ཕྱི་ལོ་ ༢༠༡༩ ཟླ་ ༡ ཚེས་ ༡༥ རེས་གཟའ་མིག་དམར།
༄༅། །རྒྱ་ནག་གཞུང་གིས་བོད་མིའི་ཆོས་ཕྱོགས་ཀྱི་བྱེད་སྒོ་ཁག་ལ་ཐེ་བྱུས་བྱས་པ་བརྒྱུད་མུ་མཐུད་དམ་དྲག་ཅན་གྱི་སྲིད་བྱུས་ལག་བསྟར་བྱེད་བཞིན་ཡོད།
དེ་ཡང་རྒྱ་ནག་གཞུང་གིས་ཉེ་ལམ་ལྷ་ས་ཁུལ་གྱི་བོད་རིགས་ལས་བྱེད་རྣམས་ལ་ཆོས་ལུགས་ཀྱི་བྱེད་སྒོ་ཁག་ལ་ཞུགས་མི་ཆོག་པ་མ་ཟད་གལ་ཏེ་ཆོས་ལུགས་ཀྱི་བྱེད་སྒོ་ཁག་ལ་མཉམ་ཞུགས་བྱས་པ་ཤེས་རྟོགས་བྱུང་ཚེ་མི་ཚེ་ཧྲིལ་པོའི་ཐོབ་ཐང་ཡོངས་རྫོགས་འཕྲོག་རྒྱུ་ཡིན་པའི་ཉེན་བརྡ་ཡང་བཏང་ཡོད།
ཕྱོགས་མཚུངས་རྒྱ་ནག་གཞུང་ནས་བོད་ལྷོ་ཁ་རྩེད་ཐང་ས་ཁུལ་གྱི་སློབ་གྲྭ་ཁག་གི་དགུན་དུས་གུང་སེང་སྐབས་བོད་རིགས་སློབ་ཕྲུག་རྣམས་ནས་ཆོས་ལུགས་ཀྱི་བྱེད་སྒོ་ཁག་ལ་ཞུགས་མི་ཆོག་པའི་དམ་དྲག་བཀག་སྡོམ་ཡང་བྱས་ཡོད། རྒྱ་ནག་གཞུང་ནས་ཆོས་ལུགས་ཀྱི་བྱེད་སྒོར་དམ་དྲག་འདི་ལྟ་བུ་དེ་སྔ་ཡང་བྱས་ནས་ཕྱི་ལོ་ ༢༠༡༨ ཟླ་ ༧ ནང་རྒྱ་ནག་གཞུང་ནས་བོད་རང་སྐྱོང་ལྗོངས་ཟེར་བའི་ཁྱབ་ཁོངས་སུ་གཏོགས་པའི་བོད་པའི་སློབ་ཕྲུག་ཚོས་དབྱར་ཁའི་གུང་གསེང་སྐབས་ཆོས་ལུགས་ཀྱི་བྱེད་སྒོ་ཁག་ལ་ཞུགས་མི་ཆོག་པའི་བཙན་བཀའ་བཏང་བ་དང་། བོད་ཟླ་བཞི་པ་ས་ག་ཟླ་བ་སྲུང་བརྩི་ཞུ་རྒྱུར་བཀག་འགོག་བྱས་པ་མ་ཟད། གལ་ཏེ་བྱིས་པ་ཚོས་ལྐོག་ལ་དགོན་པ་དང་ཆོས་ལུགས་བྱེད་སྒོར་ཞུགས་ཚེ་སྒྲིག་འགལ་ཆད་པ་གཅོད་རྒྱུ་ཡིན་ལུགས་ཡང་བཤད་ཡོད།
རྒྱ་ནག་གཞུང་གིས་ཕྱོགས་གཅིག་ནས་རྒྱུན་དུ་བོད་ནང་གི་ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་བྱས་དང་བྱེད་བཞིན་ཡོད་པ་དང་། ཕྱོགས་གཞན་ཞིག་ནས་དགོན་སྡེ་ཁག་གི་གྲྭ་བཙུན་རྣམས་ལ་ཆེ་བསྟོད་ཀྱི་ཕྱག་འཁྱེར་སོགས་སྤྲད་དེ་རྒྱ་ནག་རང་ཉིད་ཀྱི་ལྟ་སྤྱོད་དང་མཐུན་པའི་ཕྱོགས་སུ་བློ་འགུག་ཐབས་བྱེད་བཞིན་ཡོད། །
