༢༠༡༩ ཟླ་ ༡ ཚེས་ ༢༦ རེས་གཟའ་སྤེན་པ།
༄༅། །འདི་ལོ་ནི་རྒྱ་ནག་དམར་པོའི་སྲིད་གཞུང་གིས་བོད་ས་དབང་སྒྱུར་བྱས་ནས་མི་ལོ་ ༦༠ འཁོར་བཞིན་ཡོད་སྟབས། དུས་སྐབས་དང་བསྟུན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་བདུན་ཕྲག་གཅིག་ཙམ་རིང་ཉི་ཧོང་དུ་གཞུང་འབྲེལ་ཕྱོགས་བསྐྱོད་གནང་ནས་བོད་ནང་གི་ཛ་དྲག་གནས་སྟངས་གཞིར་བཟུང་། རྒྱལ་སྤྱིའི་ཐོག་བོད་དོན་རྒྱབ་སྐྱོར་སྔར་བས་ཤུགས་ཆེར་གཏོང་རྒྱུར་དམིགས་ཏེ་ཁུལ་དེར་བོད་དོན་གོ་རྟོགས་ཀྱི་ལས་འགུལ་རྒྱ་ཆེ་སྤེལ་བཞིན་པའི་སྐབས་དང་བསྟུན། ཕྱི་ལོ་ ༢༠༡༩ ཟླ་ ༡ ཚེས་ ༢༤ ཉིན་ཉི་ཧོང་གི་རྒྱལ་ཡོངས་གསར་འགྱུར་བརྒྱུད་ལམ་གྲགས་ཅན་NHK ལས་རིམ་གཙོ་སྐྱོང་བའི་དྲི་བར་ལན་འདེབས་གནང་སྐབས། རྒྱ་ནག་གཞུང་གིས་བོད་ནང་གི་བོད་མིའི་མངོན་འདོད་ལ་ངེས་པར་དུ་བརྩི་བཀུར་ཞུས་པའི་ཐོག་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་མགྱོགས་མྱུར་འབྲེལ་མོལ་བསྐྱར་གསོ་གནང་བ་བརྒྱུད་བོད་ཀྱི་གནད་དོན་གསལ་ཐབས་དགོས་པའི་རེ་འདུན་ཤུགས་ཆེ་བཏོན་འདུག
ལས་རིམ་དེ་བཞིན་དེ་ཉིན་གྱི་ཕྱེད་ཡོལ་ཙམ་ལ་ཉི་ཧོང་རྒྱལ་ཡོངས་སུ་རྒྱང་སྲིང་གནང་འདུག དེ་ཡང་སྲིད་སྐྱོང་མཆོག་གིས་གསར་འགོད་པའི་དྲི་བར་ལན་འདེབས་གནང་དོན། “བོད་ནང་ལ་མཚོན་ན་ ༢༠༠༩ ནས་ད་བར་བོད་མི་ ༡༥༣ རང་ལུས་མེར་སྲེག་གནང་ནས་རྒྱ་ནག་གཞུང་གིས་བོད་མིའི་ཐོག་ལག་བསྟར་བྱེད་བཞིན་པའི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་རྔམ་སྟོན་བྱས་ཡོད། བོད་མི་དེ་དག་གིས་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་དགོས་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནང་དུ་མགྱོགས་མྱུར་གདན་ཞུ་དགོས་པའི་དགོས་འདུན་བཏོན་ཡོད། རྒྱ་ནག་གཞུང་གིས་བོད་རྒྱ་གཉིས་སྨན་གྱི་ཐབས་ལམ་བརྒྱུད་བོད་ཀྱི་གནད་དོན་གསལ་དགོས་ཚེ་བོད་མི་དེ་དག་གི་འབོད་སྒྲར་ངེས་པར་དུ་གསན་འཇོག་གནང་དགོས། དེ་ལྟར་བྱས་ཚེ་རྒྱ་ནག་གཞུང་ལའང་ཁེ་ཕན་ཡོད་པ་ཞིག་རེད། བོད་མི་ཚོས་རྒྱ་ནག་དང་ཁ་བྲལ་གྱི་རང་བཙན་རྩོད་ཀྱི་མེད། བོད་མི་ཚོའི་མངོན་འདོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གསལ་ལྟར་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཐོབ་རྒྱུ་དེ་རེད།
ལོ་རྒྱུས་ཐོག་ནས་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པ་དེར་སུ་གཅིག་གིས་སྙོན་དུ་མེད། འོན་ཀྱང་ད་ལྟ་བོད་ནང་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་བོད་མི་ཚོས་ནམ་ཡང་ངོས་ལེན་བྱེད་ཐུབ་ཐབས་བྲལ།
དེར་བརྟེན་དམ་བསྒྲགས་དེ་དག་འཕྲལ་མར་མཚམས་འཇོག་བྱས་ཏེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གསལ་བའི་ཆ་རྐྱེན་ལྟར་བོད་མི་ཚོར་ཐོབ་ཐང་དེ་དག་ངེས་པར་དུ་སྤྲོད་དགོས།
ཕྱི་ལོ་ ༢༠༡༠ ནས་ད་བར་བོད་རྒྱ་འབྲེལ་མོལ་མཚམས་ཆད་པ་རེད། འོན་ཀྱང་རྒྱ་རིགས་ནང་པས་གཙོས་རྣམ་དཔྱོད་ཅན་མང་པོ་ཞིག་དང་། རྒྱ་རིགས་ཚོང་པ་དང་སློབ་ཕྲུག་སོགས་མང་པོ་ཞིག་གིས་སྒེར་གྱི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུ་སྐབས། རྒྱ་རིགས་དེ་དག་གིས་བོད་ཀྱི་རིག་གཞུང་ལ་དགའ་ཞེན་དང་། ལྷག་པར་བོད་བརྒྱུད་ནང་བསྟན་ལ་དད་གུས་ཆེན་པོ་ཡོད་པའི་རྣམ་པ་གསལ་འདོན་གནང་བཞིན་ཡོད། ” ཅེས་སྲིད་སྐྱོང་མཆོག་གིས་གསུངས།
ཕྱོགས་མཚུངས་བོད་མིའི་རང་དབང་འཐབ་རྩོད་དང་འབྲེལ་ནས་སྲིད་སྐྱོང་མཆོག་གིས་གསུང་དོན། “བོད་མིའི་འཐབ་རྩོད་ལ་མཚོན་ན་དེ་སྔ་ལས་ནུས་པ་ཇེ་ཆེ་དང་རྣོ་ངར་ལྡན་པ་ཞིག་ཆགས་བཞིན་ཡོད་པ་ནི་ད་ལྟའི་བོད་མི་མི་རབས་གཞོན་པ་ཚོའི་སྙིང་སྟོབས་ལས་གསལ་པོར་རྟོགས་ཐུབ་པ་དང་། བོད་མི་གཞོན་སྐྱེས་ཚོར་མཚོན་ན་བོད་ནང་གི་གནས་སྟངས་དང་རྒྱལ་སྤྱིའི་གནས་སྟངས་སྐོར་གོ་རྟོགས་དེ་སྔ་ལས་ཆེ་བ་ཡོད། ཕྱོགས་མཚུངས་བོད་མི་མི་རབས་རྒན་པ་ཚོར་མཚོན་ན་རང་ཉིད་བོད་མི་ཞིག་ཡིན་བསམ་པའི་མི་རིགས་ཀྱི་ཞེན་ཁོག་དང་ཆོད་སེམས་ཧ་ཅང་བརྟན་པོ་ཡོད། “ཅེས་གསུངས།
གཞན་ཡང་སྲིད་སྐྱོང་མཆོག་གིས་ཉེ་ལམ་ཨ་རིའི་སྲིད་འཛིན་ཌོ་ནལ་ཊམ་ Donald Trump མཆོག་གིས་ཨར་རྒྱ་ཡུལ་གཉིས་དབར་བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་ཐོག་བརྗེ་ལེན་དགོས་པའི་གྲོས་ཆོད་ལ་མཚན་རྟགས་བཀོད་པར་བརྟེན་ད་ཆ་ཁྲིམས་སུ་གཏན་འབེབས་བྱུང་ཡོད་སྟབས། རྒྱ་ནག་གཞུང་ལ་ཆབ་སྲིད་ཀྱི་བརྡ་ལན་ཤུགས་ཆེ་ཞིག་བཏང་བ་དང་། བརྡ་ལན་ཇི་འདྲ་ཞིག་བཏང་བ་བརྗོད་ན། དྲང་བདེན་དང་འགྲོ་བ་མིའི་ཐོབ་ཐང་། མང་གཙོའི་རིང་ལུགས་ལ་རྒྱལ་སྤྱིས་རྒྱབ་སྐྱོར་དང་སྲུང་སྐྱོབ་བྱེད་བཞིན་ཡོད་པའི་རྣམ་འགྱུར་གསལ་འདོན་གནང་བ། ལྷག་པར་རྒྱ་རིགས་རྣམས་ཨ་རིའི་ས་གནས་གང་དུ་བསྐྱོད་ཆོག་པ་ལྟར་ཨ་རིའི་མི་སེར་དཀྱུས་མ་དང་། གསར་འགོད་པ། མཁས་དབང་། སློབ་ཕྲུག་སོགས་ཀྱང་བོད་ས་གཙོ་བོར་གྱུར་བའི་རྒྱ་ནག་གི་ས་ཁུལ་གང་འདྲ་ཞིག་ཏུ་འདྲ་མཉམ་ཐོག་བསྐྱོད་ཆོག་པའི་ཐོབ་ཐང་སྤྲོད་དགོས་པའི་ཁྲིམས་ཀྱི་ཆ་རྐྱེན་གཏན་འབེབས་བྱས་པ་རེད། དེར་བརྟེན་ད་ཆ་དེ་སྔ་ལྟར་མིན་པར་རྒྱ་ནག་གཞུང་གི་འབྲེལ་ཡོད་རྒྱ་རིགས་ལས་བྱེད་པ་སུ་ཞིག་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་ལ་དམ་བསྒྲགས་བྱས་ཚེ་རྣམ་སྨིན་ངེས་པར་དུ་མྱང་དགོས་པའི་བརྡ་ལན་ཞིག་བཏང་ཚུལ་སྲིད་སྐྱོང་མཆོག་གིས་གསུངས།
ལྷག་པར་རྒྱ་ནག་གཞུང་གིས་བོད་མིའི་ཆོས་དད་རང་དབང་ཐོག་དམ་བསྒྲགས་ཇེ་ཤུགས་ཆེ་རུ་བཏང་བ་ནི་དེང་སྐབས་བོད་བརྒྱུད་ནང་བསྟན་ལ་དད་གུས་ཞུ་མཁན་ཇེ་ཆེར་འགྲོ་བཞིན་པ་དེར་ཞེད་སྣང་ཡོད་པའི་རྣམ་འགྱུར་ཞིག་ཡིན་པ་དང་། གང་ཡིན་བརྗོད་ན་དེང་སྐབས་རྒྱ་ནག་ནང་དུ་རྒྱ་རིགས་དམར་ཤོགས་ཚོགས་མིའི་གྲངས་འབོར་ལས་ཆོས་ལ་དད་གུས་དང་ཡིད་ཆེས་བྱེད་མཁན་མང་བ་ཡོད། དེར་བརྟེན་རྒྱ་ནག་གཞུང་གིས་བོད་མི་ནང་པ་དང་། ཡུ་གུར་ཁ་ཆེ་སོགས་ལ་ཐབས་ལམ་སྣ་ཚོགས་སྒོ་ནས་དེ་སྔ་ལས་དམ་བསྒྲགས་བྱེད་ཤུགས་ཆེ་རུ་གཏོང་བཞིན་ཡོད། བོད་མི་ཚོར་མཚོན་ན། ཆོས་དད་ནི་བོད་མིའི་རིག་གཞུང་ཟེར་ནའང་འདྲ། བོད་མིའི་ཐུན་མིན་ངོ་བོ་ཟེར་ནའང་འདྲ། བོད་མིའི་སྤྱི་ཚོགས་དཔལ་ཡོན་གྱི་བླ་སྲོག་ལྟ་བུ་ཆགས་ཡོད་སྟབས་རྒྱ་ནག་གཞུང་གིས་བོད་མི་ཚོར་དགོན་པ་སོགས་སུ་གནས་མཇལ་དུ་རང་དབང་ཐོག་ནས་འགྲོ་སྐྱོད་བྱེད་བཅུག་དགོས་པ་དང་། བོད་མི་ཚོར་རང་གི་རྩ་བའི་བླ་མ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ནང་དུ་སྒྲིག་གཤོམ་ཆོག་པ་དང་། དད་གུས་དང་ཕྱག་མཆོད་འབུལ་ཞུ་རྒྱུའི་རང་དབང་སྤྲོད་དགོས་པ་སྲིད་སྐྱོང་མཆོག་གིས་གསུངས། “
གཞན་ཡང་དཔལ་ལྡན་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་དྲི་བར་ལན་འདེབས་གནང་དོན། “ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་ལ་མཚོན་ན་༸སྐུ་ཁམས་གསལ་ཐང་རེད། ལྷག་པར་ཉེ་ལམ་ང་ཚོས་བརྟན་བཞུགས་འབུལ་སྐབས་མགོན་པོ་གང་ཉིད་ནས་ཀྱང་དགུང་གྲངས་བརྒྱ་ལྷག་པར་༸སྐུ་འཚོ་བཞུགས་མཛད་རྒྱུའི་༸ཞལ་བཞེས་ཐོབ་ཡོད། འབྱུང་འགྱུར་ཏཱ་ལའི་བླ་མའི་ཡང་སྲིད་ཀྱི་གནད་དོན་དེ་མཐར་བོད་མི་ཚོས་ཐག་གཅོད་བྱེད་དགོས་པ་ཞིག་ཡིན་སྐོར་དེ་སྔའང་བཀའ་སློབ་སྩལ་མྱོང་ཡོད། བོད་མི་རྣམས་འཕགས་པ་སྤྱན་རས་གཟིགས་ཀྱི་ཐུན་མིན་གདུལ་ཞིང་དུ་སྐྱེས་པ་ཡིན་སྟབས་༸གོང་ས་ཏཱ་ལའི་བླ་མ་མཆོག་དང་ཁ་བྲལ་ཐབས་མེད། དེར་བརྟེན་ང་ཚོས་དུས་རྟག་ཏུ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རྣམས་ཚེ་རབས་ནས་ཚེ་རབས་རྗེས་སུ་འཛིན་པའི་སྨོན་ལམ་རྒྱག་བཞིན་ཡོད་སྟབས་མགོན་པོ་མཆོག་གི་འབྱུང་འགྱུར་ཡང་སྲིད་ཕེབས་དགོས་པ་ནི་བོད་མིའི་བསམ་བློའི་ནང་དུས་རྟག་ཏུ་ཡོད་པ་ཞིག་རེད།
གུང་ཁྲན་རིང་ལུགས་དང་རྒྱ་ནག་དམར་པོའི་སྲིད་གཞུང་ལ་མཚོན་ན་ཆོས་ཁས་ལེན་མི་བྱེད་མཁན་ཞིག་ཡིན་སྟབས་ཡང་སྲིད་ཀྱི་གནད་དོན་ཐག་གཅོད་བྱ་རྒྱུར་ཁྲིམས་མཐུན་གྱི་དབང་ཚད་དང་རྒྱུ་མཚན་གང་ཡང་མེད་པ་ཞིག་རེད། བོད་ནང་དུ་རྒྱ་ནག་དམར་པོའི་དབང་སྒྱུར་འོག་བོད་ཀྱི་དགོན་པ་བརྒྱ་ཆ་ ༩༨ རྩ་གཏོར་བཏང་བ་དང་། དགེ་བཙུན་བརྒྱ་ཆ་ ༩༩.༩ བཙན་དབང་ཐོག་ནས་སྐྱ་སར་ཕབ་པ་རེད། དེ་བཞིན་དགོན་པའི་ནང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་ཙམ་ཡང་སྒྲིག་ཤོམ་བྱེད་མི་ཆོག་པའི་བཙན་བཀའ་བཏང་དང་གཏོང་བཞིན་ཡོད། “ཅེས་གསུངས།
དེ་བཞིན་སྲིད་སྐྱོང་མཆོག་གིས་འདས་པའི་ལོ་ངོ་ ༧ ཙམ་ནས་ཡུ་རོབ་དང་ལྷོ་ཨ་ཕི་རི་ཀ། ལྷོ་ཨ་མི་རི་ཀའི་ཡུལ་གྲུ་ཁག་ལ་སྐྱོད་སྐབས་འབྲེལ་ཡོད་ས་གནས་གཞུང་སོགས་ལ་རྒྱ་ནག་དང་འབྲེལ་བ་གནང་སྐབས་ངེས་པར་ཡིད་གཟབ་དགོས་པའི་ཉེན་བརྡ་བཏང་མྱོང་ཡོད་པ་ལྟར། ད་ཆ་རྒྱ་ནག་གཞུང་གིས་དེ་སྔ་བོད་ནང་སིམ་འཛུལ་བྱས་པ་ལྟར་རྒྱུད་གཅིག་ལམ་གཅིག་ཟེར་བའི་རྒྱ་སྐྱེད་ཀྱི་སྲིད་བྱུས་འོག་ད་ཆ་རྒྱལ་ཁབ་དེ་དག་ནང་དུའང་སིམ་འཛུལ་གྱིས་དབང་ཤུགས་རྒྱ་སྐྱེད་གཏོང་བཞིན་ཡོད་པ་གསུངས།
ཐེངས་འདིར་གཞུང་འབྲེལ་ཕྱོགས་བསྐྱོད་སྐབས་དཔལ་ལྡན་སྲིད་སྐྱོང་མཆོག་གིས་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་རྒྱུ་མ་ཟད། ས་གནས་བོད་མི་དང་ཉི་ཧོང་མང་ཚོགས་བཅས་དང་ཐུག་འཕྲད་ཀྱིས་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་བོད་ཀྱི་གནད་དོན་གསལ་ཆེད་མ་འོངས་ལངས་ཕྱོགས། བོད་མཐོ་སྒང་དེ་ཨེ་ཤི་ཡ་དང་འཛམ་གླིང་སྤྱི་ལ་གལ་གནད་ཆེ་ཚུལ་སྐོར་གཏམ་བཤད་གནང་རྒྱུ་ཡིན་འདུག སྲིད་སྐྱོང་མཆོག་ཁུལ་དེར་ཕེབས་ཐེངས་ལྔ་པ་ཆགས་ཡོད་པ་དང་། ༢༠༡༢ ལོར་སྲིད་སྐྱོང་མཆོག་ཉི་ཧོང་ནང་གཞུང་འབྲེལ་ཕྱོགས་ཕེབས་ཆེས་ཐོག་མ་ཡིན་པ་བཅས།
