ཕྱི་ལོ་ ༢༠༡༩ ཟླ་ ༢ ཚེས་ ༢༦ རེས་གཟའ་མིག་དམར། 

༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་འདོད་རྒུ་གླིང་རྩེད་འགྲན་ཚོགས་པས་གོ་སྒྲིག་དང་། ཏཱ་ལའི་བླ་མའི་ཐེབས་རྩ་ཁང་གིས་མཐུན་འགྱུར་གནང་སྟེ་ཕྱི་ལོ་ ༢༠༡༩  ཟླ་ ༢ ཚེས་ ༡༩ ནས་ ༢༤ བར་ཉིན་གྲངས་དྲུག་རིང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་ཐེངས་གཉིས་པའི་གློ་ནད་ཊི་བྷི་ནད་གཞི་སྔོན་འགོག་ཆེད་སིལ་སྤོལ་རྩེད་འགྲན་ཞིག་ཚོགས་ཡོད།

དེ་ཡང་གོང་ཚེས་ཉིན་གྱི་མཇུག་སྡོམ་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཆེད་ཕེབས་ཀྱིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གློ་ནད་ཊི་བྷི་ནད་གཞི་སྔོན་འགོག་ཆེད་ཟབ་སྦྱོང་དང་ལས་འགུལ་འདྲ་མིན་གོ་སྒྲིག་གནང་དང་གནང་བཞིན་པའི་སྐོར་སོགས་ཀྱི་གསུང་བཤད་གནང་རྗེས་ཉིན་མཐའ་མའི་རྩེད་འགྲན་དེ་བཞིན་འགོ་བཙུགས་གནང་། སིལ་སྤོལ་རྩེད་འགྲན་ཉིན་མཐའ་མའི་སྐབས་བདེ་སྐྱིད་སླར་གསོ་དང་ལུགས་ཟུང་བསམ་གྲུབ་གླིང་རུ་ཁག་གཉིས་དབར་རྩེད་འགྲན་གནང་སྟེ་ལུགས་ཟུང་བསམ་གྲུབ་གླིང་རུ་ཁག་ལ་རྒྱལ་ཁ་ཐོབ་ཡོད།

ཐེངས་འདིར་གློ་ནད་ཊི་བྷི་ནད་གཞི་སྔོན་འགོག་ཆེད་སིལ་སྤོལ་རྩེད་འགྲན་དུ་བོད་མིའི་གཞིས་ཆགས་ཁག་འདྲ་མིན་ནས་རུ་ཁག་བརྒྱད་བཅས་མཉམ་ཞུགས་གནང་ཡོད་པ་བཅས། །