ཕྱི་ལོ་ ༢༠༡༨ ཟླ་ ༡༢ ཚེས་ ༧ རེས་གཟའ་པ་སངས།
༄༅། །འདི་གར་བོད་ཀྱི་བརྙན་འཕྲིན་ཚན་པའི་འགན་འཛིན་རྣམ་རྒྱལ་ཚེ་དབང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༢ ཚེས་ ༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨོ་སི་ཊེ་ལི་ཡའི་རྒྱལ་ས་ཁེན་བྷེ་རི་ཡའི་བོད་མི་ཚོར་ང་ཚོ་བཙན་བྱོལ་བོད་མི་ཚོ་ནང་ཁུལ་ཕྱོགས་རིས་དང་ཆོལ་ཁའི་འཐེན་འཁྱེར་ཐོག་མགོ་འཁོར་ནས་བསྡད་ན་དགྲ་དགའ་གཉེན་སྡུག་བློ་ཕམ་གྱི་རང་བཞིན་རང་ཆགས་ཀྱི་རེད་ཅེས་གསུང་སོང་།
དེ་ཡང་དཔལ་ལྡན་སྲིད་སྐྱོང་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་རང་ཉིད་འཛམ་གླིང་ནང་སྟོབས་ཤུགས་ཆེ་ཤོས་ཆགས་སྒྱུར་འབད་བརྩོན་ཧ་ཅང་ཆེན་པོ་བྱེད་བཞིན་ཡོད། རྒྱལ་ཁབ་གང་འདྲ་ཞིག་སྟོབས་ཤུགས་ཆེ་ཤོས་ཆགས་པ་ཡིན་ནའང་དེ་ལ་བསམ་ཚུལ་གང་ཡང་ཡོད་མ་རེད། འོན་ཀྱང་དམར་ཤོག་གཅིག་འདུས་དབང་འཛིན་རིང་ལུགས་ཀྱི་རྒྱལ་ཁབ་འགྲོ་བ་མིའི་ཐོབ་ཐང་ལ་བརྩི་བཀུར་མེད་མཁན། ཆོས་དད་རང་དབང་ལ་གུས་ཞབས་མེད་པའི་རྒྱལ་ཁབ་ཤིག་འཛམ་གླིང་ནང་སྟོབས་ཤུགས་ཆེ་ཤོས་ཆགས་ན། དེ་ནི་མང་གཙོའི་རྒྱལ་ཁབ་ཚོའི་ཕམ་ཁ་ཆེན་པོ་ཞིག་ཡིན་པ་གསལ་པོ་རེད། དེར་བརྟེན་དེང་སང་ཡུ་རོབ་སོགས་རྒྱལ་ཁབ་མང་པོའི་ནང་གོ་རྟོགས་གསར་པ་ཞིག་སླེབས་ཡོང་གི་འདུག དེ་བཞིན་བོད་དོན་ལའང་དོ་སྣང་ཆེ་རུ་འགྲོ་གི་ཡོད་པ་དེ་སོ་སོའི་ཉམས་མྱོང་གི་ཐོག་ནས་བཤད་ཐུབ་ཀྱི་འདུག ཨོ་སི་ཀྲོ་ལི་ཡའི་ནང་ཡང་དེང་སང་རྒྱ་ནག་གི་ཤུགས་རྐྱེན་ཡོད་པའི་ཐད་མང་ཚོགས་དང་ཤེས་ཡོན་ཅན་ཚོའི་ཁྲོད་བགྲོ་གླེང་ཤུགས་ཆེ་འགྲོ་བཞིན་པ་ཚང་མས་ཤེས་གསལ་རེད།
ཨོ་སི་ཀྲོ་ལི་ཡའི་ནང་ཡོད་པའི་བོད་མི་ཚོར་ཆ་མཚོན་ན་ཆིབ་སྲིད་ཀྱི་ལས་འགུལ་སྤེལ་རྒྱུའི་ནུས་པ་དམིགས་བསལ་ལྡན་ཡོད། བོད་མི་ཆབ་སྲིད་བཙོན་ཟུར་ཚོ་བོད་ནང་རྒྱ་ནག་གཞུང་གི་དྲག་གནོན་དངོས་སུ་མྱོང་མཁན་ཤ་སྟག་ཡིན་དུས་རྒྱལ་སྤྱའི་སྟེངས་བོད་ནང་གི་དངོས་ཡོད་གནས་སྟངས་འགྲེལ་བརྗོད་ལེགས་པར་བྱེད་ཐུབ་ཀྱི་རེད། དེ་ཚོའི་ཐོག་ཚང་མས་ནུས་པ་སྤུངས་དགོས། དེ་ལྟར་མ་ཡིན་པར་ང་ཚོ་བཙན་བྱོལ་བོད་མི་ཁག་གཅིག་ནང་ཁུལ་ཕྱོགས་རིས་དང་ཆོལ་ཁའི་འཐེན་འཁྱེར། ཆེ་ས་གར་འགྲོར་མི་ཤེས་པར་གནད་དོན་ཆུང་ཙག་ཐོག་མགོ་འཁོར་ནས་བསྡད་ན། དངོས་གནས་དགྲ་དགའ་གཉེན་སྡུག་བློ་ཕམ་གྱི་རང་བཞིན་ཆགས་ཀྱི་རེད། ད་ཆ་རང་རིགས་ཚང་མ་རྡོག་རྩ་གཅིག་ཏུ་སྒྲིལ་ནས་བོད་ཀྱི་གནས་དོན་ཐོག་རྒྱལ་སྤྱིའི་ནང་རྒྱབ་སྐྱོར་ཇེ་མཐོར་གཏོང་རྒྱུར་ནུས་པ་ཡོངས་རྫོགས་མཉམ་སྤུང་བྱེད་དགོས་པའི་དུས་ལ་བབ་ཡོད་ཅེས་དང་། དེ་བཞིན་བཀའ་ཤག་གི་འདས་པའི་ལོའི་ནང་ཕྱག་ལས་གནང་སྟངས་དང་། ལྔ་དང་ལྔ་བཅུའི་སྲིད་བྱུས་སོགས་ཀྱི་སྐོར་ངོ་སྤྲོད་གནང་ཡོད་པ་རེད།
དེ་ཉིན་དཔལ་ལྡན་སྲིད་སྐྱོང་མཆོག་གིས་ཨོ་སི་ཊོ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་སྐུ་ཞབས་ Michael Danby མཆོག་དང་མཇལ་འཕྲད་དང་། དེ་བཞིན་ Australia Strategic Policy Institute འགན་འཛིན་སྐུ་ཞབས་Peter Jennings མཆོག་དང་། Sydney Morning Herald གསར་ཤོག་ཁང་གི་རྩོམ་སྒྲིག་པ་ Peter Hartcher གསར་འགོད་པ་གྲགས་ཅན་སྐུ་ཞབས་ Chris Uhlmann ABC གསར་འགྱུར་ལས་ཁང་གི་བདེ་སྲུང་དང་བདེ་འཇགས་སྐོར་གྱི་གསར་འགོད་པ་ Andrew Greene དེ་བཞིན་གྲོས་ཚོགས་འཐུས་མི་ཁག་གཅིག་དང་བགྲོ་གླེང་སྦྱང་བཤད་གནང་སོང།
དཔལ་ལྡན་སྲིད་སྐྱོང་མཆོག་ཨོ་སི་ཊེ་ལི་ཡ་སྐུ་ཚབ་དོན་ཁང་གི་གོ་སྒྲིག་འོག་ཨོ་སི་ཊེ་ལི་ཡ་གཞུང་མང་གཉིས་ལ་ཐུགས་རྗེ་ཆེ་ཞུའི་དུས་སྟོན་མཛད་སྒོར་ལྷན་ཞུགས་དང་། དེ་བཞིན་ས་གནས་ཀྱི་གནད་ཡོད་མི་སྣ་དང་མཇལ་མོལ། བོད་རིགས་མི་མང་དང་ཐུག་འཕྲད་གནང་རྒྱུ་སོགས་མཛད་འཆར་ཡོད་པ་ལྟར་ཟླ་ ༡༢ ཚེས་ ༤ ཉིན་ས་གནས་སུ་ཕེབས་འབྱོར་གནང་ཡོད་པ་རེད།
