ཕྱི་ལོ་༢༠༡༩ ཟླ་ ༡ ཚེས་ ༢ རེས་གཟའ་ལྷག་པ།

༄༅།།འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡ ཚེས་ ༡ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་བཀའ་བློན་རྣམ་པ་རྒྱ་གར་གནས་མཆོག་རྡོ་རྗེ་གདན་ཁུལ་གྱི་གནས་ཆེན་ཁག་གཅིག་ལ་གནས་མཇལ་དུ་ཕེབས་ཡོད།

དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་གིས་དབུས་བཀའ་བློན་རྣམ་པས་སྟོན་པ་སངས་རྒྱས་བཅོམ་ལྡན་འདས་ཀྱིས་ཤེར་ཕྱིན་གྱི་མདོ་གསུང་པའི་གནས་བྱ་རྒོད་ཕུང་པོའི་རི་ལ་གནས་མཇལ་དུ་ཕེབས་ཏེ་ཤེས་རབ་སྙིང་པོ་གསུང་འདོན་གནང་། དེ་རྗེས་དཔལ་ནཱ་ལེནྡྲ་སོགས་ལ་གནས་མཇལ་གཟབ་རྒྱས་ཞུས་ཡོད།

ཕྱོགས་མཚུངས་ཕྱི་ཚེས་ ༢ ཉིན་གྱི་སྔ་དྲོ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་བཀའ་བློན་རྣམ་པ་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་ཆེན་མོར་གནས་མཇལ་དུ་ཕེབས་ཡོད་པ་དང་།

དཔལ་ལྡན་སྲིད་སྐྱོང་མཆོག་གིས་དབུས་བཀའ་བློན་རྣམ་པས་སྟོན་པ་སངས་རྒྱས་བཅོམ་ལྡན་འདས་ཀྱི་སྐུ་བརྙན་ལ་ན་བཟའ་ཕུལ་ཏེ་མཇལ་ཁ་ཞུས་གྲུབ་མཚམས་བྱང་ཆུབ་མཆོད་རྟེན་ཆེན་མོར་གནས་སྐོར་དུ་ཕེབས་ཡོད་པ་བཅས།།