ཕྱི་ལོ་ ༢༠༡༠༩ ཟླ་ ༡ ཚེས་ ༢༥ རེས་གཟའ་པ་སངས།
༄༅། །འདི་གར་ཕྱི་དྲིལ་དབུ་མའི་ལམ་ལས་འཆར་ཚན་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡ ཚེས་ ༢༣ དང་ ༢༤ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་ཀྱི་ཕྱི་དྲིལ་དབུ་མའི་ལམ་ལས་འཆར་ཚན་པས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ Delhi Youth Hostel དུ་ལྡི་ལི་མཐོ་སློབ་ཀྱི་བོད་པའི་སློབ་ཕྲུག་རྣམས་ལ་གཉིས་སྨན་དབུ་མའི་ལམ་གྱི་སྲིད་བྱུས་གོ་རྟོགས་དང་འབྲེལ་བའི་ཟབ་སྦྱོང་ཞིག་གོ་སྒྲིག་གནང་ཡོད།
དེ་ཡང་ཐེངས་འདིའི་ཟབ་སྦྱོང་ནང་སློབ་ཕྲུག་བུ་མོ་གྲངས་ ༤ དང་བུ་གྲངས་ ༡༡ བཅས་ཁྱོན་སློབ་ཕྲུག་གྲངས་ ༡༥ ཙམ་མཉམ་ཞུགས་གནང་ཡོད། སྐབས་དེར་ཟབ་ཁྲིད་གནང་མཁན་ཕྱི་དྲིལ་ལས་བྱེད་མཁའ་འགྲོ་སྒྲོལ་མ་ལགས་དང་། འབྲུག་ལྡན་སྐྱིད་ལགས། དེ་བཞིན་ཚེ་རིང་མཆོག་ལེགས་ལགས་བཅས་ཡིན་འདུག
ཕྱི་ཚེས་ ༢༤ ཉིན་གྱི་ཕྱེད་ཡོལ་ཆུ་ཚོད་ ༡:༣༠ ཐོག་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་ཟབ་སྦྱོང་བ་རྣམས་ལ་དབུ་མའི་ལམ་གྱི་ངོ་སྤྲོད་དང་། ཟབ་སྦྱོང་བ་རྣམས་ཀྱི་དོགས་འདྲི་ཁག་ལ་ལན་འདེབས་གསལ་བཤད་གནང་ཡོད།
སྤྱིར་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་དགོས་པའི་དམིགས་ཡུལ་གཙོ་བོ་ནི། སློབ་ཕྲུག་གཞོན་སྐྱེས་རྣམས་ལ་དབུ་མའི་ལམ་གྱི་སྲིད་བྱུས་ཀྱི་གོ་དོན་དང་། བྱུང་རིམ། གྲུབ་འབྲས་བཅས་ཀྱི་ཐོག་གོ་རྟོགས་སྤེལ་ཆེད་ཡིན་འདུག་པ་བཅས། །
