ཕྱི་ལོ་༢༠༡༨ ཟླ་ ༡༢ ཚེས་ ༡༨ རེས་གཟའ་མིག་དམར།
༄༅། །འདི་གར་ཨོ་སི་ཀྲི་ལི་ཡ་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཨོ་སི་ཀྲི་ལི་ཡ་སྐུ་ཚབ་དོན་གཅོད་ལས་ཁུངས་ཀྱིས་གོ་སྒྲིག་འོག ཕྱི་ལོ་ ༢༠༡༨ ཟླ་ ༡༢ ཚེས་ ༡༥ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུས་བཞེས་མཛད་དེ་ལོ་ངོ་ ༢༩ འཁོར་བའི་དུས་སྟོན་མཛད་སྒོ་ཟབ་རྒྱས་ཤིག་སིད་ནི་གྲོང་ཁྱེར་དུ་བསྐོང་འཚོགས་གནང་ཡོད།
དེ་ཉིན་སྔ་དྲོ་ཆུ་ཚོད་ ༡༠།༣༠ ཐོག་མཛད་སྒོ་དངོས་སུ་མགོ་འཛུགས་ཞུས་ཡོད་པ་དང་། ཐོག་མ་སྐྱབས་གནས་དགེ་འདུན་གྱི་སྡེས་སྤོས་སྣེའི་སྔོན་དུ་བསུས་ཏེ། སྐུ་ཚབ་དོན་གཅོད་མཚོ་སྒོ་ལྷག་པ་ལགས་དང་། ཨོ་སི་ཀྲི་ལི་ཤེ་ཡའི་བོད་མི་མང་སྤྱི་འཐུས་གདོང་འཐུས་སྐྱིད་འཛོམས་ལགས། བཀའ་ཟུར་ཚེ་རིང་དཔལ་འབྱོར་མཆོག་སོགས་སྐུ་མགྲོན་རྣམ་པས་༸རྒྱལ་བའི་སྐུ་པར་མཐང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་རྗེས་མཇལ་ཁ་ཞུས་པ་དང་།
དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཁའ་ཁྱབ་སྐྱེ་འགྲོ་སྤྱི་དང་བྱེ་བྲག་བོད་གངས་ཅན་པ་རྣམས་ཀྱི་མགོན་དཔུང་དམ་པར་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་ཟབ་མོ་མཐའ་དག་ལྷུན་གྱིས་འགྲུབ་སླད། དབུ་མཛད་ཀྱིས་གསུང་མཆོག་དབུ་མཛད་གནང་ནས་ཞལ་འདོན་གསུང་འདོན་གནང་རྗེས་སྐུ་མགྲོན་དང་མི་མང་རྣམས་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་འབུལ་གཏོང་གནང་བ་དང་། བོད་རྒྱལ་ཁབ་དང་མི་རིགས་ཀྱི་ཆེད་དུ་གཅེས་པའི་ལུས་སྲོག་ལོངས་སྤྱོད་བློས་གཏོང་གནང་མཁན་རྒྱལ་གཅེས་པ་རྣམས་ལ་གུས་འདུད་དང་མྱ་ངན་ངག་བཅད་ཞུས།
དེ་རྗེས་ན་གཞོན་སློབ་ཕྲུག་ཁག་གཅིག་གིས་དབྱངས་སྣེ་འཁྲིད་དེ་ནོ་སྦེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་འབུལ་གནང་བ་དང་། བཀྲ་ཤིས་རྟེན་འབྲེལ་གྱི་གསོལ་ཇ་འབྲས་བསིལ་མི་མང་ཚང་མར་འདེགས་འབུལ་ཞུས། དེ་ནས་བོད་མི་མང་སྤྱི་འཐུས་གདོང་འདུས་སྐྱིད་འཛོམས་ལགས་ཀྱིས་དུས་ཆེན་དང་འབྲེལ་བའི་གསུང་བཤད་གནང་སྐབས། ཆེ་ས་ནས་བཤད་ན་ཨོ་སི་ཀྲི་ལི་གཞུང་མང་གཉིས་ནས་བོད་མིར་ཤ་ཚ་དང་གདུང་སེམས་མཉམས་སྐྱེ་ཤུགས་ཆེན་པོ་ཡོད་པ་དང་། ད་ལོ་ཇི་ནི་ཝར་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་རྟོག་ཞིབ་གནང་སྐབས་ཨོ་སི་ཀྲི་ལི་ཡའི་གཞུང་གིས་ཀྱང་གཏམ་བཤད་གནང་ཡོད་པ་དང་། དམིགས་བསལ་སྐུ་ཚབ་དོན་གཅོད་ལས་ཁུངས་ཀྱིས་གོ་སྒྲིག་འོག་ཨོ་གླིང་གྲོས་ཚོགས་སུ་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་གཟི་བརྗིད་ལྡན་པ་སྤེལ་ཐུབ་པར་བསྔངས་བརྗོད་དང་། བོད་མི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་དགོས་པ་ཤིན་ཏུ་ནས་གལ་ཆེན་པོ་ཡིན་པ་མ་ཟད། མེ་ཆུང་ས་ནས་གསོད་དགོས་པའི་ལམ་སྟོན་གསུང་བཤད་གནང་།
དེ་ནས་སྐུ་ཚབ་དོན་གཅོད་མཚོ་སྒོ་ལྷག་པ་ལགས་ཀྱིས་དུས་སྟོན་མཛད་སྒོ་དང་འབྲེལ་བའི་གསུང་བཤད་གནང་སྐབས། དོན་གཅོད་ཀྱི་མིང་གནས་ཐོག་ནས་ལས་དོན་གང་བྱས་པ་ཡོངས་རྫོགས་༸སྐྱབས་མགོན་ཡིད་བཞིན་ནོར་བུ་མཆོག་གི་དགོངས་པ་དང་། བོད་མིའི་སྒྲིག་འཛུགས་ཀྱི་ལངས་ཕྱོགས་དང་མ་འགལ་བ་གནང་གི་ཡོད་པ་དང་། ད་ཐེངས་དོན་གཅོད་ལས་ཁུངས་རང་ནས་དུས་སྟོན་མཛད་སྒོ་འདི་གོ་སྒྲིག་གནང་དགོས་གྱུར་བའི་རྒྱུ་མཚན་རྒྱབ་ལྗོངས་དང་བཅས་པ་ངོ་སྤྲོད་མཐིལ་ཕྱིན་པ་གནང་རྗེས།
དཔལ་ལྡན་སྲིད་སྐྱོང་མཆོག་ད་ཐེངས་ཨོ་སི་ཀྲི་ལི་ཡར་ཆིབས་བསྒྱུར་བསྐྱངས་པར་བོད་མི་ནང་ཁུལ་འགོག་རྐྱེན་ཕྲན་བུ་བཟོས་ཡོད་ཀྱང་། ཨོ་གླིང་གྲོས་ཚོགས་ཀྱི་ཚོགས་ཁང་དུ་ཨོ་གླིང་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་ཆེ་མཐོང་ལྡན་པ་དང་གཟི་བརྗིད་ལྡན་པ་བྱུང་ཡོད་པ་མ་ཟད། ཕྱི་ནང་གི་མཁས་དབང་རྣམ་པ་དང་། གསར་འགྱུར་བརྒྱུད་ལམ་ཁག་དང་མཇལ་འཕྲད་ཀྱིས་བོད་དོན་ཁྱབ་བསྒྲགས་ཀྱི་མཛད་འཕྲིན་རྒྱ་ཆེན་པོ་བསྐྱངས་ཡོད་སྟབས། བོད་མི་ནང་ཁུལ་གྱི་རྩོད་རྙོག་ཆུང་རྩག་རིགས་ལ་མགོ་མ་འཁོར་བར། ཚང་མས་ཆེ་བཞག་ཆུང་སྐྱུར་གྱིས་མཐུན་ལམ་རྡོག་རྩ་གཅིག་སྒྲིལ་ཐོག་བོད་སྤྱི་པའི་སྒྲིག་འཛུགས་འོག་ཤར་བསྐྱོད་ཐུབ་པར་འབད་དགོས་པའི་གསུང་བཤད་གནང་།
དེ་ནས་བཀའ་ཟུར་དཔལ་འབྱོར་ཚེ་རིང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་དང་མཛད་པ་སྙིང་བསྡུས་ངོ་སྤྲོད་དང་འབྲེལ། བོད་པ་ཚང་མས་ལུང་ཚན་དང་ཆོས་ལུགས་བྱེ་བྲག་པའི་འཐེན་འཁྱེར་ལ་མགོ་འཁོར་ཏེ་མ་བསྡད་པར། ཐོག་མ་བཙན་བྱོལ་དུ་འབྱོར་སྐབས་གནས་མཆོག་རྡོ་རྗེ་གདན་དུ་མནའ་གན་མཐུ་མོ་ཆེ་བཞག་སྟེ་ཆོལ་གསུམ་ཆིག་སྒྲིལ་ལྕགས་ཀྱི་གོང་བུའི་དམ་ཚིག་སྙིང་བཅངས་དགོས་པ་མ་ཟད།
ཨོ་སི་ཀྲི་ལི་ཡར་ཆ་མཚོན་ན་ཕྱི་ལོ་ ༢༠༡༥ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རི་སྔོན་པོར་ཆིབས་སྒྱུར་བསྐྱངས་སྐབས་འདི་ཁུལ་མི་མང་ཡོངས་ནས་ཕུལ་བའི་དམ་བཅའ་སྙིང་གི་ནོར་བུའི་ཚིག་འབྲུ་ཁག་ལག་ལེན་དུ་བསྟར་ཏེ། བླ་མས་གསོལ་རེས་གནང་བའི་མང་གཙོའི་སྒྲིག་འཛུགས་འདིའི་འོག་ཏུ་ཤར་བསྐྱོད་དགོས་པ་ཤིན་ཏུ་གལ་ཆེན་པོ་ཡིན་པ་དང་། ཆོས་ཕྱོགས་ནས་བཤད་ན་བླ་མས་བཀའ་བརྩི་ན་བླ་མ་སྐུ་ཚེ་བརྟན་གྱི་ཡོད་སྟབས་ཚང་མས་དེ་བསྟུན་གནང་སྐྱོང་ཡོང་བའི་གསུང་བཤད་དང་གཞེན་སྐུལ་གནང་རྗེས། སིད་ནི་ཁུལ་གནས་སྡོད་དང་བླངས་མི་མང་ནས་གླུ་གཞས་ཁག་གཅིག་གཟིགས་འབུལ་ཞུས་གྲུབ་རྗེས་གཞུང་འབྲེལ་མཛད་སྒོ་རྒྱལ་ཁའི་ངང་གྲོལ།
ད་ཐེངས་སྐུ་ཚབ་དོན་གཅོད་ལས་ཁུངས་ཀྱིས་ཐད་ཀར་གོ་སྒྲིག་གནང་བའི་མཛད་སྒོར་འདིར་སིད་ནི་ཁུལ་གནས་སྡོད་ཆོལ་གསུམ་དང་བླངས་མི་མང་གིས་རྒྱབ་སྐྱོར་ཤུགས་ཆེ་གནང་སྟེ། ཉིན་གུང་དང་དགོང་མོའི་ཞལ་ལག བཏུང་བྱའི་རིགས་ཡོངས་རྫོགས་རིན་མེད་བཏང་ཡོད་པ་མ་ཟད། གཞས་དང་ཞབས་བྲོ་ ༣༠ ལྷག་གྲ་སྒྲིག་གནང་ཡོད་པ་དང་། ཁྱོན་ཆོལ་གསུམ་སེར་སྐྱ་ཕོ་མོ་ ༤༠༠ ལྷག་དོན་དམ་ལྷན་འཛོམས་བྱུང་སྟེ་ཉིན་འཁྱོངས་གཞས་དང་ཞབས་བྲོའི་དགའ་སྟོན་ལ་རོལ་ཡོད་པ་བཅས། །
