ཕྱི་ལོ་ ༢༠༡༨ ཟླ་ ༡༢ ཚེས་ ༡༨ རེས་གཟའ་མིག་དམར།
༄༅། །འདི་གར་བྱང་ཨ་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༢ ཚེས་ ༡༥ ཉིན་ནིའུ་ཡོག་གྲོང་ཁྱེར་གྱི་མི་རིགས་འདྲ་མིན་མང་ཤོས་གནས་སྡོད་བྱེད་སའི་ས་ཆ་ཨེལ་མ་ཧར་སི་(Elmhurst,Queen) རུ་རྒྱ་བོད་འབྲེལ་ལམ་གྱི་འདུ་འཛོམས་ཤིག་བྱང་ཨ་རིའི་སྐུ་ཚབ་དོན་གཅོད་ཁང་ནས་གོ་སྒྲིག་གནང་ཡོད།
དེ་ཡང་འདུ་འཛོམས་འདིའི་ཐོག་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་དང་། ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས། ས་གནས་གཞོན་ནུ། ས་གནས་བེུད། ས་གནས་མདོ་སྨད། ས་གནས་དབུས་གཙང་། ས་གནས་ཆུ་སྒང་བཅས་ཀྱི་ཚོགས་གཙོ་གཙོས་པའི་བོད་རིགས་ ༣༠ལྷག་དང་། རྒྱ་ནག་ནང་ཤུགས་རྐྱེན་ཆེ་བའི་མི་སྣ། རྩོམ་སྒྲིག་པ་གྲགས་ཅན་ཧུ་ཕིང་དང་ཆབ་སྲིད་དཔྱད་པ་པོ་ཁྲིན་པོ་ཁུང་། དེ་བཞིན་སློབ་དཔོན་མིང་ཤཱ་གཙོས་པའི་རྒྱ་རིགས་བདུན་ཅུ་ལྷག་ཙམ་འཛོམས་སོང་།
རྒྱ་རིགས་འབྲེལ་མཐུད་པས་ལོ་བཅུའི་གོང་རྒྱ་རིགས་འབྲེལ་མཐུད་ཀྱི་ལས་དོན་ཇི་ལྟར་དབུ་ཚུགས་མིན་དང་། བོད་མིའི་སྒྲིག་འཛུགས་ཀྱི་ལངས་ཕྱོགས་གཡོ་བ་མེེད་པར་དབུ་མའི་ལམ་འོག་ལས་དོན་མང་པོ་འགྲོ་བཞིན་པ་ངོ་སྤྲོད་གནང་རྗེས་དོན་གཅོད་མཆོག་གིས་བོད་མིའི་སྒྲིག་འཛུགས་ནས་རྒྱ་རིགས་འབྲེལ་མཐུད་ཀྱི་ལས་ཀ་ཧ་ཅང་གལ་ཆེན་རྩི་འཇོག་བྱེད་བཞིན་ཡོད་ལ།དབུ་མའི་ལམ་གྱི་དགོངས་དོན་ཇི་བཞིན་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་མི་རིགས་ས་གནས་རང་སྐྱོང་གི་གནས་བབ་ཐོབ་དགོས་པ་དེ་བོད་མིའི་རྩ་དོན་རྩོད་པའི་ལངས་ཕྱོགས་ཡིན་པ་ངོ་སྤྲོད་གནང་དང་། དེ་བཞིན་རྒྱ་ནག་ནང་ནས་ཕྱི་རྒྱལ་ཁག་ཏུ་ཡོད་པའི་རྒྱ་རིགས་རྣམས་ནས་རྒྱ་ནག་ནང་ཡོད་པའི་དཀའ་ངལ་སེལ་བར་ཕྱག་ལས་སྔར་ལྷག་ཡོང་བ་རེ་བ་གནང་གི་ཡོད་པ་དང་། མ་འོངས་པར་ཕྱི་སྡོད་རྒྱ་རིགས་རྣམས་ནས་དེ་ག་དོན་ཁང་གི་རྒྱ་རིགས་འབྲེལ་མཐུད་པའི་ལས་དོན་ལ་རྒྱབ་སྐྱོར་མུ་མཐུད་གནང་རྒྱུའི་འབོད་སྐུལ་གནང་སོང་།
གྲགས་ཅན་དུས་དེབ་པེ་ཅིང་དཔྱིད་ཀའི་རྩོམ་སྒྲིག་པ་ཧུ་ཕིང་ནས་འདས་པའི་ལོ་སུམ་ཅུ་ལྷག་གི་བོད་རྒྱའི་འབྲེལ་བ་དམ་ཟབ་བྱུང་བའི་ལོ་རྒྱུས་དང་། དེང་སང་བོད་ནང་སྤྲོ་འཆམ་ཡོང་མཁན་རྒྱ་རིགས་རྣམས་ནས་བོད་ཀྱི་ས་དང། བོད་མིའི་ལེགས་བྱང་སོགས་ལ་དགའ་སྣང་སྔར་ལས་ལྷག་པ་ཡོང་བཞིན་ཡོད་པ་འགྲེལ་བརྗོད་གནང་སོང་།
ནིའུ་ཡོག་གྲོང་ཁྱེར་མཐོ་སློབ་སློབ་དཔོན་མིང་ཤཱ་ནས་ཉེ་ཆར་རྡ་སར་སེམས་དང་སྲོག་གི་ཚོགས་འདུར་མཉམ་ཞུགས་གནང་པའི་སྐོར་དང་༧གོང་ས་མཆོག་ནི་ཁོང་གི་བསམ་བློའི་དགེ་རྒན་ཡིན་པ་གསུང་སོང་། དེ་མིན་ཁོང་ནས་རྒྱ་རིགས་རྣམས་ནས་༸གོང་ས་མཆོག་བགྲེས་སོང་རྒན་རབས་པ་ཞིག་ངོས་འཛིན་ཐོག་༧གོང་ས་མཆོག་ངོ་ཤེས་བྱུང་ན་རྒྱ་ནག་གཞུང་གིས་༧གོང་ས་མཆོག་ལ་འགྲེལ་བཤད་ལོག་པ་ཇི་ལྟར་བྱས་ཀྱང་ནམ་ཡང་འབྲས་བུ་ཐོན་མི་ཐུབ་པའི་སྐོར་བཤད་སོང་།
ཡང་དཔྱད་གླེང་བ་གྲགས་ཅན་ཁྲེན་ཕོ་ཁུང་གིས་ཨ་རིའི་གཞུང་ནས་བོད་ནང་འགྲོ་འོང་འདྲ་མཉམ་དགོས་པའི་ཁྲིམས་འཆར་ལ་གྲོས་ཚོགས་ནང་སྤྱི་མོས་རྒྱབ་སྐྱོར་བྱུང་བར་བཀྲ་ཤིས་བདེ་ལེགས་ཞུས་སོང་ལ། ཁོང་གིས་ཕྱི་ལོ་ ༢༠༡༩ ལོ་ནི་དམིགས་གསལ་གྱི་བོད་ནང་ང་དགུའི་ཞི་བའི་སྒེར་ལངས་བྱུང་ནས་ལོ་ ༦༠ འཁོར་བ་དང་རྒྱ་ནག་ནང་མང་གཙོའི་སྒེར་ལངས་བྱས་ནས་ལོ་ངོ་ ༣༠ འཁོར་བ། དེ་བཞིན་ཕྱི་ལོ་ ༡༩༨༩ ལོར་བོད་ནང་ཞི་བའི་ཁྲོམ་སྐོར་བྱས་ནས་ལོ་༣༠སོགས་འཁོར་བའི་དུས་ཚོད་མང་པོ་མཉམ་དུ་སླེབས་ཡིན་སྟབས་ལས་འགུལ་སྔར་ལྷག་དགོས་པ་དང་། ༧གོང་ས་མཆོག་གི་སྐུ་ཚེ་རྒྱ་ནག་དམར་པོའི་གཞུང་ལས་རིང་བ་ཡོང་བའི་སྨོན་འདུན་ཞུས་སོང་།
འདུ་འཛོམས་འདིའི་ཐོག་ཐེའི་ཝན་དང་རྒྱ་ནག་ནས་རྒྱ་རིགས་གཞོན་སྐྱེས་མང་པོ་ཕེབས་ཡོད་པ་དང་ཁོ་ཚོས་འདུ་འཛོམས་ཐོག་ཕན་ཚུན་གནས་ཚུལ་བརྗེ་ལེན་དང་འཁྲབ་སྟོན་དུ་མའི་རྗེས་འདུ་འཛོམས་དེ་རྒྱལ་ཁའི་ངང་ལེགས་གྲུབ་བྱུང་ཡོད་པ་བཅས། །
