༢༠༡༩ ཟླ་ ༢ ཚེས་ ༡ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཉི་ཧོང་ནང་གི་གཞུང་འབྲེལ་ལས་དོན་རྣམས་ཡོངས་སུ་ལེགས་གྲུབ་རྗེས་རྒྱ་གར་རྒྱལ་ས་ལྡི་ལིར་ཕེབས་འབྱོར་བྱུང་མཚམས།  རྒྱ་གར་གྱི་བདེ་སྲུང་བློན་ཆེན་ཟུར་པ་སྐུ་གཤེགས་ཇོར་ཇི་ཕར་ནན་ཌེ་སི་George Fernandes མཆོག་གི་དུར་འཇུག་མཛད་སྒོའི་ཐོག་ཕེབས་ནས་ཤུལ་ལུས་ནང་མི་སྤུན་མཆེད་རྣམས་ལ་སེམས་གསོ་གནང་འདུག དམ་པ་ཁོང་ལ་མངའ་གཞུང་གིས་ཆེ་མཐོང་རྒྱ་ཆེ་ཞུས་འདུག 

དེ་ཡང་མཛད་སྒོའི་ཐོག་དཔལ་ལྡན་སྲིད་སྐྱོང་མཆོག་གིས་ཞིང་གཤེགས་ཀྱི་སྐུ་ཟླ་ལྕམ་སྐུ་ལེ་ལ་ཀ་བྷིར་ Smt. Leila Kabir ལགས་དང་སྲས་ཤིཡན་ཕར་ནན་ཌེ་སི་Sean Fernandes ལགས་དང་ཐུག་འཕྲད་གནང་སྟེ།  བོད་མི་སྤྱི་དང་ལྷག་པར་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ཁོང་རྣམས་ལ་གདུང་སེམས་མཉམ་སྐྱེ་ཞུས་པ་དང་སྦྲགས། དམ་པ་དེ་ཉིད་སྐུ་འཚོ་བཞུགས་རིང་བོད་མི་དང་བོད་དོན་ཐོག་སྐུ་ཚེ་ཧྲིལ་པོའི་རིང་རྒྱབ་སྐྱོར་གནང་བའི་སྐོར་རྗེས་དྲན་ཞུས་འདུག  མཛད་སྒོ་དེར་བྷི་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏཱིཤ་ཀུ་མཱར་མཆོག་གིས་གཙོས་རྒྱ་གར་གྱི་དཔོན་རིགས་མང་དག་ཅིག་ཕེབས་འདུག  

གཞན་ཡང་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། བཀའ་ཟུར་རྒྱ་རི་སྒྲོལ་མ་མཆོག  ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག  ལྡི་ལི་སྐུ་ཚབ་དོན་ཁང་གི་དྲུང་ཆེ་ཚེ་རིང་དོན་གྲུབ་ལགས་དང་། ལྡི་ལི་བོད་སྒར་བསམ་ཡས་གླིང་གི་སྐུ་ཚབ་སོགས་ཕེབས་འདུག །