༢༠༡༨ ཟླ་ ༡༢ ཚེས་ ༢༡ རེས་གཟའ་པ་སངས།
༄༅། །འཕགས་ཡུལ་གནས་མཆོག་རྡོ་རྗེ་གདན་
ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོ
དེ་ཡང་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བརྟན་བཞུགས་དང་འབྲེལ་བའི་སྐོར་འདི་གའི་གསར་འགོད་པར་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་གསུང་ཆོས་ཁག་གཅིག་བཀའ་དྲིན་བསྩལ་རྒྱུ་གཏན་འཁེལ་ཡོད། གསུང་ཆོས་དེ་དག་གི་མཇུག་ཏུ་དགེ་བའི་བྱ་བ་ལྟ་བུའི་ཐོག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་མིའི་སྒྲིག་འཛུགས་ངོས་ནས་བརྟན་བཞུགས་རྒྱས་པ་ཞིག་བསྟར་འབུལ་ཆོག་པ་ཞེས་གསོལ་འདེབས་སྙན་ཞུ་ཟླ་བ་མང་པོའི་གོང་ནས་སྙན་སེང་ཞུས་ཏེ་བཀའ་འཁྲོལ་ཐོབ་པ་བཞིན། ཕྱི་ལོ་ ༢༠༡༨ ཟླ་ ༡༢ ཚེས་ ༣༡ ཉིན་གྱི་སྔ་དྲོར་བོད་མིའི་སྒྲིག་འཛུགས་ནས་བརྟན་བཞུགས་བསྟར་འབུལ་ཞུ་རྒྱུ་རེད། ཕྱིས་སུ་བརྟན་བཞུགས་གསོལ་འདེབས་ཞུ་མཁན་གཞན་པ་མང་པོ་བྱུང་བ་ཡིན་སྟབས། བརྟན་བཞུགས་སྦྱིན་བདག་གཞན་ཁག་གཉིས་མཉམ་དུ་བྱས་ནས་ཕྱི་ཚེས་ ༣༡ ཉིན་བརྟན་བཞུགས་བསྟར་འབུལ་ཞུ་རྒྱུ་རེད།
སྟོན་པ་ཤཱཀྱ་ཐུབ་པ། སྟོན་པ་གཤེན་རབ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་དགོས་དོན་ནི། བོད་མིའི་སྒྲིག་འཛུགས་དང་། འབྲེལ་ཡོད་ཆོས་རིག་ལས་ཁུངས་ངོས་ནས་དུས་ནས་དུས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭའི་ཞབས་རིམ་སྣ་ཚོགས་བསྒྲུབས་དང་སྒྲུབ་མུས་རེད། དེ་བཞིན་བརྟན་བཞུགས་བསྟར་འབུལ་ཞུ་དགོས་པའི་བཀའ་ལུང་དེ་འདྲ་ཕེབས་སྐབས་བརྟན་བཞུགས་བསྟར་འབུལ་ཞུ་གི་ཡོད་རེད། འོན་ཀྱང་ཐེངས་འདིར་བོད་ལོ་གསར་ཚེས་ནས་༸སྐུའི་དགུང་སྐེག་དངོས་གཞིར་ཕེབས་པ་དང་། རྫོགས་ལ་ཉེ་བའི་ལོ་འདི་དགུང་སྐེག་སྔ་བསུར་ལྟ་བུ་གང་ལྟར་དགུང་སྐེག་གི་སྐབས་འཁེལ་བ་ཡིན་སྟབས། དགུང་སྐེག་གི་འགལ་རྐྱེན་བར་ཆད་གང་དང་གང་ཡོད་པ་ཡིན་ནའང་དེ་དག་ཟློག་ཐབས་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸ཞབས་པད་བསྐལ་བརྒྱར་བརྟན་རྒྱུའི་སླད་བརྟན་བཞུགས་བསྟར་འབུལ་ཞུ་རྒྱུ་རེད།
བརྟན་བཞུགས་ཀྱི་ཆོ་ག་ནི། སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་དང་། བརྟན་བཞུགས་ཀྱི་རྡོ་རྗེ་སློབ་དཔོན་ནི་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་གནང་རྒྱུ་དང་ཆོ་གའི་ཞབས་ཞུ་སྐུ་བཅར་རྣམ་གྲྭ་ཕན་བདེ་ལེགས་བཤད་གླིང་གི་མཁན་སློབ་གཙོ་བོར་གྱུར་པའི་བླ་སྤྲུལ་མཁན་སློབ་གཞན་དང་བཅས་པས་སྒྲུབ་བཞག་སོགས་གནང་ཡོད། བདུན་ཕྲག་གཅིག་རིང་སྒྲུབ་བཞག་གནད་སྨིན་གྲུབ་མཚམས་ཕྱི་ཚེས་ ༣༡ ཉིན་བརྟན་བཞུགས་བསྟར་འབུལ་ཞུ་རྒྱུ་རེད།
བརྟན་བཞུགས་ཟེར་དུས་ཆོ་ག་ཙམ་མིན་པར་བརྟན་བཞུགས་འབུལ་མཁན་ངོས་ནས་སྔོན་ལ་སྒྲུབ་དགོས་པ་མང་པོ་ཞིག་ཡོད་རེད། དེར་ཆ་བཞག་པ་ཡིན་ན་དབྱར་གསོལ་སྐབས་ལ་གཞུང་བསྟེན་ཆོས་སྐྱོང་རྣམ་པ་དང་། དེ་བཞིན་རིས་མེད་དབུ་ཁྲིད་བླ་ཆེན་རྣམ་པར་དམིགས་བསལ་ཐུགས་དམ་དང་བཀའ་ལུང་ཞུས་པར་སྐུ་ཕྱྭའི་ཞབས་རིམ་མང་པོ་ཞིག་བབ་ཡོད། ཞབས་རིམ་དེ་དག་སྒྲུབ་དང་བསྒྲུབས་མུས་རེད། དེའི་ནང་སྒྲིག་འཛུགས་ངོས་ནས་ཆོས་སྡེ་ཁག་ལ་དམིགས་བསལ་དོད་དང་ཡོན་ཕུལ་ནས་སྒྲུབ་རྒྱུའི་རིགས་ཤིག་ཡོད་རེད། དེ་བཞིན་མང་ཚོགས་རང་ནས་སྒྲུབ་དགོས་པ་བཅས་ཞབས་བརྟན་རིམ་པ་གཉིས་ཡོད། དེ་དག་ཟླ་བ་ཁ་ཤས་གོང་ནས་བསྒྲུབས་དང་སྒྲུབ་བཞིན་ཡོད་པ་དང་གང་ཙམ་ཞིག་བརྟན་བཞུགས་ཀྱི་སྐབས་སུ་ལེགས་པར་གྲུབ་པ་བྱ་རྒྱུ་རེད། དེར་བརྟེན་བོད་མི་སེར་སྐྱ་མང་ཚོགས་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་གཙོས་སྲི་ཞུའི་ལས་བྱེད་དང་བཅས་པ་ཡོངས་ནས་༸སྐུ་ཕྱྭའི་ཞབས་རིམ་ཁག་གནང་དང་གནང་བཞིན་པ་དེ་དག་མུ་མཐུད་ཤུགས་བརྒྱབ་ནས་འབད་འབུངས་གནང་ཐུབ་པ་ཡིན་ན་དམིགས་བསལ་དགེ་མཚན་ཡོད་རེད་ཅེས་གོ་སྐབས་འདི་བརྒྱུད་ཞུ་རྒྱུ་ཡིན།
འདིའི་ནང་གཙོ་བོ་རྒྱལ་བའི་བཀའ་འགྱུར་རིན་པོ་ཆེ་དག་སྒྲོག་བྱེད་རྒྱུ་དེ་དག་ཆོས་སྡེ་ཁག་ནས་ཞུས་དང་ཞུ་མུས་རེད། དེ་བཞིན་འཕགས་པ་སྤྱན་རས་གཟིགས་ཀྱི་ཡི་གེ་དྲུག་མ་སྐྱ་སེར་མང་ཚོགས་ཡོངས་ནས་གང་མང་འདོན་རྒྱུ་དང་། གཞན་ཡང་རྒྱལ་བའི་མཚན་སྔགས་གསོག་སྒྲུབ་གནང་རྒྱུ་དང་༸སྐུ་ཚེ་དང་འབྲེལ་བའི་ཚེ་ལྷ་རྣམ་གསུམ་གྱི་གཟུངས་སྔགས་དང་སྨན་ལྷ་རིགས་འདོན་གནང་རྒྱུ། ལྷག་པར་༸གོང་ས་མཆོག་གིས་ལྗགས་རྩོམ་མཛད་པའི་དཔལ་ནཱ་ལེནྡྲའི་པཎ་གྲུབ་བཅུ་བདུན་གྱི་གསོལ་འདེབས་གསོག་སྒྲུབ་བྱེད་རྒྱུ་སོགས་བཀའ་ལུང་དགོངས་དོན་ཞབས་རིམ་ཁག་མང་པོ་ཞིག་ཕེབས་ཡོད་པ་ཚང་མས་མཁྱེན་གྱི་ཡོད་རེད། བརྟན་བཞུགས་འབུལ་བ་དང་ཆབས་ཅིག་གང་གཟབ་གཟབ་དང་ནན་པོ་གནང་ཐུབ་ན། ཡག་པོ་ཡོད་རེད་ཅེས་འབོད་སྐུལ་དང་གསོལ་འདེབས་ཞུ་རྒྱུ་ཡིན།
བརྟན་བཞུགས་ལ་རྒྱས་བསྡུས་སྣ་ཚོགས་ཡོད་པའི་ནང་ནས་རྒྱས་པ་དང་། བོད་མིའི་སྒྲིག་འཛུགས་ལ་མཚོན་ན་མང་གཙོའི་ཀ་བ་གསུམ་དང་རང་དབང་ཅན་གྱི་སྡེ་ཚན་སོགས་མ་ལག་མང་པོ་ཡོད་པ་ཡོངས་རྫོགས་ཐུན་མོང་ཐོག་ནས་བརྟན་བཞུགས་བསྟར་འབུལ་ཞུ་རྒྱུ་རེད། བརྟན་བཞུགས་འདི་ཉིད་གལ་ཆེ་དོན་ཆེར་བརྩི་ནས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་རང་དབང་ཅན་གྱི་སྡེ་ཚན་རྣམ་པ་བཅས་ཆེད་གཉེར་བརྟན་བཞུགས་སྐབས་ཕེབས་རྒྱུ་རེད།
བོད་མིའི་སྒྲིག་འཛུགས་ནས་བོད་མི་སྤྱིའི་ཚབ་བྱས་ནས་འགན་མང་པོ་ཞིག་འཁྱེར་གྱི་ཡོད་རེད། བླ་མའི་༸སྐུ་ཚེ་ཞབས་པད་བརྟན་པར་ཞབས་རིམ་ཡག་ཤོས་ནི་ཅི་གསུང་བཀའ་སྒྲུབ་ཞུ་རྒྱུ་དང་། བཀའ་སློབ་དང་དགོངས་པ་དེ་དག་སྒྲུབ་དགོས་པ་ཆགས་ཀྱི་ཡོད། དེའི་ནང་ནས་བཀའ་སློབ་གལ་ཆེ་ཤོས་ནི་ང་ཚོ་བཙན་བྱོལ་དུ་ཕེབས་ནས་གྲུབ་འབྲས་བཟང་ཤོས་གཅིག་གང་ཆགས་ཡོད་ཅེ་ན། བོད་ཀྱི་རིས་སུ་མ་ཆད་པའི་ས་དགེ་བཀའ་རྙིང་གཡུང་དྲུང་བོན་དང་བཅས་པའི་ཆོས་བརྒྱུད་དེ་དག་གི་བཤད་སྒྲུབ་སློབ་གཉེར་དགོན་སྡེ་གྲྭ་ཚང་འཛུགས་རྒྱུ་དེ་དག་འདས་པའི་ལོ་ ༦༠ ནང་གྲུབ་འབྲས་ཧ་ལས་པ་ཡག་པོ་བྱུང་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་དག་གི་ཐོག་ལ་ཐུགས་དགྱེས་ཚོར་མཛད་དགོས་པ་དེ་འདྲ་བྱུང་ཡོད། བར་ལམ་ནས་དུས་ཀྱི་འགྱུར་འགྲོས་དང་རྩ་བའི་གནས་སྟངས་ཀྱི་ཆ་ནས་དགོན་པ་དེ་དག་གི་ནང་གྲྭ་རྒྱུན་ཕྲན་བུ་ཉུང་དུ་འགྲོ་བ་མཚོན་པའི་གནས་སྟངས་གསར་པ་ཞིག་ཆགས་ཀྱི་ཡོད་པ་དང་། ལྷག་པར་བོད་ཀྱི་མཐའ་མཚམས་ཁག་མང་པོ་ཞིག་ལ་དགོན་པ་ཡོད་པ་སོགས་མདོར་ན། ཕྱི་ལོ་ ༡༩༥༩ རྗེས་སུ་ཆེད་དུ་གཉེར་ནས་བཙུགས་པའི་རིས་སུ་མ་ཆད་པའི་ཆོས་བརྒྱུད་ཁག་གི་དགོན་སྡེ་ཆེ་ཁག་གི་ནང་སངས་རྒྱས་ཀྱི་བསྟན་པ་བཤད་སྒྲུབ་གཉིས་ཀྱི་ཐོག་ནས་མུ་མཐུད་ཡག་པོ་ཡོང་སླད་དེ་སྔ་༸གོང་ས་མཆོག་ལ་བཀའ་སློབ་དགོངས་སྐོར་ཞུས་ཏེ་བཙན་བྱོལ་ནང་གི་དགོན་སྡེ་ཁག་ལ་སྟོན་པའི་སྐུ་བརྙན་ཁྲུ་གཉིས་ཅན་ཞིག་༸གོང་ས་མཆོག་གི་དམིགས་བསལ་སྦྱིན་རླབས་དང་ཐུགས་སྨོན་ཅན་གྱི་སྐུ་བརྙན་རེ་དགོན་སྡེ་ཁག་གི་སྐུ་ཚབ་ལ་བརྟན་བཞུགས་དང་སྟབས་བསྟུན་གནང་རྒྱུ་རེད། སྐུ་བརྙན་དེ་སོ་སོའི་དགོན་པའི་ནང་སངས་རྒྱས་ཀྱི་བཤད་སྒྲུབ་ཀྱི་འཆད་ཉན་དེ་དག་མི་ཉམས་རྒྱུན་འཛིན་དང་སྔར་ལྷག་ཡོང་བའི་ཐུགས་སྨོན་མཚམས་སྦྱོར་གནང་ཡོད། དེ་དག་མཁྱེན་པའི་ཐོག་ནས་མང་ཚོགས་ནས་ཐུགས་སྨོན་མཚམས་སྦྱོར་གནང་ཐུབ་པ་ཡིན་ན་ཡག་པོ་ཡོད་རེད། ཅེས་གསུངས།།
