ཕྱི་ལོ་ ༢༠༡༩ ཟླ་ ༢ ཚེས་ ༡༦ རེས་གཟའ་སྤེན་པ།
༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ཨ་རིའི་གཞུང་འབྲེལ་ཕྱོགས་ཕེབས་དང་བསྟུན། ཨ་རིའི་རྒྱལ་ས་ Connecticut དུ་རྟེན་གཞི་བྱས་པའི་ཡེལ་ཆབ་སྲིད་ཚོགས་པས་ Yale Political Union མགྲོན་འབོད་ལྟར། ཕྱི་ལོ་ ༢༠༡༩ ཟླ་ ༢ ཚེས་ ༡༤ རེས་གཟའ་ཕུར་བུའི་ཉིན་པར་སན་མཐོ་སློབ་ Pierson College ཏུ་བོད་ཀྱི་རིག་གཞུང་དང་ཁོར་ཡུག ས་བབ་ཆབ་སྲིད་ཀྱི་གནད་སྐོར་གཏམ་བཤད་རྒྱ་ཆེ་སྤེལ་འདུག
གླིང་ཆེན་ཨེ་ཤི་ཡ་ནི་འཛམ་གླིང་གི་མི་འབོར་ཕྱེད་ཀ་ལྷག་ཙམ་གྱི་སྡོད་གནས་ཡིན་ཞིང་། རྒྱལ་ཁབ་མང་པོ་ཞིག་གི་འཐུང་ཆུའི་ཐོན་ཁུངས་གཙོ་བོ་དེ་བོད་ཀྱི་འཁྱགས་རོམ་དེ་དག་ཡིན་པ་དང་། ལྷག་པར་བོད་ནི་འཛམ་གླིང་གི་སྣེ་མོ་གསུམ་པ་ཡིན་ཞིང་། སྣེ་གཉིས་ཕུད་འཛམ་གླིང་ནང་འཁྱགས་རོམ་ཞུ་བའི་འཐུང་ཆུ་ཕོན་ཆེ་ཤོས་སྐྲུན་མཁན་བོད་ཆགས་ཡོད། ཨེ་ཤི་ཡའི་ནང་ལ་བོད་ཀྱི་འཁྱགས་རོམ་དེ་དག་ཞུ་བའི་གངས་ཆུ་དེ་དག་གཤམ་འོག་རྒྱལ་ཁབ་ཀྱི་མི་གྲངས་ཐེར་འབུམ་གཅིག་དང་ཕྱེད་ཀའི་འཚོ་རྟེན་དུ་གྱུར་ཡོད།
གཞན་ཡང་ཁོར་ཡུག་གི་ཐོག་ནས་བོད་དེ་བཞིན་ཧ་ཅང་གལ་ཆེན་པོ་ཡིན་པ་དང་། ད་ཆ་ཨེ་ཤི་ཡའི་ས་ཁུལ་དུ་འཐུང་ཆུའི་དཀའ་ངལ་ཇེ་ཆེ་འགྲོ་བཞིན་པའི་སྐབས་དང་བསྟུན་རྒྱལ་ཁབ་སོ་སོས་ཆུའི་སྲུང་སྐྱོབ་ལས་གཞི་རྒྱ་ཆེ་རུ་གཏོང་དགོས་པའི་དུས་ལ་བབ་ཡོད་པ་དང་། རྒྱ་ནག་ལ་མཚོན་ན་ད་ཆ་ཨེ་ཤི་ཡའི་ཆུ་མཛོད་བདག་སྲུང་བྱེད་མཁན་ཆགས་ཡོད། ལྷག་པར་སེམས་འཚབ་སྐྱེ་གཞི་ནི་རྒྱ་ནག་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆུའི་གན་རྒྱའི་ཡིག་ཆའི་སྟེང་མིང་རྟགས་བཀོད་མེད། གོ་ལའི་ཚ་དྲོད་རྒྱས་བཞིན་པའི་ཐོག་རྒྱ་ནག་གཞུང་གིས་བོད་ནང་གཏེར་ཁ་གང་བྱུང་སྔོག་འདོན་བྱས་པ་སོགས་ཁོར་ཡུག་ལ་བསམ་ཤེས་རྩ་བ་ནས་མེད་པའི་བྱ་སྤྱོད་དེ་དག་ལ་བརྟེན་ནས་བོད་མཐོ་སྒང་གི་འཁྱགས་རོམ་མགྱོགས་མྱུར་འབྲི་བཞིན་ཡོད་པ་གསུངས།
གཞན་ཡང་དེ་སྔོན་ Ivy Leaque ཞེས་པའི་ལྷན་ཚོགས་སུ་བོད་ཀྱི་ས་བབ་ཆགས་ཚུལ་དེ་བཞིན་ཇི་ལྟར་གལ་གནད་ཆེན་པོ་ཡིན་སྐོར་སོགས་གསུང་ཡོད། སྲིད་སྐྱོང་མཆོག་གིས་བོད་ནི་ལོ་རྒྱུས་ཐོག་རང་བཙན་གཙང་མའི་རྒྱལ་ཁབ་ཞིག་ཡིན་པའི་དཔང་རྟགས་སུ་དེ་སྔ་ ༨༢༡ ལོར་བོད་རྒྱའི་དབར་ཆིངས་ཡིག་བཞག་པ་ལྷ་སའི་ཇོ་ཁང་མདུན་གྱི་རྡོ་རིང་སྟེང་གསལ་པོར་བཀོད་པ་དེ་དག་དུས་ད་ལྟའང་མཇལ་རྒྱུ་ཡོད་པ་དང་། དེ་སྔ་བོད་རང་བཙན་ཡིན་སྐབས་ཨེ་ཤི་ཡའི་སྟོབས་ཆེན་རྒྱལ་ཁབ་རྒྱ་དཀར་ནག་གཉིས་ཀྱི་བར་གནས་ཤིག་ཡིན་པར་བརྟེན། སྟོབས་ཆེན་རྒྱལ་ཁབ་གཉིས་ཐད་ཀར་གདོང་ཐུག་མི་ཡོང་བར་ཕན་ཐོགས་ཡོད་པ་དང་། གཞན་ཡང་སྲིད་སྐྱོང་མཆོག་གིས་བོད་ཀྱི་ཆོས་དང་རིག་གཞུང་། སྐད་ཡིག་དང་བཅས་པའི་གལ་གནད་སྐོར་ངོ་སྤྲོད་གནང་།
ད་ལྟ་རྒྱ་ནག་གཞུང་གིས་བོད་ནང་བོད་ཀྱི་སྐད་ཡིག་ལ་དམ་བསྒྲགས་ཧ་ཅང་བྱས་ཏེ་མཐར་བོད་ཀྱི་སྐད་དང་ཡི་གེ་རྩ་གཏོར་གཏོང་རྒྱུའི་སྲིད་བྱུས་ལག་བསྟར་བྱེད་བཞིན་པ་དང་། བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ལ་མཚོན་ན་རྒྱ་གཞུང་གིས་བོད་མིའི་ཐོག་འཛིན་པའི་དྲག་གནོན་གྱི་སྲིད་བྱུས་ལ་ཞི་རྒོལ་རྔམ་སྟོན་ཆེད། ཕྱི་ལོ་ ༢༠༠༩ ནས་ད་བར་གཞིས་ལུས་བོད་མི་ ༡༥༣ གྱིས་རང་ལུས་མེར་སྲེག་གནང་ཡོད་སྐོར་སོགས་ཀྱི་གསུང་བཤད་གནང་གྲུབ་མཚམས་མང་ཚོགས་ཀྱི་དྲི་བར་ལན་འདེབས་གནང་ཡོད་པ་བཅས། །
