ཕྱི་ལོ་ ༢༠༡༩ ཟླ་ ༡ ཚེས་ ༢ རེས་གཟའ་ལྷག་པ།

༄༅། །འདི་གར་སིམ་ལ་སྤྱི་ཁྱབ་ལས་ཁུངས་ནས་བཏང་གནས་ནང་འཁོད་དོན། དཔལ་ལྡན་བཀའ་ཤག་ནས་ཕྱི་ལོ་ ༢༠༡༨ ལོ་དེ་བཞིན་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་གཏན་གནང་བའི་བརྒྱུད་རིམ་འོག་ཕྱི་དྲིལ་ལས་ཁུངས་དང། སིམ་ལ་སྤྱི་ཁྱབ་ལས་ཁུངས་ཐུན་མོང་ནས་ཧི་མ་ཅལ་མངའ་སྡེའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་རྒྱས་པ་ཞིག་འདས་ལོ་ཟླ་ ༡༠ ཚེས་ ༡༥ ཉིན་སིམ་ལའི་གྷན་རྡི་ཐང་ཆེན་དུ་ཚོགས་ཡོད་པ་དང་། 

མཛད་སྒོའི་ཐོག་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jairam Thakur མཆོག་དང་ཤེས་རིག་བློན་ཆེན་སྐུ་ཞབས་ Suresh Bhardwaj རྣམ་གཉིས་ཕེབས་ཐུབ་མེད་པས་ས་གནས་ཐུགས་རྗེ་ཆེ་ཞུའི་གོ་སྒྲིག་ཚོགས་ཆུང་ནས་ཁ་སང་རེས་གཟའ་ཟླ་བ་ཕྱི་ལོ་༢༠༡༩ ཟླ་ ༡ ཚེས་ ༡ ཉིན་ཁོང་རྣམ་གཉིས་ཀྱི་གཟིམས་ཤག་ཏུ་མཇལ་འཕྲད་ཀྱིས་ཕྱི་ལོ་གསར་ཚེས་ལ་འཚམས་འདྲི་ཞུས་འབྲེལ་ཐུགས་རྗེ་ཆེ་ཞུའི་ཕྱག་རྟགས་ཆོས་ཀྱི་འཁོར་ལོ་འབུལ་གནང་ཡོད། དེ་དང་ཆབས་ཅིག་མངའ་སྡེའི་སྲིད་སྐྱོང་སྐུ་ཞབས་ Acharya Dev Vrat མཆོག་དང་སྤྱི་ཁྱབ་བློན་ཆེན་ཟུར་པ་སྐུ་ཞབས་ Virbhadra Singh མཆོག་དང་ MLA Vikram Aditya Singh མཆོག་ལ་ཕྱི་ལོ་གསར་ཚེས་ཀྱི་འཚམས་འདྲི་ཞུས་པའི་གནས་ཚུལ་དུ།