༢༠༡༨ ཟླ་ ༡༢ ཚེས་ ༡༣ རེས་གཟའ་ཕུར་བུ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མུམ་བྷེ་མཐོ་སློབ་ཏུ་ནང་པའི་གཞུང་ནས་གསུང་པའི་རྒྱུ་འབྲས་མན་ངག་བདུན་གྱི་བྱམས་པའི་སྐོར་གྱི་རྒྱལ་སྤྱིའི་ལྷན་ཚོགས་དབུ་འབྱེད་མཛད་འདུག སྐབས་དེར་མགོན་པོ་གང་ཉིད་ཀྱིས། མགྱོགས་མྱུར་དེང་དུས་ཤེས་ཡོན་ལམ་ལུགས་ནང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་གཏན་འབེབས་གནང་ཕྱོགས་ཐད། རྒྱ་གར་རྒྱལ་ནང་དང་རྒྱལ་སྤྱིའི་རང་བཞིན་ལྡན་པའི་ལྷན་ཚོགས་ཚུགས་འཆར་ཡོད་སྐོར་བཀའ་སློབ་སྩལ་འདུག
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་དེང་དུས་ཤེས་ཡོན་ལམ་ལུགས་ནང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་ཚན་འཇོག་རྒྱུ་གལ་གནད་ཆེ་ཚུལ་སྐོར་བཀའ་སློབ་སྩོལ་སྐབས། ཤེས་ཡོན་ལམ་ལུགས་ཐོག་ནས་འགྲོ་བ་མི་ཐེར་འབུམ་བདུན་ཡོད་པ་རྣམས་ལ་མི་གཅིག་གྱུར་གྱི་འདུ་ཤེས་འཛིན་ཐུབ་པ་ཞིག་བཟོ་ཐུབ་པ་དང་། མི་ཚང་མའི་རྒྱུད་ལ་རང་ཆས་སུ་ཡོད་པའི་བྱམས་བརྩེའི་བློ་དེ་དག་རིས་མེད་ཀྱི་ལྟ་གྲུབ་ཐོག་ནས་ཤུགས་ཆེ་རུ་གཏོང་ཐུབ་རྒྱུར་ཐུགས་རེ་མཛད་བཞིན་ཡོད་སྐོར་བཀའ་སློབ་སྩལ་དོན། ཆོས་ལུགས་བྱེ་བྲག་པ་གཅིག་ལ་བརྟེན་ནས་འགྲེལ་བཤད་བརྒྱབ་དགོས་བྱུང་ཚེ་གཞན་གྱི་རྣ་བར་འགྲོ་རྒྱུ་མ་རེད། དེར་བརྟེན་ང་ཚོས་ཆོས་ལུགས་ལ་མ་བརྟེན་པར་ཤེས་ཡོན་ལམ་ལུགས་ཐོག་ནས་མིའི་ལྷན་སྐྱེས་བྱམས་བརྩེའི་ནུས་པ་ཤུགས་ཆེ་རུ་གཏོང་ཐབས་ཆེད་འབད་བརྩོན་བྱེད་དགོས།
ངོས་ཀྱི་འགན་ཁུར་གཙོ་བོ་གཅིག་ནི་དེང་དུས་རྒྱ་གར་སྤྱི་ཚོགས་ནང་རྒྱ་གར་གནའ་རབས་ཀྱི་ལེགས་བཤད་བསྐྱར་གསོ་བྱ་རྒྱུ་ཡིན། བྱེད་ལུགས་བྱེད་སྟངས་དེའང་ཆོས་ཀྱི་སྐད་ཆའི་ཐོག་ནས་མ་ཡིན་པར་ཤེས་ཡོན་གྱི་ངོ་བོ་ཁོ་ནའི་ཐོག་ནས་བྱ་རྒྱུ་རེད། རྒྱ་གར་གནའ་རབས་སྲོལ་རྒྱུན་ལམ་སྲོལ་ནང་རིས་མེད་ Secular ཞེས་པའི་ཐ་སྙད་འདི་ཆོས་ཁས་ལེན་མཁན་ཙམ་མ་ཟད། ཆོས་ཁས་མི་ལེན་མཁན་ལའང་གུས་བཀུར་ཞུ་རྒྱུའི་ལམ་སྲོལ་བཟང་པོ་ཞིག་ཡོད་པ་དེར་གོ་དགོས།
ཆོས་དད་ཡོད་མེད་ཇི་ལྟར་ཡང་རང་རྒྱུད་མ་དུལ་བ་བྱེད་མཁན་ཉོན་མོངས་པའི་བློ་མ་རུང་བ་དེ་དག་ལ་རྒྱ་གར་སྲོལ་རྒྱུན་ལེགས་བཤད་ནས་གཉེན་པོ་བསྟེན་ཕྱོགས་སྐོར་རྒྱས་བཤད་ཡོད་པ་དེས་བསམ་བློར་འགྱུར་བཅོས་བཏང་ནས་ཕན་ཐོགས་ཏན་ཏན་བྱེད་ཐུབ་རྒྱུ་རེད། རྒྱ་གར་སྲོལ་རྒྱུན་ལེགས་བཤད་ལས་ཞི་གནས་དང་ལྷག་མཐོང་སྒོ་ནས་བློའི་རྣམ་གཞག་དང་བྱེད་ལས། དེ་བཞིན་ཉོན་མོངས་པའི་བློའི་བྱེད་ལས་དང་དེར་གཉེན་པོ་བསྟེན་ཕྱོགས་སྐོར་གཏིང་ཟབ་པོ་ཤེས་ཐུབ། རྒྱ་གར་བ་ཁྱེད་ཚོས་དེང་དུས་ཤེས་ཡོན་ལམ་ལུགས་ལ་བརྟེན་པའི་ཕྱི་དངོས་པོའི་འཛུགས་སྐྲུན་ཡར་རྒྱས་དང་དུས་མཚུངས། རྒྱ་གར་གནའ་རབས་སྲོལ་རྒྱུན་ལས་གསུང་པའི་ནང་གི་བསམ་བློའི་འགྲོ་སྟངས་དང་བྱེད་ལས་ལ་བརྟེན་ནས་སེམས་ཞི་བདེ་ལྡན་པ་ཞིག་བཟོ་ཐུབ་རྒྱུ་ཡིན་སྟབས། གནའ་དེང་ཟུང་འབྲེལ་ཐོག་ནས་སློབ་འཁྲིད་བྱེད་ཐུབ་རྒྱུ་རེད། སྲོལ་རྒྱུན་ལེགས་བཤད་དེ་དག་རྒྱ་གར་རང་གི་ནང་དུ་བསྐྱར་གསོ་ཐུབ་པ་ཞིག་བྱུང་བ་ཡིན་ན་རྒྱ་ནག་གིས་གཙོས་རྒྱ་གར་གྱི་ཁྱིམ་མཚེས་ནང་པའི་ཡུལ་གྲུ་ཁག་ལའང་ཕན་ཐོགས་ཡོང་ངེས་ཡིན།
གལ་ཏེ་རྒྱ་ནག་གིས་རྒྱ་གར་གནའ་རབས་སྲོལ་རྒྱུན་ལས་གསུང་པའི་བྱམས་བརྩེའི་ཉམས་ལེན་ལག་བསྟར་ཐུབ་པ་ཞིག་བྱུང་ན་རྒྱ་ནག་ནང་དུ་བྱམས་བརྩེར་བརྟེན་པའི་དོན་དམ་གྱི་སྤྱི་ཚོགས་རིང་ལུགས་ཤིག་ལག་བསྟར་བྱེད་ཐུབ་ངེས་ཡིན། ང་ཚོར་ཕྱི་དངོས་པོའི་མཐུན་རྐྱེན་ལ་མཚོན་ན་ལོ་རེ་བཞིན་ཡར་རྒྱས་འགྲོ་བཞིན་ཡོད། འོན་ཀྱང་འཛམ་གླིང་ཁྱོན་ཡོངས་ཀྱི་གནས་སྟངས་ལ་གཟིགས་དང་། ང་ཚོ་དང་གཅིག་མཚུངས་ཀྱི་འགྲོ་བ་མི་རིགས་ཁག་གཅིག་ལ་དམག་འཁྲུག་དང་མུ་གེའི་འཇིགས་པ་སོགས་ལ་བརྟེན་ནས་དཀའ་སྡུག་ཧ་ཅང་མྱོང་བཞིན་པ་ནི་ཀུན་གྱི་མཐོང་ཆོས་སུ་གྱུར་ཡོད། དེའི་རྒྱུ་མཚན་གང་ཡིན་ནམ། དེ་ནི་ང་ཚོས་རང་བདེ་དོན་གཉེར་འབའ་ཞིག་གི་བསམ་བློ་ལ་བརྟེན་ནས་རེད། རང་གཅེས་འཛིན་དང་གཞན་བདེ་ཡལ་བར་དོར་བ་ལ་བརྟེན་ནས་གནས་སྟངས་ཐབས་སྡུག་འདི་བྱུང་བ་རེད།
འཚེ་བའི་བྱ་སྤྱོད་ལ་བརྟེན་ནས་དེང་སྐབས་ང་ཚོར་དཀའ་ངལ་དེ་དག་འཕྲད་དགོས་པའི་རྒྱུ་མཚན་གཙོ་བོ་ནི། ང་ཚོ་ཕན་ཚུན་དབར་ཆོས་ལུགས་དང་རྒྱལ་ཁབ། མི་རིགས་དང་དཔལ་འབྱོར་སོགས་རིམ་པ་གཉིས་པའི་གནས་སྟངས་འོག་ཕན་ཚུན་ཕྲན་བུ་མི་འདྲ་བ་ཡོད་པ་རྒྱུ་མཚན་དུ་བྱས་ནས་ཕན་ཚུན་རྩོད་པ་བྱས་པ་མ་ཟད། ཐ་ན་གསོད་རེས་ཚུན་ཆད་གཏོང་བཞིན་པ་དེ་ལྟར་རེད། ཅེས་བཀའ་སློབ་སྩལ་བ་དང་སྦྲགས།
ལྷན་ཚོགས་གོ་སྒྲིག་གནང་མཁན་ལ་ཐུགས་རྗེ་ཆེ་ཞུ་མཛད་དེ། སྤྱིར་ལྷན་ཚོགས་ཀྱི་བརྗོད་གཞི་བྱམས་པ་དང་སྙིང་རྗེ་དེ་དག་ཆོས་ཀྱི་སྐད་ཆ་ལས་འཕྲོས་པ་ཞིག་ཡིན་ཡང་། དེང་དུས་སྤྱི་ཚོགས་ནང་ལྟ་གྲུབ་དེ་དག་ཧ་ཅང་དགོས་མཁོ་ཆེ་བ་ཞིག་ཡིན་སྟབས། ང་ཚོས་ལེགས་བཤད་དེ་དག་ཤེས་ཡོན་གྱི་སློབ་ཚན་དུ་བཞག་ནས་སློབ་ཁྲིད་བྱེད་ཐུབ་པ་དགོས་པ་དང་། བུད་མེད་ཚོར་མཚོན་ན་ལུས་ཀྱི་གྲུབ་ཆའི་སྟེང་ནས་གཞན་གྱི་སྡུག་བསྔལ་ལ་མི་བཟོད་པའི་བློ་ཤུགས་ཆེ་བ་ཡོད་སྟབས་བྱམས་བརྩེ་སྤེལ་རྒྱུའི་ནུས་པའང་ཆེ་བ་ཡོད་སྐོར་བཀའ་སློབ་སྩལ་དོན།
ངོས་ལ་མཚོན་ན་བྱམས་བརྩེ་སློབ་སྟོན་གནང་མཁན་དགེ་རྒན་ཆེས་ཐོག་མ་དེ་རང་གི་མ་ཡིན་ཞེས་དུས་རྟག་ཏུ་བརྗོད་ཀྱི་ཡོད། ངོས་ཀྱི་ཨ་མ་ལགས་དམ་པ་ཁོང་ཐུགས་སེམས་ཧ་ཅང་བཟང་པོ་རེད། ངོས་ཀྱི་རྒྱུས་ལ་བྱམས་བརྩེའི་ས་བོན་འདེབས་མཁན་ཐོག་མ་ཁོང་རེད། དེར་བརྟེན་རིན་ཐང་དེ་དག་གོང་མཐོར་གཏོང་བར་སྐྱེས་པ་ལས་བུད་མེད་ཚོར་ནུས་པ་ཆེ་བ་ཡོད། ང་ཚོས་རིན་ཐང་དེ་དག་གོང་མཐོར་གཏོང་ཆེད་རང་གཞན་ཚང་མས་མཐུན་སྣང་དུ་གྲུབ་པའི་མྱོང་བ་དང་། ཚན་རིག་གི་བརྟག་དཔྱད་བྱས་པའི་གྲུབ་དོན་སོགས་ལ་གཞི་བཅོལ་ནས་འགྲོ་དགོས། ཞེས་བཀའ་སློབ་སྩལ། ཕྱི་ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་གུ་རུ་ནཱ་ནག་མཐོ་སློབ་Guru Nanak College ཏུ། བྱམས་བརྩེ་དང་ཀུན་ཁྱབ་འགན་ཁུར་སྐོར་བཀའ་སློབ་སྩལ་རྒྱུ་ཡིན་འདུག་པ་བཅས།།
