ཕྱི་ལོ་ ༢༠༡༩ ཟླ་ ༡ ཚེས་ ༢༡ རེས་གཟའ་ཟླ་བ།
༄༅། །རྒྱ་གར་བོད་དོན་རྒྱབ་སྐྱོར་ཚོགས་པའི་ནང་མའི་ལྷན་ཚོགས་ Core group for Tibetan Cause དང་། མུམ་བྷའི་རྒྱ་གར་བོད་དོན་རྒྱབ་སྐྱོར་ཚོགས་པས་མགྲོན་འབོད་ལྟར། བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་རྒྱ་གར་ནུབ་ཕྱོགས་བོད་དོན་རྒྱབ་སྐྱོར་ཚོགས་པའི་ལྷན་ཚོགས་སུ་སྐུ་མགྲོན་གཙོ་བོར་ཆེད་ཕེབས་གནང་ཡོད།
དེ་ཡང་གོང་ཞུས་བོད་དོན་རྒྱབ་སྐྱོར་ཚོགས་པ་གཉིས་ཀྱི་གོ་སྒྲིག་ཐོག་ཕྱི་ཚེས་ ༡༩ དང་ ༢༠ བཅས་ཉིན་གྲངས་གཉིས་རིང་གྲོང་ཁྱེར་མུམ་བྷའི་ནང་ལྷན་ཚོགས་ཤིག་བསྐྱངས་པ་དང་། ལྷན་ཚོགས་སུ་ཧིན་བོད་མཛའ་འབྲེལ་ཚོགས་པ་དང་། འཕགས་བོད་འབྲེལ་མཐུད་ཚོགས་པ། National Campaign for Free Tibet Supports ཞེས་པའི་བོད་དོན་རྒྱབ་སྐྱོར་ཚོགས་པ་བཅས་རྒྱ་གར་ནུབ་ཕྱོགས་ས་ཁུལ་མདྱཱ་པར་དེ་ཤི།Madhya Pradesh དང་མཧཱ་ར་ཤི་ཀྲ། གུ་ཇུ་རཱཏ། གྷོ་བ་སོགས་ནས་རྒྱ་གར་བོད་དོན་རྒྱབ་སྐྱོར་ཚོགས་པའི་སྐུ་ཚབ་འཐུས་མི་གྲྭངས་ ༡༥༠ ལྷག་ཙམ་ཚོགས་ཞུགས་གནང་འདུག
ལྷན་ཚོགས་སུ་བོད་ནང་གི་ཛ་དྲག་གནས་སྟངས་དང་འབྲེལ་བོད་ཀྱི་རིག་གཞུང་རྩ་གཏོར་དང་། ཆབ་སྲིད་དྲག་གནོན། དཔལ་འབྱོར་དབྱེ་འབྱེད། ཁོར་ཡུག་གཏོར་བཤིག གཏེར་ཁ་སྔོག་འདོན། མི་འབོར་སྤོ་ཤུགས་བཅས་ཀྱི་བརྗོད་གཞིའི་ཐོག་གོ་བསྡུར་སྦྱང་བཤད་གནང་བ་དང་ཆབས་ཅིག་རྒྱ་གར་ནང་སྤྱི་དང་། ལྷག་པར་ཁྱབ་ཁོངས་རྒྱ་གར་གྱི་ནུབ་ཕྱོགས་ས་ཁུལ་དུ་བོད་དོན་ལས་འགུལ་གྱི་ནུས་ཤུགས་མཐོ་རུ་གཏོང་ཐབས་གནང་རྒྱུའི་གྲོས་བསྡུར་བྱུང་འདུག
ལྷན་ཚོགས་འདི་སྐོང་ཚོགས་ཐུབ་རྒྱུར་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁུངས་ནས་ཀྱང་མཐུན་འགྱུར་གང་ཐུབ་གནང་ཡོད། ཉིན་གྲངས་གཉིས་རིང་གི་ལྷན་ཚོགས་དབུ་འབྱེད་ཀྱི་མཛད་སྒོར་འཕྲོད་བསྟེན་བཀའ་བློན་མཆོག་གིས་བོད་མཐོ་སྒང་གི་ཁོར་ཡུག་གལ་གནད་སྤྱི་དང་། ལྷག་པར་ཨེ་ཤི་ཡའི་ཡུལ་གྲུ་ཁག་གཅིག་ལ་ཆུའི་ཐོན་ཁུངས་དང་གནམ་གཤིས་གང་ཅིའི་ཐད་ནས་བོད་དེ་གལ་གནད་ཧ་ཅང་ཆེན་པོ་ཆགས་ཀྱི་ཡོད་སྐོར་གསུངས་གནང་འདུག
ཕྱོགས་མཚུངས་བཀའ་བློན་མཆོག་གིས་རྒྱ་ནག་གི་བོད་ས་བཙན་བཟུང་བྱེད་ལུགས་བྱེད་སྟངས་དང་། བཙན་བྱོལ་བོད་མིའི་གནས་སྟངས། འཕགས་བོད་གཉིས་དབར་ཆོས་དང་། རིག་གཞུང་། སྐད་ཡིག མི་རིགས་བཅས་ཀྱི་ཐོག་ནས་ལོ་རྒྱུས་ཡུན་རིང་ལྡན་པའི་འབྲེལ་ལམ་ཇི་ཡོད། བོད་མིའི་སྒྲིག་འཛུགས་ནས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་སྤེལ་ཕྱོགས། བོད་ནང་བོད་མི་གྲངས་ ༡༥༤ ཡིས་རྒྱ་ནག་གཞུང་ལ་༧གོང་ས་མཆོག་ཕྱིར་བོད་ལ་གདན་ཞུ་དང་། བོད་ནང་གཞི་རྩའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་བཅས་དགོས་པའི་དགོས་འདུན་བཏོན་ཞིང་རང་ལུས་མེར་སྲེག་གནང་ཡོད་པ་སོགས་བོད་ཀྱི་གནད་དོན་སྐོར་ཞིབ་ཕྲ་ངོ་སྤྲོད་གནང་བ་མ་ཟད། རྒྱལ་ཁབ་ཀྱི་བདེ་འཇགས་ཐོག་ནས་ཀྱང་བོད་ཀྱི་གནད་དོན་དེ་རྒྱ་གར་ལ་གལ་གནད་ཇི་ཙམ་ཆགས་ཀྱི་ཡོད་སྐོར་ཞིབ་ཕྲ་འགྲེལ་བརྗོད་གནང་འདུག
དེ་ཉིན་ཕྱི་ནང་གཏམ་བཤད་གནང་མཁན་ཁག་གཅིག་ནས་རྒྱ་དཀར་ནག་གཉིས་ཀྱི་འབྲེལ་ལམ་དང་། བོད་ཀྱི་གནད་དོན། བོད་ཀྱི་ཁོར་ཡུག་གལ་གནད་སོགས་ཀྱི་ཐོག་གཏམ་བཤད་གནང་བ་དང་། དེ་བཞིན་ཡུན་རིང་ནས་བོད་དོན་རྒྱབ་སྐྱོར་གནང་མཁན་མཁས་དབང་ཁག་གཅིག་ནས་ཀྱང་གསུང་བཤད་གནང་ཡོད་པ་རེད། །
