ཕྱི་ལོ་ ༢༠༡༩ ཟླ་ ༢ ཚེས་ ༢༡ རེས་གཟའ་ཕུར་བུ།

༄༅། །འདི་གའི་ཆེད་གཉེར་གསར་འགོད་པ་སྐལ་བཟང་བདེ་སྐྱིད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༢ ཚེས་ ༢༠ རེས་གཟའ་ལྷག་པ་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་སམ་བྷོ་ཊ་གཏན་སློབ་ཏུ་འཚམས་གཟིགས་གནང་ཡོད།  

དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༤།༤༥ ཙམ་ལ་སློབ་གྲྭའི་དགེ་ལས་སློབ་ཕྲུག་ཁྱོན་ ༢༤༠ ཙམ་ཚང་འཛོམས་ཐོག་སློབ་གྲྭའི་སློབ་སྤྱི་བསོད་ནམས་དཔལ་སྐྱིད་ལགས་ཀྱིས་ཕེབས་བསུའི་གསུང་བཤད་གནང་གྲུབ་མཚམས་སློབ་གྲྭའི་ལོ་འཁོར་ལས་བསྡོམས་སྙིང་བསྡུས་ཤིག་སྙན་སྒྲོན་གནང་ཡོད། དེ་རྗེས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། སློབ་ཕྲུག་དང་ལྷན་དུ་སླར་ཡང་ཐུག་འཕྲད་བྱུང་བར་རང་ཉིད་ཧ་ཅང་དགའ་པོ་བྱུང་། དེ་རིང་འདིར་ཡོང་དགོས་དོན་གཙོ་བོ་ནི། སང་ཉིན་ས་སྐྱ་བོད་མིའི་གཞིས་ཆགས་སྤུ་རུ་ཝ་ལ་དེ་བཞིན་གསར་འཛུགས་གནང་ནས་ལོ་ངོ་ ༥༠ ཧྲིལ་པོ་འཁོར་བའི་རྗེས་དྲན་གྱི་མཛད་སྒོར་བཅར་བའི་ཆེད་ཡིན་ཞེས་གསུང་བ་མ་ཟད། སློབ་ཕྲུག་རྣམས་ལ་སློབ་སྦྱོང་གི་གལ་གནད་སྐོར་དང་། སློབ་སྦྱོང་དང་ལས་དོན་གང་འདྲ་ཞིག་བྱེད་རུང་དཀའ་ལས་བརྒྱག་དགོས་པའི་སྐོར། དོ་དབྱིངས་དང་འདུན་པ་ཆེན་པོའི་སྒོ་ནས་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་རྗེས་དགེ་ལས་སློབ་ཕྲུག་ཁག་གཅིག་གི་དྲི་བར་ལན་འདེབས་གནང་གྲུབ་མཚམས་དགེ་ལས་སློབ་ཕྲུག་ལྷན་དུ་སྐུ་པར་བསྒྲོན། 

དེ་ནས་ཕྱེད་ཡོལ་ ༦།༣༠ ཐོག་སྲིད་སྐྱོང་མཆོག་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་ཆེད་ཕེབས་ཀྱིས་མི་མང་ཚོགས་ཁང་དུ་མི་མང་རྣམས་ལ་དེ་སྔོན་ལྷོ་ཨ་ཕི་རི་ཀར་གཞུང་འབྲེལ་ཕྱོགས་ཕེབས་སྐབས་ཡུལ་དེའི་ནང་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་ཨིན་ཀ་ཏ་རང་དབང་ཚོགས་པའི་Inkatha Freedom Party ཚོགས་མི་རྣམས་དང་མཇལ་འཕྲད་གནང་བའི་སྐོར་དང་། ཊོ་རོན་ཊོའི་མཐོ་སློབ་ཏུ་གསུང་བཤད་གནང་སྐབས་རྒྱ་རིགས་སློབ་ཕྲུག་ཁག་གཅིག་གིས་ངོ་རྒོལ་བྱས་པའི་སྐོར་གསུང་།

ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ལྷོ་ཨ་ཕི་རི་ཀའི་གྲོང་ཁྱེར་ཀེབ་ཊོན་ Cape Town ནང་རྟེན་གཞི་བྱས་པའི་སི་ཊེ་ལེན་བྷོཤི་མཐོ་སློབ་ Stellenbosch University ཏུ་སྐར་མ་ ༣༠ རིང་ཡུལ་དེའི་གཞི་རྩའི་བཟང་པོའི་རིན་ཐང་གི་གལ་གནད་དང་། ད་ལྟའི་བོད་ནང་གི་ཛ་དྲག་གི་གནས་སྟངས་སྐོར་གསུང་བཤད་གནང་ཡོད་སྐོར་དང་། དེ་བཞིན་ཁྲིམས་ལུགས་རིག་པའི་སློབ་ཕྲུག་རྣམས་ལ་གསུང་བཤད་དང་དྲི་བ་ཁག་ལ་ལན་འདེབས་གནང་སྐབས་ཚོགས་ཁང་གི་ཕྱི་རོལ་དུ་རྒྱ་ནག་གཞུང་ཚབ་ཁང་གི་གོ་སྒྲིག་འོག་རྒྱ་རིགས་སློབ་ཕྲུག་དང་མཐོ་སློབ་དེའི་ཁུང་ཙི་སློབ་གཉེར་བསྟི་གནས་ཁང་ Confucius གི་སློབ་ཕྲུག རྒྱ་གཞུང་གིས་གླ་རྔན་སྤྲད་པའི་ཡུལ་མི་གཞོན་སྐྱེས་བཅས་ཀྱིས་ལག་ཏུ་རྒྱ་ནག་གཅིག་གི་སྲིད་བྱུས་དང་། ཁ་བྲལ་གྱི་ལས་འགུལ་མཚམས་འཇོག་དགོས་ཞེས་པ་སོགས་འཁོད་པའི་འཕྲེད་དར་འཁྱེར་ནས་ངོ་རྒོལ་སྐད་འབོད་ཤུགས་ཆེན་བྱས་པ་སོགས་ཀྱི་སྐོར་གསུང་།

དེ་རྗེས་དཔལ་ལྡན་སྲིད་སྐྱོང་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ད་བར་བོད་ཀྱི་གནད་དོན་དང་། བོད་མི་རྣམས་ལ་ཕྱོགས་ཡོངས་ནས་རྒྱབ་སྐྱོར་ཤུགས་ཆེ་ཐོབ་བཞིན་པའི་སྐོར། ཕྱི་རྒྱལ་ཡུལ་གྲུ་ཁག་ཏུ་གཞུང་འབྲེལ་ཕྱོགས་ཕེབས་གནང་བའི་དམིགས་ཡུལ་གཙོ་བོ་ནི། མ་འོངས་པར་སྲིད་སྐྱོང་སུ་འདྲ་ཞིག་ཕེབས་རུང་དེར་ཕེབས་ལམ་བདེ་པོ་བཟོ་བའི་ཕྱིར་དང་། སྤྱིར་ཕྱི་རྒྱལ་དུ་འགྲོ་ཁག་པོ་ཡོད་རུང་། ཕྱི་རྒྱལ་དུ་ཕྱིན་ནས་ཕྱི་རྒྱལ་ཡུལ་མི་རྣམས་ལ་བོད་དོན་གོ་རྟོག་དང་བོད་དོན་དྲིལ་བསྒྲགས་སྤེལ་རྒྱུ་གལ་ཆེན་པོ་ཡིན། ཞེས་དང་།

གཞན་ཡང་ཕྱི་ལོ ༢༠༡༨ ལོར་བོད་མི་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་འཕགས་པའི་ཡུལ་དུ་བཙན་བྱོལ་ལ་༸ཞབས་སོར་འཁོད་ནས་མི་ལོ་ ༦༠ འཁོར་བའི་དུས་དྲན་དང་བསྟུན་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལོ་སྲུང་བརྩི་ཟབ་རྒྱས་ཞུས་པའི་སྐོར་དང་། དེ་བཞིན་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ལེགས་པར་གྲུབ་ཡོད་པ་སོགས་ཀྱི་སྐོར་གསུང་བཤད་གནང་།
མཐར་དཔལ་ལྡན་སྲིད་སྐྱོང་མཆོག་གིས་བོད་མི་ནང་ཁུལ་མཐུན་སྒྲིལ་བྱེད་དགོས་རྒྱུ་ཧ་ཅང་གལ་ཆེན་པོ་ཡིན་པ་ནན་ཏན་གྱིས་འབོད་སྐུལ་གནང་ཡོད་པ་བཅས། །