ཕྱི་ལོ་ ༢༠༡༨ ཟླ་ ༡༢ ཚེས་ ༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༡༢ ཚེས་ ༢ ནས་ ༡༤ བར་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༤ པ་ (COP24) དེ་བཞིན་ཡུ་རོབ་རྒྱལ་ཁབ་པོ་ལེན་ཊིའི་གྲོང་ཁྱེར་ཀ་ཊ་ཝི་ཙར་ Katowice ཚོགས་པ་དང་། ལྷན་ཚོགས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གོ་ལའི་གནམ་གཤིས་གྱུར་ལྡོག་གི་གནད་དོན་དང་འབྲེལ་བའི་སྐོར་གསུང་འཕྲིན་ཞིག་སྩལ་བའི་ནང་འཁོད་དོན།
གོ་ལའི་ཁོར་ཡུག་ཚོགས་ཆེན་ཐེངས་ ༢༤ པར་མཉམ་ཞུགས་གནང་མཁན་ཡོངས་ལ་ངོས་ཀྱིས་དགའ་བསུའི་འཚམས་འདྲི་དང་། ལྷན་ཚོགས་ཐོག་འབྱུང་འགྱུར་མི་རབས་ཚོའི་ཆེད་དུ་འཛམ་གླིང་གི་ཁོར་ཡུག་གནས་སྟངས་ཇེ་བཟང་དུ་གཏོང་ཐབས་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། བོད་ལ་འཛམ་གླིང་ཡང་ཐོག་ཅེས་འབོད་པ་དང་། ཨེ་ཤེ་ཡའི་ཆུ་བོ་ཕལ་མོ་ཆེའི་འབྱུང་ཁུངས་ཡིན། ངོས་རང་ཆུང་དུས་བོད་མཐོ་སྒང་དུ་ཡོད་སྐབས་རང་བྱུང་སྐྱེ་ཁམས་ཁོར་ཡུག་ལ་རང་བཞིན་གྱིས་སེམས་ཐག་ཉེ་པོ་ཡོད། དེར་བརྟེན་ངོས་ཀྱི་ལས་འགན་གསུམ་པ་འདི་ཁོར་ཡུག་སྲུང་སྐྱོབ་བྱ་རྒྱུ་ཡིན་སྟབས་ངོས་རང་ས་གནས་གང་དུ་བསྐྱོད་ཀྱང་ཁོར་ཡུག་སྲུང་སྐྱོབ་ཐོག་འབོད་སྐུལ་བྱེད་ཀྱི་ཡོད།
སྤྱིར་དེང་སྐབས་འཛམ་གླིང་ནང་འཕྲུལ་ཆས་ཡར་རྒྱས་གནས་ཚད་ཧ་ཅང་མཐོན་པོར་སོན་ཡོད། འོན་ཀྱང་མིའི་བྱ་སྤྱོད་ལ་བརྟེན་ནས་ཁོར་ཡུག་ཐོག་དཀའ་ངལ་ཡང་མང་པོ་ཞིག་བཟོས་པའི་རྗེས་འབྲས་སུ་ད་ཆ་གོ་ལའི་ཚ་དྲོད་ཇེ་ཆེར་རྒྱས་བཞིན་པ་དང་། གོ་ལའི་གནམ་གཤིས་འགྱུར་ལྡོག་སྔར་དང་མི་འདྲ་བར་མྱུར་ཚད་ཆེན་པོ་འགྲོ་བཞིན་པ་དེ་དག་མིའི་བྱ་སྤྱོད་ལ་བརྟེན་ནས་ཡིན་པ་མཁས་དབང་ཁག་གཅིག་གིས་བརྗོད་བཞིན་ཡོད། དེར་བརྟེན་ཁོར་ཡུག་ཐོག་འཕྲད་བཞིན་པའི་དཀའ་ངལ་དེ་དག་ཉུང་དུ་གཏོང་བའམ་རྩ་བ་ནས་མེད་པ་བཟོ་རྒྱུའི་འགན་དེའང་ང་ཚོ་མི་ལ་ཡོད་པ་རེད།
གནམ་གཤིས་འགྱུར་ལྡོག་གི་དཀའ་ངལ་དེ་རྒྱལ་ཁབ་རེ་གཉིས་ཀྱི་གནད་དོན་ཞིག་མ་རེད། དེ་ནི་འགྲོ་བ་མི་རིགས་སྤྱི་དང་། འཛམ་གླིང་འདིའི་ནང་འཚོ་བཞིན་པའི་སྲོག་ཆགས་ཡོངས་དང་འབྲེལ་བ་ཆགས་ཡོད། ང་ཚོར་སྡོད་གནས་འཛམ་གླིང་འདི་ཁོ་ན་ལས་མེད། གལ་ཏེ་འཛམ་གླིང་འདིའི་ཁོར་ཡུག་གནས་སྟངས་ཀྱི་རྐྱེན་པས་འཚོ་གནས་བྱེད་ཐབས་མེད་པ་ཞིག་ཆགས་པ་ཡིན་ན། འཛམ་གླིང་གཞན་ཞིག་ཏུ་ང་ཚོ་སྤོ་ས་མེད། དེར་བརྟེན་ཚང་མས་དགོངས་པ་ཆེ་བཞེས་ཀྱིས་ཁོར་ཡུག་སྲུང་སྐྱོབ་བྱ་རྒྱུ་དང་། གོ་ལའི་ཚ་དྲོད་ཀྱི་དཀའ་ངལ་སེལ་ཆེད་དོན་ཕན་ལྡན་པའི་ཐབས་ལམ་ཞིག་འཚོལ་དགོས་པ་ནི་ཛ་དྲག་དགོས་མཁོ་ཞིག་ཡིན།
མཁའ་དབྱིངས་བར་སྣང་ནས་བླངས་པའི་འཛམ་གླིང་གི་འདྲ་དཔར་དེ་འདྲ་ལ་བལྟ་སྐབས། གོ་ལ་སྔོ་ལྡུམ་གཅིག་མ་གཏོགས་རྒྱལ་ཁབ་ཕན་ཚུན་དབར་ས་མཚམས་སོགས་མ་མཐོང་རྒྱུ་མི་འདུག དེར་བརྟེན་ “ངའི་རྒྱལ་ཁབ་” ཟེར་བ་དང་། “ང་ཚོའི་གླིང་ཆེན་” ཞེས་བསམ་བློ་གཏོང་རྒྱུའི་དུས་ཚོད་ཡོལ་ཟིན་སྟབས་ཚང་མས་གོ་ལ་གཅིག་གྱུར་གྱི་འདུ་ཤེས་འཛིན་ནས་ཀུན་ཁྱབ་འགན་ཁུར་གྱི་འདུ་ཤེས་ཆེ་རུ་གཏོང་དགོས།
མཐའ་དོན། ངོས་ཀྱིས་གོ་སྒྲིག་ཚོགས་ཆུང་ལ་བསྔགས་བརྗོད་དང་། ལྷན་ཚོགས་འདི་ཉིད་ལམ་ལྷོངས་ཚགས་ཚུད་ལྡན་པ་ཞིག་ཡོང་བར་སྨོན་འདུན་ཤུགས་དྲག་ཞུ་རྒྱུ་ཡིན། ཞེས་གསུང་འཕྲིན་ནང་འཁོད་འདུག
ཐེངས་འདིའི་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༤ ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་ཛམ་ལྷ་བསྟན་པ་རྒྱལ་མཚན་ལགས་མཉམ་ཞུགས་གནང་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་འདི་ཉིད་ལྷན་ཚོགས་ཐོག་ཁོང་གིས་སྒྲོག་སྦྱང་ཞུས་འདུག་པ་བཅས།།
གསུང་འཕྲིན་ངོ་མ་ཨིན་ཡིག་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་སྒྱུར་ཞུས་པས་ཨིན་ཡིག་ལ་རྩ་འཛིན་གནང་རོགས་ཞུ།།
