ཕྱི་ལོ་ ༢༠༡༨ ཟླ་ ༡༢ ཚེས་ ༡༢ རེས་གཟའ་ལྷག་པ།

༄༅། །རྒྱ་ནག་གཞུང་གི་དམ་དྲག་འོག་ཨ་རིས་གཙོས་ཕྱི་རྒྱལ་བ་ཚོར་བོད་ནང་ཕར་འགྲོ་ཚུར་འོང་བྱེད་མ་བཅུག་པར་བརྟེན། ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་མཆོག་སོགས་ཀྱིས་འབད་བརྩོན་གནང་འབྲས་སུ། ད་ཆ་ཨ་རིའི་གྲོས་ཚོགས་གོང་འོག་གཉིས་ཀས་བོད་ནང་དུ་ཨ་རིའི་མི་སེར་སུ་ཡིན་རུང་རང་དབང་ཐོག་ནས་འགྲོ་འོང་ཆོག་པའི་གྲོས་ཆོད་ལ་སྤྱི་མོས་ཐོག་ནས་རྒྱབ་སྐྱོར་གནང་འདུག  གྲོས་ཆོད་དེ་ཁྲིམས་མཐུན་གཏན་འབེབས་ཐུབ་ཆེད་ད་ཆ་ཨ་རིའི་སྲིད་འཛིན་མཆོག་གི་མཚན་རྟགས་ཁོ་ན་དགོས་པ་མ་གཏོགས་ཁྲིམས་ཀྱི་བརྒྱུད་རིམ་གཞན་གང་ཡང་ལྷག་མེད། དེ་ཡང་གྲོས་ཆོད་དེ་ལྟར་ན་ཨ་རིའི་གཞུང་གི་ལས་བྱེད་དང་གསར་འགོད་པ། མི་སེར་དཀྱུས་མ་བཅས་བོད་ནང་འགྲོ་རྒྱུར་མཐོང་མཆན་མ་སྤྲད་མཁན་རྒྱ་ནག་གཞུང་གི་ལས་བྱེད་སུ་ཡིན་རུང་ཨ་རིའི་ནང་འགྲོ་འོང་བྱེད་མི་ཆོག་པ་རེད།

 དེར་བརྟེན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་གྲོས་ཚོགས་གོང་འོག་གཉིས་ལ་དེ་ལྟ་བུའི་གྲོས་ཆོད་ཧ་ཅང་གལ་གནད་ཅན་དེར་སྤྱི་མོས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་བ་མ་ཟད། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་གཙོ་འགན་ཐོག་གྲོས་ཆོད་དེ་ཁྲིམས་མཐུན་གཏན་འབེབས་ཐུབ་ཆེད་དུས་ཡུན་རིང་པོའི་རིང་ནས་གྲོས་ཚོགས་གོང་འོག་གཉིས་ཀའི་འབྲེལ་ཡོད་གྲོས་ཚོགས་འཐུས་མི་རྣམས་མཇལ་འཕྲད་སོགས་གཞུ་གཏུག་ལས་འགུལ་ཚགས་ཚུད་གནང་བའི་འབྲས་བུ་ཞིག་ཡིན་སྐོར་གསུང་དོན།  “ངས་རྒྱལ་སྤྱིའི་བོད་དོན་ལས་འགུལ་ཚོགས་པའི་དབུ་ཁྲིད་ཀྱི་བྱས་རྗེས་ལ་ཡི་རངས་བསྔགས་བརྗོད་ཐོག་ནས་ངོས་འཛིན་ཞུས་པ་དང་སྦྲགས། ལྷག་པར་རྒྱལ་སྤྱིའི་བོད་དོན་ལས་འགུལ་ཚོགས་པའི་འགན་འཛིན་སྐུ་ཞབས་རི་ཆཌ་སྒེར་Richard Gere མཆོག་དང་། ཚོགས་གཙོ་སྐུ་ཞབས་མེ་ཐིའུ་མེ་ཁ་ཆི་ Matteo Mecacci མཆོག་གིས་གྲོས་ཆོད་དེ་གྲོས་ཚོགས་གོང་འོག་གཉིས་ནང་རྒྱབ་སྐྱོར་ཐོབ་ཆེད་ད་བར་འབད་བརྩོན་གནང་བ་དེར་ལམ་ལྷོངས་བྱུང་བར་དམིགས་བསལ་དགའ་བསུའི་འཚམས་འདྲི་ཞུ་རྒྱུ་ཡིན།

 ལྷག་པར་ངས་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་Jim McGovern མཆོག་གི་ཕུལ་བྱུང་དབུ་ཁྲིད་ཀྱི་ལམ་སྟོན་འོག གྲོས་ཆོད་དེ་ཐོག་མར་གྲོས་ཚོགས་ནང་ཁྲིམས་འཆར་བཏོན་གནང་བ་དང་། དེ་ནས་གྲོས་ཚོགས་འཐུས་མི་སྐུ་ཞབས་རེན་ཌི་ཧལཌ་གི་རེན་ Randy Hultgren མཆོག་དང་། གྲོས་ཚོགས་འཐུས་མི་མར་ཁོ་རུ་བྷིའོ་Marco Rubio མཆོག   དེ་བཞིན་གྲོས་ཚོགས་འཐུས་མི་ཊམ་མི་བྷལ་ཝིན་ Tammy Baldwin མཆོག་གིས་རྒྱབ་སྐྱོར་གནང་བ་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ཕྱོགས་མཚུངས་དངོས་ཤུགས་བརྒྱུད་གསུམ་ནས་གྲོས་ཆོད་དེར་རྒྱབ་སྐྱོར་གནང་མཁན་ཡོངས་ལའང་ཐུགས་རྗེ་ཆེ་ཟེར་རྒྱུ་ཡིན། “ཞེས་གསུང་པ་མ་ཟད། ཨ་རིའི་བོད་ཀྱི་སྐུ་ཚབ་དོན་ཁང་དང་ས་གནས་བོད་རིགས་ཚོགས་པ། དེ་བཞིན་བོད་མི་དང་བོད་དོན་ཐོག་སེམས་ཐག་ཉེ་པོའི་རྒྱབ་སྐྱོར་གནང་མཁན་ཨ་རིའི་མི་མང་བཅས་ལའང་གྲོས་ཆོད་དེ་ཁྲིམས་མཐུན་གཏན་འབེབས་ཡོངས་ཐབས་སུ་དངོས་ཤུགས་བརྒྱུད་གསུམ་ནས་རྒྱབ་སྐྱོར་གནང་བར་བརྟེན་སྲིད་སྐྱོང་མཆོག་གིས་ཐུགས་རྗེ་ཆེ་གསུང་འདུག

 སྤྱིར་སྲིད་སྐྱོང་མཆོག་ཨ་རིའི་ནང་ཐེངས་མང་གཞུང་འབྲེལ་ཕྱོགས་ཕེབས་སྐབས་ཨ་རིའི་གྲོས་ཚོགས་གོང་འོག་གི་གྲོས་ཚོགས་འཐུས་མི་རྣམས་དང་མཇལ་འཕྲད་གནང་སྟེ་གྲོས་ཆོད་དེ་ཁྲིམས་མཐུན་གཏན་འབེབས་ཡོང་ཐབས་ཆེད་འབོད་སྐུལ་ཤུགས་ཆེ་ཞུས་གནང་ཡོད། 

 སྤྱིར་རྒྱལ་སྤྱིའི་བོད་དོན་ལས་འགུལ་ཁང་གིས་ཨ་བོད་མཐུན་ཚོགས་དང་བོད་དོན་རྒྱབ་སྐྱོར་ཚོགས་པ་བཅས་དང་ལྷན་ཕྱི་ལོ་ ༢༠༡༤ ལོ་ཙམ་ནས་གྲོས་ཆོད་དེ་ཁྲིམས་མཐུན་ཡོང་ཐབས་ཆེད་ཚོགས་པ་སོ་སོའི་ཚོགས་མི་རྣམས་ཀྱིས་འབྲེལ་ཡོད་ས་གནས་སོ་སོའི་གྲོས་ཚོགས་འཐུས་མི་རྣམས་མཇལ་འཕྲད་ཞུས་ནས་ཞུ་གཏུག་ལས་འགུལ་རྒྱ་ཆེ་གནང་འགོ་བཙུགས་ཡོད། 

 དེ་ཡང་གྲོས་ཚོགས་འཐུས་མི་སྐུ་ཞབས་མར་ཁོ་རུ་བྷིའོ་Marco Rubio མཆོག་གིས་གྲོས་ཚོགས་གོང་མའི་ནང་གྲོས་ཆོད་དེ་ཐོག་མར་ངོ་སྤྲོད་གནང་སྐབས་གསུང་དོན། “བོད་ནང་གི་དངོས་ཡོད་གནས་སྟངས་ཕྱི་མིར་བལྟ་རུ་མ་བཅུག་པ་དེ་ནི་བོད་མིའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་བ་ཞིག་རེད། རྒྱ་རིགས་ལས་བྱེད་པ་ཚོ་ཨ་རིར་རང་དབང་ཐོག་ནས་འགྲོ་འོང་ཆོག་ཀྱང་། ཨ་རིའི་ལས་བྱེད་དང་གསར་འགོད་པ། ཨ་རིའི་མི་སེར་ཡིན་པའི་བོད་མི་དེ་དག་བོད་ནང་འགྲོ་འོང་ལ་དམ་བསྒྲགས་བྱེད་བཞིན་པ་ནི་མགོ་གཉིས་མའི་བྱེད་བབ་ཅིག་རེད། ངའི་རེ་བར་སྲིད་འཛིན་ཊམ་མཆོག་གིས་གྲོས་ཆོད་དེར་མཚན་རྟགས་སྐྱོན་ནས་ཨ་རྒྱ་ཡུལ་གཉིས་དབར་གོ་སྐབས་འདྲ་མཉམ་ཐོག་བརྗེ་ལེན་ཐུབ་རྒྱུའི་རེ་བ་ཞུ་བཞིན་ཡོད། “ཅེས་གསུངས། 

ཕྱོགས་མཚུངས་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་མེ་ཐིའུ་མེ་ཁ་ཆི་ Matteo Mecacci མཆོག་གིས་“དུས་སྐབས་འདི་ནི་ཨ་རིས་བོད་དོན་ལ་རྒྱབ་སྐྱོར་གནང་བའི་བརྒྱུད་རིམ་ཁྲོད་ལོ་རྒྱུས་རང་བཞིན་ལྡན་པ་ཞིག་དང་།  ས་གནས་བདེ་འཇགས་དང་འབྲེལ་བའི་ཐབས་བྱུས་སྲིད་བྱུས་རྨད་དུ་བྱུང་བ་ཞིག་ཀྱང་རེད། ད་ཐེངས་ཁྲིམས་འཆར་དེ་གྲོས་ཚོགས་གོང་འོག་གཉིས་ཀས་སྤྱི་མོས་ཐོག་ནས་རྒྱབ་སྐྱོར་གནང་བ་དེས་ཨ་རྒྱ་ཡུལ་གཉིས་གོ་སྐབས་འདྲ་མཉམ་ཐོག་ནས་བརྗེ་ལེན་བྱེད་དགོས་པའི་བརྡ་ལན་ཤུགས་ཆེ་ཞིག་བཏང་བ་མ་ཟད། བོད་ཀྱི་གནད་དོན་དེ་ནི་འབྱུང་འགྱུར་ཨ་རིའི་ཕྱི་འབྲེལ་སྲིད་བྱུས་ཁོངས་ནས་གནད་དོན་གཙོ་བོ་ཞིག་ལ་མུ་མཐུད་ངོས་འཛིན་གནང་རྒྱུ་ཡིན་པའི་བརྡ་ལན་ཧ་ཅང་གསལ་པོ་ཞིག་བཏང་བ་རེད།  ཕྱོགས་མཚུངས་ཨ་རིའི་མི་མང་ཚོས་བོད་དོན་ལ་མཐའ་གཅིག་ཏུ་རྒྱབ་སྐྱོར་གནང་བ་དེས། རང་དབང་ལྡན་པའི་མི་མང་ཚོས་པེ་ཅིང་སྲིད་གཞུང་གི་དྲང་བདེན་མིན་པའི་གདུག་རྩུབ་ཅན་གྱི་སྲིད་བྱུས་དེ་ད་ཆ་འཛམ་གླིང་ཁྱོན་དུ་དར་སྤེལ་བྱེད་བཞིན་པར་མཐའ་གཅིག་ཏུ་ངོ་རྒོལ་བྱེད་པ་ཞིག་རེད། ” ཅེས་གསུངས། 

གཞན་ཡང་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་སྐུ་ཞབས་བུ་ཆུང་ཚེ་རིང་ལགས་ཀྱིས་གསུང་དོན། “ད་ཆ་གྲོས་ཆོད་དེ་གྲོས་ཚོགས་ནས་རྒྱབ་སྐྱོར་གནང་ཟིན་སྟབས།   སྲིད་འཛིན་ཊམ་མཆོག་གིས་མཚན་རྟགས་བསྐྱོན་ནས་ཕྱི་སྲིད་ལས་ཁུངས་ཀྱིས་ལག་བསྟར་གནང་བ་བརྒྱུད།  ཨ་རི་བ་དང་བོད་མི་ཚོར་བོད་ནང་འགྲོ་རྒྱུར་ཆོག་མཆན་མི་སྤྲོད་མཁན་རྒྱ་རིགས་ལས་བྱེད་ཚོ་ངོས་འཛིན་གྱིས་ཁོ་པ་ཚོ་ཨ་རིར་འགྲོ་འོང་ལ་དམ་དྲག་བཀག་སྡོམ་གནང་དགོས། ” ཞེས་གསུངས། །