ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་དང་ལས་བྱེད་ཟུར་པ་ཁག་གཅིག་བོད་མི་མང་སྤྱི་འཐུས་ལྷན་ཁང་དུ་ཕེབས་པ།

གསར་ལས་ཁང་གི་གསར་འགོད་པས།

༢༠༡༨-༡༢-༠༨

ཕྱི་ལོ་ ༢༠༡༨ ཟླ་ ༡༢ ཚེས་ ༨ རེས་གཟའ་སྤེན་པ།

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༢ ཚེས་ ༧ སྔ་དྲོ་ཆུ་ཚོད་ ༡༡།༤༠ ཐོག་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་སྐུ་ཞབས་པར་ཝིན་ཀུ་མར་མཆོག་དང་། ཁོང་གི་ལྷན་མངའ་སྡེའི་ལས་བྱེད་དང་དྭངས་དམག་ཟུར་པ་བཅས་མི་གྲངས་ ༢༠ ཙམ་བོད་མི་མང་སྤྱི་འཐུས་ལྷན་ཁང་དུ་འཚམས་གཟིགས་སུ་ཕེབས་པར་དཔལ་ལྡན་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་གིས་སྣེ་ལེན་དང་སྦྲགས།

གྲོས་ཚོགས་ཚོགས་ཁང་ནང་དཔལ་ལྡན་ཚོགས་གཞོན་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་མང་གཙོའི་བྱུང་བའི་སྐོར། བོད་དང་རྒྱ་གར་གཉིས་བར་ལོ་རྒྱུས་ཀྱི་ཐོག་ནས་འབྲེལ་བ་ཇི་ཡོད་དང་ལྷག་པར་ཆོས་དང་རིག་གཞུང་། ས་མཚམས། ཁོར་ཡུག་བཅས་ཀྱི་འབྲེལ་བའི་སྐོར། ད་ལྟ་བོད་ནང་གི་ཛ་དྲག་གནས་སྟངས། བོད་ནང་བོད་མི་རྣམས་ནས་མུ་མཐུད་དེ་རྒྱ་ནག་གི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གནང་བཞིན་ཐོག་བོད་མི་རྒན་གཞོན་བར་གསུམ་ནས་བོད་ཀྱི་རྩ་དོན་སླད་རང་ལུས་མེར་བསྲེགས་ཕུལ་བའི་སྐོར། རྒྱལ་སྤྱིའི་ནང་བོད་ཀྱི་རྩ་དོན་ཐོག་རྒྱབ་སྐྱོར་གནང་མཁན་ཇེ་མང་དུ་འགྲོ་བཞིན་ཡོད་པའི་སྐོར་དང་། དེ་བཞིན་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་། རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པ་བཅས་ཀྱི་ཐོག་ངོ་སྤྲོད་གནང་ཡོད་པ་མ་ཟད། ཁོང་རྣམས་ལ་བོད་ཀྱི་དངོས་ཡོད་ལོ་རྒྱུས་ལ་ཞིབ་འཇུག་གནང་སྟེ་བོད་དོན་ཐོག་མ་འོངས་པར་རྒྱབ་སྐྱོར་གང་ཐུབ་གནང་སྐྱོང་ཡོང་བའི་འབོད་སྐུལ་ཞུས་གནང་སོང་། དེ་ནས་ཁོང་རྣམས་ལ་བོད་དོན་དང་འབྲེལ་བའི་དཔེ་དེབ་ཁག་ཅིག་འགྲེམས་སྤེལ་ཞུས་གནང་རྗེས། ཁོང་རྣམས་ནས་ཀྱང་བོད་ཀྱི་རྩ་དོན་ཐོག་གང་ཐུབ་རྒྱབ་སྐྱོར་གནང་རྒྱུའི་ཞལ་བཞེས་གནང་སོང་བ་བཅས། །

གསར་གནས།