ཕྱི་ལོ་ ༢༠༡༩ ཟླ་ ༢ ཚེས་ ༢༡ རེས་གཟའ་ཕུར་བུ།
༄༅། །འདི་གའི་ཆེད་གཉེར་གསར་འགོད་པ་སྐལ་བཟང་བདེ་སྐྱིད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༢ ཚེས་ ༢༠ རེས་གཟའ་ལྷག་པ་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱ་གར་བྱང་ཕྱོགས་སྤོན་ཊར་རྟེན་གཞི་བྱས་པའི་སོའི་སྨན་དཔྱད་མཐོ་སློབ་ཁང་དུ་ཕེབས་ཏེ་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣ ཐོག་སོའི་གཙུག་ལག་སློབ་གཉེར་ཁང་གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དབུ་བཞུགས་ཐོག གཙུག་ལག་སློབ་གཉེར་ཁང་གི་སློབ་སྤྱི་རཱ་ཇན་གུཔྟཱ་ Rajan Gupta ལགས་དང་། མཐོ་སློབ་གྱི་ངེས་སྟོན་པ་སྐུ་ཞབས་གོ་རབ་གུཔྟཱ་ Gaurav Gupta ལགས། དེ་བཞིན་སྤོན་ཊ་ཆོལ་གསུམ་བོད་མིའི་གཞིས་ཆགས་ཀྱི་ས་གནས་འགོ་འཛིན་དགེ་ལེགས་འཇམ་དབྱངས་ལགས་ཀྱིས་གཙོས་ཁུལ་དེར་བོད་མིའི་ས་གནས་ཀྱི་འབྲེལ་ཡོད་ལས་བྱེད་དང་། མཐོ་སློབ་དེ་ཉིད་ཀྱི་དགེ་ལས་སློབ་ཕྲུག་ཁྱོན་མི་གྲངས་ ༡༠༠ ལྷག་ཙམ་ཚང་འཛོམས་ཀྱིས་ཐོག་མར་སློབ་ཕྲུག་ནནྡི་ནི་ Nandini ལགས་ཀྱིས་ཕེབས་བསུའི་གསུང་བཤད་དང་སྦྲགས། དཔལ་ལྡན་སྲིད་སྐྱོང་མཆོག་གི་མི་ཚེའི་ལོ་རྒྱུས་སྙིང་བསྡུས་ཤིག་ངོ་སྤྲོད་ཞུས།
དེ་ནས་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་སྦྲགས་གསུང་དོན། ང་རང་མཐོ་སློབ་འདིར་མགྲོན་འབོད་གནང་བར་སྙིང་ཁོངས་རུས་པའི་གཏིང་ནས་ཐུགས་རྗེ་ཆེ་ཞུ་རྒྱུ་ཡིན། དེ་རིང་འདིར་སོའི་སྨན་དཔྱད་མཐོ་སློབ་ཁང་དུ་གཏམ་བཤད་ཞུ་རྒྱུ་ཐེངས་དང་པོ་ཆགས་ཡོད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྒྱུན་མགོན་པོ་གང་ཉིད་མཆོག་རྒྱ་གར་གྱི་བུ་ཕྲུག་ཡིན་ཞེས་བཀའ་སློབ་ཕེབས་ཀྱི་ཡོད། ཕྱོགས་མཚུངས་ང་ཚོས་ཀྱང་རྒྱ་གར་གྱི་བྱིས་པ་ཡིན་ཞེས་དགའ་སྤོབས་ངང་ནས་ངོས་འཛིན་བྱེད་བཞིན་ཡོད།
རྒྱ་གར་གཞུང་མང་གཉིས་ནས་ད་བར་བོད་དོན་དང་བོད་མིའི་སླད་མཐུན་འགྱུར་རོགས་རམ་དང་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུ་རྒྱུ་ཡིན། དམིགས་བསལ་ཧི་མཱ་ཅལ་མངའ་སྡེ་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུ་ཡིན། ཧི་མཱ་ཅལ་མངའ་སྡེ་འདི་བཞིན་བོད་མིའི་བླ་ན་མེད་པའི་དབུ་ཁྲི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་གནས་ཡིན་པ་དང་། བོད་མིའི་སྒྲིག་འཛུགས་ཀྱི་ལས་ཁུངས་ལྟེ་བ་དེ་བཞིན་འདིར་ཆགས་ཡོད། ཅེས་དང་།
གཞན་ཡང་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་རྣམས་ལ་བོད་མིའི་སྒྲིག་འཛུགས་ཀྱི་ལྷན་ཁང་ཁག་རེ་རེ་བཞིན་ངོ་སྤྲོད་དང་། སློབ་སྦྱོང་དང་ལས་དོན་གང་འདྲ་ཞིག་བྱེད་རུང་དཀའ་ལས་བརྒྱག་རྒྱུ་དང་། དོ་དབྱིངས་དང་འདུན་པ་ཆེན་པོའི་སྒོ་ནས་བྱ་རྒྱུ་ཧ་ཅང་གལ་ཆེན་པོ་རེད། དཀའ་ངལ་ལ་མ་འཛེམས་པར་བརྩོན་འགྲུས་བྱེད་ཐུབ་ན་མི་ཚེ་ལམ་ལྷོངས་དང་དོན་དང་ལྡན་པ་ཞིག་ཡོང་གི་རེད། ད་ལྟ་རྣམ་པ་ཚོ་སློབ་སྦྱོང་གནང་བཞིན་པའི་ (Dental Course) དེ་བཞིན་སོ་སོ་རང་ཉིད་ཙམ་ལ་གལ་ཆེན་པོ་ཡིན་པ་མ་ཟད། ཕྱིས་སུ་མི་མང་དང་། རྒྱལ་ཁབ་ཆེད་ཞབས་འདེགས་ཞུ་རྒྱུ་ཡོད། དེ་ནི་ཧ་ཅང་ཡག་པོ་རེད། མ་འོངས་པར་རྣམ་པ་ཚོ་སློབ་སྦྱོང་གང་ལེགས་མཐར་སོན་པ་དང་། མི་ཚེ་དེ་བཞིན་ལམ་ལྷོངས་ལྡན་པར་ཡོང་རྒྱུའི་སྨོན་ལམ་ཡོད། ཅེས་སོགས་ཀྱི་གསུང་བཤད་གནང་རྗེས་དཔལ་ལྡན་སྲིད་སྐྱོང་མཆོག་གིས་རང་ཉིད་རྒྱ་གར་བྱང་ཤར་ས་ཁུལ་ནས་ཁྱིམ་ཚང་ཉམ་ཆུང་ཞིག་གི་བུ་ཡིན་པ་དང་། དེ་རྗེས་རིམ་བཞིན་སློབ་སྦྱོང་ཐོག་དཀའ་ལས་བརྒྱབ་ནས་ད་ལྟ་བོད་མིའི་སྒྲིག་འཛུགས་ཀྱི་སྲིད་སྐྱོང་ཆགས་ཐུབ་ཡོད་སྐོར་སོགས་ཀྱི་གསུང་བཤད་གནང་རྗེས་སློབ་ཕྲུག་རྣམས་ཀྱི་དྲི་བར་ལན་འདེབས་ཞིབ་རྒྱས་གནང་ཡོད།
དེ་ནས་དཔལ་ལྡན་སྲིད་སྐྱོང་མཆོག་གིས་མཐོ་སློབ་ཀྱི་སློབ་སྤྱིས་གཙོས་ངེས་སྟོན་པ་རྣམ་གཉིས་ལ་དཀར་གཙང་གི་མཇལ་དར་དང་དྲན་རྟེན་གྱི་ཕྱག་རྟགས་ཤིག་གནང་སྟེ་ལས་རིམ་རྒྱལ་ཁའི་ངང་ནས་གྲོལ་ཡོད་པ་བཅས། །
