༢༠༡༩ ཟླ་ ༢ ཚེས་ ༢༢ རེས་གཟའ་པ་སངས།
༄༅། །༢༠༠༨ ནས་བཟུང་རྒྱ་ནག་གཞུང་གིས་བོད་ནང་དུ་བོད་མིའི་ཆོས་ཕྱོགས་ཀྱི་དུས་ཆེན་ཁག་དང་ཆབ་སྲིད་ཀྱི་ལས་འགུལ་སྤེལ་བའི་དུས་ཚིགས་གལ་ཆེར་དམིགས་ནས་དམ་བསྒྲགས་བྱེད་ཤུགས་ཆེ་རུ་གཏོང་སྲོལ་ཡོད་པ་ལྟར་འདི་ལོའི་ཕྱི་ཟླ་ ༣ ཚེས་ ༡༠ ཉིན་གཙོ་བོར་དམིགས་ནས་བོད་ནང་དུ་དམ་བསྒྲགས་ཀྱི་ལས་འགུལ་སྤེལ་འགོ་བརྩམས་འདུག དེ་ཡང་ཐེངས་འདིར་རྒྱ་ནག་གཞུང་གིས་བོད་དང་ཡུ་གུར་ནང་ཆོས་དད་རང་དབང་ལ་དམ་བསྒྲགས་ཤུགས་ཆེ་བྱས་པར་རྒྱལ་སྤྱིའི་ཁྱོན་ནས་སྐྱོན་བརྗོད་དང་ཁ་རྡུང་དྲག་པོ་བཏང་བ་སོགས་ལ་བརྟེན་ནས། རྒྱ་ནག་གི་འགྲིམ་འགྲུལ་ལས་ཁང་བརྒྱུད་བོད་ནང་དུ་ཕྱི་ཟླ་ ༡ ཚེས་ ༣༠ ནས་ཕྱི་ཟླ་ ༤ ཚེས་ ༡ བར་ཕྱི་རྒྱལ་ཡུལ་སྐོར་སྤྲོ་འཆམ་པ་སོགས་སུ་གཅིག་ཀྱང་འགྲོ་རྒྱུར་ཆོག་མཆན་སྤྲོད་རྒྱུ་མིན་པའི་གསལ་བསྒྲགས་སྤེལ་འདུག
སྤྱིར་འདི་ལོའི་ཕྱི་ཟླ་ ༣ ཚེས་ ༡༠ ཉིན་དེ་སྔ་ ༡༩༥༩ ཟླ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སར་བོད་མི་སེར་སྐྱ་མང་ཚོགས་རྣམས་ཀྱིས་མ་གྲོས་བསམ་པ་གཅིག་མཐུན་ཐོག་ནས་རྒྱ་ནག་གཞུང་གི་དབང་སྒྱུར་ལ་ཞི་རྒོལ་རྔམ་སྟོན་གྱི་ལས་འགུལ་སྤེལ་ནས་ལོ་ངོ་ ༦༠ འཁོར་བའི་དུས་ཚིགས་ཤིག་ཀྱང་འཁེལ་ཡོད།
ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས།
དེ་ཡང་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་གསུང་དོན། “རྒྱ་ནག་གཞུང་གིས་འགྲིམ་འགྲུལ་ལས་ཁང་བརྒྱུད་ ༢༠༡༩ ཟླ་ ༡ ཚེས་ ༣༠ ནས་ཟླ་བ་ ༤ ཚེས་ ༡ བར་བོད་ནང་དུ་ཕྱི་རྒྱལ་ཡུལ་སྐོར་སྤྲོ་འཆམ་པ་དང་། གཞུང་གི་གནད་ཡོད་མི་སྣ། དེ་བཞིན་གསར་འགོད་པ་བོད་ནང་འགྲོ་མི་ཆོག་པའི་གསལ་བསྒྲགས་སྤེལ་འདུག གསལ་བསྒྲགས་དེའང་རྒྱ་ནག་གཞུང་གིས་ཐད་ཀར་མ་སྤེལ་བར་ཡུལ་སྐོར་སྤྲོ་འཆམ་དང་བོད་ལ་འགྲོ་མཁན་ཚོར་འགྲིམ་འགྲུལ་གྱི་མཐུན་རྐྱེན་གོ་སྒྲིག་ཞུ་མཁན་ལས་ཁུངས་བརྒྱུད་ནས་གསལ་བསྒྲགས་དེ་སྤེལ་འདུག
བྱེད་བབ་དེས་གང་མཚོན་བཞིན་ཡོད་པ་བརྗོད་ན་བོད་དེ་བཞིན་རྒྱ་ནག་གི་དབང་སྒྱུར་འོག་ཞི་བའི་བཅིངས་བཀྲོལ་བཏང་ཡོད་པ་སོགས་དྲིལ་བསྒྲགས་ཧ་ཅང་བྱས་དང་བྱེད་བཞིན་ཡོད་ཀྱང་དོན་དངོས་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་ས་བཙན་བཟུང་བྱས་པ་དེར་བོད་མི་ཚོས་མཐའ་གཅིག་ཏུ་འདོད་བབ་མེད་པའི་རྣམ་འགྱུར་མངོལ་གསལ་ཐོག་རྒྱལ་ས་ལྷ་སར་ཇི་རྒྱ་ཆེ་བའི་ཞི་རྒོལ་རྔམ་སྟོན་ཐེངས་དང་པོ་བྱས་ཡོད། ད་ཆ་ཞི་རྒོལ་རྔམམ་སྟོན་དེ་བྱས་ནས་ལོ་ངོ་ ༦༠ འཁོར་བཞིན་ཡོད་པ་དེར་རྒྱ་ནག་གཞུང་གིས་དམིགས་ནས་དམ་བསྒྲགས་བྱས་པ་ཞིག་རེད།
ཕྱོགས་མཚུངས་ ༢༠༠༨ ཟླ་ ༣ ཚེས་ ༡༠ ཉིན་བོད་ས་ཡོངས་སུ་རྒྱ་ནག་གི་དབང་སྒྱུར་ལ་ཞི་རྒྱ་ཆེ་བའི་ངོ་རྒོལ་རྔམ་སྟོན་བྱས་པའི་དུས་ཚིགས་ཞིག་ཀྱང་འཁེལ་ཡོད། དེར་བརྟེན་རྒྱ་ནག་གཞུང་གིས་རྒྱུ་མཚན་སྣ་ཚོགས་ལ་བསྙད་དེ་ཕྱི་རྒྱལ་གཞུང་འབྲེལ་མི་སྣ་དང་གསར་འགོད་པ། དེ་བཞིན་བྱེས་འཁོད་བོད་མི་གཉེན་འཕྲད་འགྲོ་མཁན་གྱིས་གཙོས་ཡུལ་སྐོར་སྤྲོ་འཆམ་པ་སོགས་ལ་དམ་བསྒྲགས་བཀག་འགོག་བྱེད་བཞིན་ཡོད། དེ་ནི་རྒྱ་ནག་གིས་བོད་དབང་སྒྱུར་བྱས་ནས་ལོ་ངོ་ ༦༠ འཁོར་བཞིན་ཡོད་ཀྱང་བོད་ནང་ད་བར་བརྟན་ལྷིངས་མེད་པ་དང་། བོད་མི་ཚོར་རྒྱ་ནག་གཞུང་གི་དབང་སྒྱུར་འོག་འདོད་བློ་མ་ཁེངས་པ་གསལ་པོར་མཚོན་ཐུབ། རྒྱ་ནག་གཞུང་གིས་བོད་ནང་གི་བོད་མི་ཚོར་འགྲོ་བ་མིའི་ཐབ་ཐང་དང་རང་དབང་། ཆོས་དད་རང་དབང་སོགས་ཡོད་སྐོར་བཤད་པ་ཙམ་མ་ཟད། འཛུགས་སྐྲུན་ལས་གཞི་རྒྱ་ཆེ་སྤེལ་བཞིན་ཡོད་སྐོར་བཤད་པ་དེ་དག་ཁ་ཞེ་མི་མཚུངས་པ་ཞིག་ཡིན་པ་གསལ་འདོན་བྱས་པ་རེད།
བར་ལམ་ནས་རྒྱ་ནག་གཞུང་གིས་བོད་མིའི་ཆོས་ཕྱོགས་ཀྱི་དུས་ཆེན་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་ཉིན་མོ་སོགས་ལ་བོད་མི་ཚོས་བསང་གསོལ་བཏང་བ་དང་མཆོད་མཇལ་འགྲོ་བ་སོགས་རྒྱུན་ལྡན་ཆོས་ཕྱོགས་ཀྱི་བྱེད་སྒོ་ཁག་སྤེལ་རྒྱུར་དམ་བསྒྲགས་ཆེན་པོ་བྱེད་བཞིན་པ་མ་ཟད། བར་ལམ་ནས་རྒྱ་ནག་གཞུང་གིས་ཏང་ཡོན་ལས་བྱེད་ཚོར་དགོན་པར་མཆོད་མཇལ་འགྲོ་རྒྱུས་མཚོན་ཆོས་ཕྱོགས་ཀྱི་བྱེད་སྒོར་ཞུགས་མི་ཆོག་པའི་བཀོད་ཁྱབ་ནན་པོ་བཏང་བ་སོགས་བྱེད་བཞིན་ཡོད། ཉེ་ལམ་བོད་ནང་དུ་བོད་པའི་སློབ་མ་ཚོ་སློབ་གྲྭའི་དགུན་དུས་གུང་སེང་སྐབས་དགོན་པའི་ནང་དགེ་འདུན་པ་ཚོས་བོད་ཡིག་སློབ་ཁྲིད་བྱེད་སྲོལ་ཡོད་པ་དེར་ཡང་རྒྱ་ནག་གཞུང་གིས་དམ་བསྒྲགས་བྱས་ཡོད།
རྒྱུ་མཚན་དེ་དག་ལ་བརྟེན་ནས་ཨ་རིའི་གཞུང་གིས་ཉེ་ལམ་བོད་ནང་རང་དབང་ཐོག་འགྲོ་འོང་ཆོག་པའི་ཁྲིམས་འཆར་ལ་སྲིད་འཛིན་མཆོག་གིས་མཚན་རྟགས་བཀོད་ནས་དངོས་སུ་ཁྲིམས་སུ་གཏན་འབེབས་གནང་ཡོད། ད་ཆ་ཁྲིམས་དེ་ཨ་རིར་ཡོད་པའི་བོད་དོན་རྒྱབ་སྐྱོར་ཚོགས་པ་དང་བོད་རིགས་བཅས་ལྷག་བསམ་ཅན་ཚང་མས་ཨ་རིའི་གཞུང་ལ་ཞུ་སྐུལ་གནང་བ་བརྒྱུད་ཁྲིམས་དེ་དོན་དངོས་ལག་བསྟར་གང་མགྱོགས་ཐུབ་ཐབས་ལ་འབད་འབུངས་གནང་དགོས་པའི་དུས་ལ་བབ་ཡོད།” ཅེས་གསུངས།
