབ་བྱུང་ཡོད། ཁྲིམས་འཆར་དེ་མཐར་གྲོས་ཚོགས་གོང་མའི་ནང་སྤྱི་མཐུན་ཚོགས་པའི་དབུ་ཁྲིད་མར་ཀོ་རུ་བྷིའོ་Marco Rubio མཆོག་གི་དབུ་ཁྲིད་འོག་ཁྲིམས་སུ་གཏན་འབེབ་གནང་མཚམས་ང་ཚོ་ཚང་མའི་སེམས་ནང་སྤྲོ་སྣང་ཆེན་པོ་སྐྱེས་བྱུང་། གང་ལྟར་གྲོས་ཚོགས་གོང་འོག་གཉིས་ཀའི་ནང་ཆབ་སྲིད་ཚོགས་པ་གཉིས་ཀས་རྒྱབ་སྐྱོར་གནང་རྗེས་སྲིད་འཛིན་ཊམ་President Trumpམཆོག་གིས་མཚན་རྟགས་བཀོད་ནས་ཁྲིམས་སུ་གཏན་འབེབས་གནང་ཐུབ་པ་བྱུང་ཡོད། དེ་ནི་གྲུབ་འབྲས་ཧ་ཅང་ཆེན་པོ་ཞིག་རེད། དེར་བརྟེན་ངས་སྐུ་ཞབས་ཇིམ་མེག་གྷོ་ཝན་མཆོག་ལ་ཐུགས་རྗེ་ཆེ་ཟེར་རྒྱུ་ཡིན།
ཕྱོགས་མཚུངས་མེ་ཐིའོ་མེ་ཀ་ཆི་Matteo Mecacciམཆོག་གིས་གྲོས་ཚོགས་འཐུས་མི་ཕན་ཚུན་དབར་འབྲེལ་ལམ་རྒྱུན་སྐྱོང་ཐོག་ལས་དོན་རྒྱ་ཆེ་སྤེལ་ཡོད། ཁོང་གིས་འདས་པའི་ལོ་ངོ་བཅུ་ཕྲག་རིང་སྙིང་སྟོབས་ཆེན་པོའི་སྒོ་ནས་རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་ཆེད་འབད་བརྩོན་རྒྱ་ཆེ་གནང་ཡོད། ངས་ཁྱེད་ཀྱི་དབུ་ཁྲིད་ལས་དོན་ལའང་ཐུགས་རྗེ་ཆེ་ཟེར་གྱི་ཡིན། ཞེས་སོགས་ཀྱི་གསུང་བཤད་གནང་འདུག་པ་བཅས།།
