ཕྱི་ལོ་ ༢༠༡༨ ཟླ་ ༡༢ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༡༢ ཚེས་ ༡༧ དང་ ༡༨ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་གྱི་ལས་འཆར་གོ་སྒྲིག་ཚན་པས། བཞུགས་སྒར་རྡ་སའི་ཉེ་འདབས་སུ་ཆགས་པའི་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ཁྱབ་ཁོངས་འཛིན་སྐྱོང་སྦྱོང་བརྡར་ཁང་དུ་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་བོད་ཨིན་སྐད་ཡིག་གཙོ་བོར་གྱུར་པའི་གང་ཅིའི་ཐད་ལས་དོན་གནང་ཕྱོགས་ཀྱི་ཟབ་སྦྱོང་གནང་བཞིན་པའི་སྲི་ཞུའི་ལས་བྱེད་གསར་འདེམས་བྱུང་བ་བུ་གྲངས་ ༤ དང་བུད་མེད་གྲངས་ ༡༤ བཅས་ཁྱོན་ལས་བྱེད་གྲངས་ ༡༨ ལ་བོད་མིའི་སྒྲིག་འཛུགས་ཀྱི་ལངས་ཕྱོགས་གཉིས་སྨན་དབུ་མའི་ལམ་གྱི་སྲིད་བྱུས་སྐོར་ཟབ་སྦྱོང་ཞིག་གོ་སྒྲིག་གནང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༡།༣༠ ཐོག་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་ཟབ་སྦྱོང་བ་རྣམས་ཀྱི་དོགས་འདྲི་ཁག་ལ་ལན་འདེབས་གསལ་བཤད་གནང་སྐབས་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་བྱུང་རིམ་ངོ་སྤྲོད་དང་། རྒྱབ་ལྗོངས་ལོ་རྒྱུས། དེ་བཞིན་དབུ་མའི་ལམ་གྱི་གྲུབ་འབྲས་སོགས་ཀྱི་སྐོར་ངོ་སྤྲོད་གནང་ཡོད།
སྐབས་དེར་ཟབ་ཁྲིད་གནང་མཁན་ཕྱི་དྲིལ་དྲུང་ཆེའི་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས་དང་། དྲུང་འཕར་འཆི་མེད་ཚེ་དབྱངས་ལགས། ཕྱི་དྲིལ་ལས་བྱེད་མཁའ་འགྲོ་སྒྲོལ་མ་ལགས་དང་ཚེ་རིང་མཆོག་ལེགས་ལགས་བཅས་ཡིན་འདུག
དེ་ཡང་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་རྒྱུའི་དམིགས་ཡུལ་གཙོ་བོ་ནི། དབུ་མའི་ལམ་གྱི་སྲིད་བྱུས་ཀྱི་གོ་དོན་དང་། སྲིད་བྱུས་འདི་ཉིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་འཆར་སྣང་ལྟར་ཕྱི་ལོ་ཆིག་སྟོང་དགུ་བརྒྱ་བདུན་ཅུ་དོན་གྲངས་ནས་རིམ་བཞིན་བོད་མིའི་འཐབ་རྩོད་ཀྱི་ལངས་ཕྱོགས་སུ་གཏན་འབེབས་བྱུང་བའི་བརྒྱུད་རིམ། དེ་བཞིན་ཕྱིས་སུ་དུས་ཚོད་རིམ་སོང་གི་སྲིད་བྱུས་དེའི་འཕེལ་རིམ་འགྲོ་སྟངས་སྐོར་གོ་རྟོགས་སྤེལ་ཆེད་ཡིན་འདུག་པ་བཅས། །
