ཕྱི་ལོ་ ༢༠༡༩ ཟླ་ ༡ ཚེས་ ༣༠ རེས་གཟའ་ལྷག་པ།
༄༅། །འདི་གར་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་༢༠༡༩ ཟླ་ ༡ ཚེས་ ༢༧ ཉིན་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་བོད་ཁང་དུ་བྱང་ཨ་རི་སྐུ་ཚབ་དོན་གཅོད་ཁང་གིས་གོ་སྒྲིག་འོག་བོད་རྒྱ་གཉིས་ཀྱི་ན་གཞོན་དབར་བསམ་བློ་བརྗེ་རེས་ཀྱི་ཚོགས་འདུ་དུས་ཡུན་ཆུ་ཚོད་ ༦ གི་རིང་བསྐོང་ཚོགས་གནང་ཡོད། ཚོགས་འདུའི་སྟེང་བོད་རིགས་སློབ་ཕྲུག་གྲངས་༡༥ ཙམ་དང་རྒྱ་རིགས་སློབ་ཕྲུག་གྲངས་ ༤༥ ལྷག་འཛུལ་ཞུགས་གནང་ཡོད། སློབ་མ་དེ་དག་ནི། ནིའུ་ཡོག་ཉེ་འཁོར་གྱི་ཁོ་ལུམ་བྷི་ཡ་མཐོ་སློབ་ Columbia University དང་། སེ་ར་ཁུ་སི་མཐོ་སློབ་ Syracus University ། ཧན་ཊར་མཐོ་སློབ་ Hunter College ། བྷ་རུག་མཐོ་སློབ་ Baruch College སོགས་ཀྱི་ནང་སློབ་སྦྱོང་གནང་བཞིན་པ་དང་སློབ་མཐར་ཕྱིན་ཟིན་པའི་ཆེད་ལས་པ་ཤ་སྟག་རེད་འདུག ཚོགས་འདུ་དེ་བཞིན་རིམ་པ་གསུལ་ལ་དབྱེ་ནས་ཚོགས་ཡོད་པ་དང་། དང་པོ་གཏམ་བཤད་ལས་རིམ་དང་། གཉིེས་པ་གཞོན་སྐྱེས་ནང་ཁུལ་གྱི་བགྲོ་གླེང་། གསུམ་པ་བོད་ཀྱི་ཞལ་ལག་ལ་རོལ་བ་དང་ལྷན་ཞོར་ལ་བགྲོ་གླེང་གྱི་རིམ་པ་བཅས་རེད།
ལས་རིམ་དེའི་ནང་གསུང་བཤད་གནང་མཁན་ལྔ་གདན་འདྲེན་ཞུས་ཡོད། དེ་ཡང་སྐུ་ཞབས་ཧུ་ཕིང་ Hu Ping ལགས་ཀྱིས་བོད་རིགས་དང་འབྲེལ་བ་བྱུང་ནས་ལོ་ངོ་སུམ་བཅུ་ལྷག་གི་ཉམས་མྱོང་དང་བཙན་བྱོལ་བོད་མིའི་སྐོར་གསུང་། ནིའུ་ཡོག་གྲོང་ཁྱེར་མཐོ་སློབ་ཀྱི་སློབ་དཔོན་ཤ་མིང་ལགས་ནས་ཁོང་གིས་བྲིས་པའི་དེབ་གསར་པ་རི་མཐོན་པོའི་འབབ་ཆུའི་སྐོར་གསུང་། སྐུ་ཞབས་ཏིང་ཡི་ཧྥུ་ལགས་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་སེམས་དང་སྲོག་གི་འགྲོ་གླེང་སྟེང་མཉམ་ཞུགས་གནང་བའི་སྐོར་གསུང་། ལྕམ་ལི་ཅང་ལིན་ལགས་ཀྱིས་ཉེ་རབས་བོད་ཀྱི་ལོ་རྒྱུས་ཏེ་རྒྱ་ནག་གིས་བོད་ལ་བཙན་འཛུལ་སྐབས་ཀྱི་ལོ་རྒྱུས་དང་། དེ་དག་བོད་རིགས་དང་རྒྱ་རིགས་ཚོས་ཤེས་དགོས་པའི་རྒྱུ་མཚན་སོགས་ཀྱི་སྐོར་གསུང་།
མཐར་རྒྱ་རིགས་འབྲེལ་མཐུད་པ་ཟུར་པ་ཀུན་དགའ་བཀྲ་ཤིས་ལགས་ཀྱིས་བོད་མིའི་སྒྲིག་འཛུགས་ཀྱི་དབུ་མའི་ལམ་སྲིད་བྱུས་ཀྱི་དགོངས་དོན་དང་རྒྱ་ནག་གཞུང་གིས་ངོས་ནས་དབུ་མའི་ལམ་གྱི་སྐོར་འབྲེལ་བརྗོད་ཇི་ལྟར་བྱེད་བཞིན་ཡོད་པ། དེ་བཞིན་རྒྱ་རིགས་ཚོས་དབུ་མའི་ལམ་ལ་ཇི་ལྟར་མཁྱེན་རྟོགས་གནང་དགོས་པའི་སྐོར་གསུང་། ལས་རིམ་གཉིས་པ་གཞོན་སྐྱེས་ནང་ཁུལ་དབར་བགྲོ་གླེང་དང་དྲི་བ་དྲིས་ལན་གནང་། ཚོགས་འདུའི་ཐོག་མཉམ་ཞུགས་གནང་བའི་བོད་རིགས་དང་རྒྱ་རིགས་གཞོན་སྐྱེས་ཚོས་བོད་ཀྱི་གནས་སྟངས་དང་རྒྱ་ནག་གི་ཆབ་སྲིད། སྤྱི་ཚོགས་སོགས་ལ་ཤེས་རྟོགས་དང་བློ་སྐྱེད་ཆེན་པོ་བྱུང་བའི་བསམ་ཚུལ་གསུངས་ཡོད་པ་མ་ཟད། ཐེངས་འདིའི་ཚོགས་འདུ་ཧ་ཅང་ཚགས་ཚུད་བྱུང་བའི་མྱོང་ཚོར་སྐོར་གསུངས་ཡོད། བྱང་ཨ་རིའི་སྐུ་ཚབ་དོན་གཅོད་ལས་ཁུངས་ཀྱི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་ཚོ་ལགས་ཀྱིས་ཚོགས་འདུ་གཙོ་སྐྱོང་གནང་ཡོད་པ་དང་བཅས། །
