ཕྱི་ལོ་ ༢༠༡༩ ཟླ་ ༡ ཚེས་ ༣༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༡ ཚེས་ ༢༩ ཉིན་རྒྱ་གར་གྱི་བདེ་སྲུང་བློན་ཆེན་ཟུར་པ་དང་བོད་དོན་ཐོག་ཁ་ཞེ་གཉིས་མེད་ཀྱི་སྒོ་ནས་རྒྱབ་སྐྱོར་གནང་མཁན་སྐུ་ཞབས་འཇོར་ཇི་ཧྥར་ནན་ཌེ་སི་ George Fernandes མཆོག་དགུང་གྲངས་ ༨༨ ཐོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་དམ་པ་དེ་ཉིད་ཀྱི་ཆེད་དུ་དེ་རིང་སྟེ་ཕྱི་ལོ་ ༢༠༡༩ ཟླ་ ༡ ཚེས་ ༣༠ ཉིན་གྱི་ཕྱེད་ཡོལ་ཆུ་ཚོད་ ༢ ཐོག་གངས་སྐྱིད་ཚོགས་ཁང་གསར་པའི་ནང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གསུང་བཤད་གནང་དོན།
རྒྱ་གར་གྱི་བདེ་སྲུང་བློན་ཆེན་ཟུར་པ་དང་། བོད་དང་བོད་མིའི་འགྲན་ཟླ་བྲལ་བའི་གྲོགས་པོ་སྐུ་ཞབས་འཇོར་ཇི་ཧྥར་ནན་ཌེ་སི་མཆོག་ཕྱི་ལོ་ ༢༠༡༩ ཟླ་ ༡ ཚེས་ ༢༩ ཉིན་གྱི་སྔ་དྲོར་དགུང་གྲངས་ ༨༨ ཐོག་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པར། དེ་རིང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། སྲི་ཞུའི་ལས་བྱེད་ཆེ་ཕྲ་ལྷན་འཛོམས་ཀྱིས་སྨོན་ལམ་འདིའི་ཐོག་མར་གུས་ནས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་སྐུ་གཤེགས་འཇོར་ཇི་ཧྥར་ནན་ཌེ་སི་དམ་པ་དེ་ཉིད་ཀྱི་མཛད་བཟང་རྣམས་དྲན་བཞིན་པའི་ངང་ནས་མྱ་ངན་གུས་འདུད་ཞུ་རྒྱུ་ཡིན། དེ་བཞིན་སྐུ་གཤེགས་དམ་པ་དེའི་རྗེས་ཤུལ་ནང་མི་སྐུ་ཟླ་ལའི་ལ་ཀ་སྦིར་ལགས་དང་། སྲས་སཱི་ཨན་ཧྥར་ནན་ཌེ་སི་ལགས་རྣམ་གཉིས་ཀྱིས་གཙོས་སྐུ་མཆེད་དང་། གཉེན་ཚན་ཉེ་འཁོར་ལྟོས་བཅས། རྗེས་འཇུག་དགའ་ཉེ་བློ་དཀར་ཡོངས་ལ་ཕྲན་ནས་བོད་མིའི་སྒྲིག་འཛུགས་དང་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་ཐུགས་གསོ་གཏིང་ཟབ་ཞུ་བཞིན་ཡོད།
སྐུ་གཤེགས་དམ་པ་ཁོང་ལོ་མང་གོང་ནས་དྲན་ཚོར་ཉམས་པའི་བསྙུན་གཞི་བཅོས་ཐབས་དཀའ་བ་ཞིག་གིས་ཟིན་ཏེ་ཉེ་ཆར་སྤྱིར་བཏང་ཆམ་རིམས་ཤིག་གིས་རྐྱེན་བྱས་ཏེ་དགོངས་པ་རྫོགས་ཡོད་འདུག་པ་དང་། སྐུ་ཕུང་ཞུགས་འབུལ་སོགས་ཀྱི་བྱེད་སྒོ་ཁག་རིམ་པས་གནང་འཆར་ཡིན་འདུག་ན། ང་ཚོ་ངོས་ནས་སྨོན་ལམ་གསུང་འདོན་དང་ལྷན་དམ་པ་དེ་ཉིད་བར་དོའི་འཇིགས་འཕྲང་ལས་གྲོལ་ཏེ་དལ་རྟེན་རིམ་བརྒྱུད་ཐར་པ་དང་ཐམས་ཅད་མཁྱེན་པའི་གོ་འཕང་མྱུར་དུ་འཐོབ་པའི་ཐུགས་སྨོན་མཚམས་སྦྱོར་ངེས་པར་གནང་རོགས་གནང་ཞུ་རྒྱུ་ཡིན། ཞེས་དང་། དེ་རྗེས་ཆོས་རིག་བཀའ་བློན་མཆོག་གིས་ དམ་པ་དེ་ཉིད་ཀྱི་སྐུ་ཚེའི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་དོན།
སྐུ་ཞབས་འཇོར་ཇི་ཧྥར་ནན་ཌེ་སི་མཆོག་ནི། ཕྱི་ལོ་ ༡༩༣༠ ཟླ་ ༦ ཚེས་ ༣ ཉིན་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ནང་ཕ་ཇོ་རན་ཇོ་སེབ་ཧྥར་ནན་ཌེ་སི་ལགས་དང་མ་ཨ་ལི་སེ་མཱར་ཐ་ལགས་གཉིས་ཀྱི་སྲས་སུ་འཁྲུངས། བུ་སྤུན་དྲུག་བྱུང་བའི་ནང་ནས་དམ་པ་དེ་ཉིད་བགྲེས་ཤོས་དེ་རེད་འདུག ཕྱི་ལོ་ ༡༩༤༩ ལོར་སྦོམ་བྷེ་གནས་སྤོས་ཀྱིས་སྤྱི་ཚོགས་རིང་ལུགས་ཀྱི་ཚོང་དོན་སྐྱིད་སྡུག་ཚོགས་པའི་ལས་འགུལ་ནང་འཛུལ་ཞུགས་གནང་སྟེ། རིམ་པས་ཚོགས་པ་དེའི་འགོ་ཁྲིད་གྲས་སུ་ཕེབས་ཡོད། ཕྱི་ལོ་ ༡༩༦༧ ལོར་སྦོམ་བྷེ་ནས་གྲོས་ཚོགས་འོག་མའི་འཐུས་མིར་ཐོག་མར་འདེམས་ཐོན་བྱུང་ཞིང་། ཕྱི་ལོ་ ༡༩༧༡ ལོར་ལྕམ་སྐུ་ལཱའི་ལ་ཀ་སྦིར་ལྷན་དུ་གཉེན་སྒྲིག་གནང་། ཁོང་གཉིས་ལ་བུ་གཅིག་བྱུང་བ་དང་། ད་ལྡ་ཨ་རིའི་ནིའུ་ཡོག་ཏུ་བཞུགས་ཀྱི་ཡོད།
ཕྱི་ལོ་ ༡༩༧༥ ལོར་རྒྱ་གར་གཞུང་གིས་ཛ་དྲག་གི་ཁྲིམས་གཞི་བསྡམས་པར་ཁོང་གིས་ངོ་རྒོལ་ལས་འགུལ་སྤེལ་བར་བརྟེན། ཁོང་འཛིན་བཟུང་དོ་དམ་འོག་ཚུད། ཕྱི་ལོ་ ༡༩༨༩ ལོར་མེ་འཁོར་བློན་ཆེན་གྱི་འགན་བཞེས། ཕྱི་ལོ་ ༡༩༩༤ ལོར་སཱམ་ཏཱ་པ་ཊི་ཞེས་པའི་སྲིད་དོན་ཚོགས་པ་གསར་འཛུགས་གནང་བ་དང་། དེའི་རྗེས་ཇན་ཏ་ཌལ་སྲིད་དོན་ཚོགས་པའི་འགོ་ཁྲིད་གནང་། ཕྱི་ལོ་ ༡༩༩༨ ལོར་རྒྱ་གར་བདེ་སྲུང་བློན་ཆེན་གྱི་མཛད་འགན་བཞེས། ཕྱི་ལོ་ ༡༩༩༨ ལོར་པོ་ཁ་རན་རྡུལ་ཕྲན་མཚོན་ཆ་ཚོད་ལྟ་གནང་།
ཕྱི་ལོ་ ༡༩༥༩ ལོར་བོད་ལ་དུས་འགྱུར་བྱུང་བ་ནས་བཟུང་དམ་པ་ཁོང་གིས་སྐུ་ཚེ་ཧྲིལ་པོའི་རིང་བོད་དོན་ཐོག་ཐུགས་ཁུར་ཧ་ཅང་ཆེན་པོ་བཞེས་ཏེ་གོ་སྐབས་ནམ་བྱུང་ལ་འགྱུར་ལྡོག་མེད་པར་བོད་དོན་ཆེད་རྒྱབ་སྐྱོར་གནང་ཡོད། ཅེས་གསུངས་རྗེས་སྨོན་ལམ་གསུང་འདོན་གནང་། འདས་པོ་ཁོང་ལ་གཞུང་འབྲེལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་ཆེད་ཕྱི་དྲོ་ཆུ་ཚོད་ ༣ ནས་དབུས་ལས་ཁུངས་ཁག་ལས་མཚམས་བཞག་ཡོད་པ་བཅས། །
