ཕྱི་ལོ་ ༢༠༡༩ ཟླ་ ༡ ཚེས་ ༣ རེས་གཟའ་ཕུར་བུ།
༄༅།།འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཆོས་རིག་ལས་ཁུངས་ནས་༸སྐུའི་དགུང་ཀེག་དང་སྟབས་བསྟུན་རྒྱ་བལ་འབྲུག་གསུམ་ཁུལ་དུ་རྟེན་གཞི་བྱས་པའི་རིས་མེད་ཆོས་སྡེ་ཁག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་སྨོན་བྱིན་རླབས་མཛད་པའི་བདག་ཅག་གི་སྟོན་པ་ཤཱཀྱ་ཐུབ་པའི་སྐུ་བརྙན་ཨིན་ཇི་ ༢༤ ཅན་རེ་དང་། གཡུང་དྲུང་བོན་གྱི་དགོན་སྡེ་ཁག་ལ་སྟོན་པ་གཤེན་རབ་ཀྱི་སྐུ་བརྙན་རེ་གནང་རྒྱུའི་ལས་འཆར་ལེགས་པར་གྲུབ་ཡོད།
དེ་ཡང་ཕྱི་ལོ་ ༢༠༡༨ ཟླ་ ༡༢ ཚེས་ ༣༡ ཉིན་གནས་མཆོག་རྡོ་རྗེ་གདན་དུ་ཆོས་རིག་ལས་ཁུངས་ཀྱི་གོ་སྒྲིག་འོག བོད་མིའི་སྒྲིག་འཛུགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་གྲུབ་བསྟུན། དཔལ་ལྡན་སྲིད་སྐྱོང་མཆོག་དང་ཕྱག་རོགས་བཀའ་བློན་རྣམ་པ་ལྷན་འཛོམས་ཐོག་དགོན་སྡེ་ཁག་གི་སྐུ་ཚབ་རྣམས་ལ་ཐུབ་པའི་སྐུ་བརྙན་རེ་འགྲེམས་སྤེལ་གནང་ཡོད།
བོད་མིའི་སྒྲིག་འཛུགས་ཆོས་རིག་ལས་ཁུངས་ནས་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་༸སྐུའི་དགུང་ཀེག་སྔ་བསུ་དང་དངོས་གཞི། ཕྱི་མཇུག་བཅས་ལ་ཚུལ་བསྟན་སྐུ་གེགས་བར་ཆད་རིགས་བཟློག་ཐབས་སུ། ཕྱི་ལོ་ ༢༠༡༨ ཟླ་ ༥ ནས་བོད་ཀྱི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པར་ཐུགས་བརྟག་ཞུས་འབྲས་དང་། ལྷ་བླའི་བཀའ་ལུང་གཞིར་བཟུང་ཆོས་སྡེ་ཁག་དང་བོད་མིའི་ས་གནས་ཁག་ཏུ་ཞབས་རིམ་སྨིན་སྒྲུབ་དང་། དགོན་སྡེ་ཁག་ཏུ་ལོ་གཅིག་རིང་དམིགས་བསལ་དཀོན་གཉེར་གསོལ་ཕོགས་གནང་རྒྱུ། དེ་བཞིན་རིས་མེད་ཆོས་སྡེ་ཁག་ལ་ཐུབ་པའི་སྐུ་བརྙན་རེ་གནང་རྒྱུ་སོགས་ཀྱི་ལས་འཆར་མང་པོ་ཞིག་གོ་སྒྲིག་ཞུ་བཞིན་ཡོད།
སྐུ་བརྙན་བླུ་ཡོན་ཆེད་ཧིན་སྒོར་འབུམ་ ༤༢༦༥༠༠༠ དང་། གཟུངས་ལ་ཧིན་སྒོར་ ༡༢༠༠༠༠༠ སོང་ཡོད།
སྐུ་བརྙན་བྱུང་བའི་དགོན་སྡེ་ཁག་གི་མཚན་གཞུང་གཟིགས་ཆེད་འདིར་གནོན།
