ཕྱི་ལོ་ ༢༠༡༨ ཟླ་ ༡༢ ཚེས་ ༢༡ རེས་གཟའ་པ་སངས།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༢ ཚེས་ ༢༠ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་དང་། རྒྱུད་སྨད་གངས་ཅན་རིག་གནས་སློབ་གྲྭ་ཟུང་འབྲེལ་ཐོག་གོ་སྒྲིག་ཞུས་པའི་བོད་ཀྱི་སྐད་ཡིག་དང་ནང་དོན་རིག་པའི་ཟླ་དྲུག་ཟབ་ཁྲིད་ཐེངས་ལྔ་པ་དེ་ལེགས་གྲུབ་བྱུང་ཡོད།
དེ་ཡང་གོང་ཚེས་མཇུག་བསྡོམས་ཀྱི་མཛད་སྒོར་སློབ་དགེ་སྔགས་རམས་པ་དགེ་ཡོན་ཏན་ལགས་ཀྱིས་མཛད་སྒོ་ངོ་སྤྲོད་དང་འབྲེལ་ཟླ་དྲུག་ཟབ་ཁྲིད་ཀྱི་ལས་བསྡོམས་སྙན་སྒྲོན་ཞུས་ཡོད།
མཛད་སྒོའི་སྐུ་མགྲོན་བོད་མི་མང་ཕྱོགས་བཞུགས་སྤྱི་འཐུས་མི་འགྱུར་རྡོ་རྗེ་མཆོག་དང་། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་ཧོན་སུར་རབ་རྒྱས་གླིང་གི་ས་གནས་འགོ་འཛིན་ལྷག་པ་སྒྲོལ་མ་ལགས་བཅས་ཆེད་ཕེབས་ཀྱིས་ལས་འཆར་དང་འབྲེལ་བའི་གསུང་བཤད་དོན་སྙིང་ལྡན་པ་གནང་ཡོད། སྐབས་དེར་ཟབ་ཁྲིད་འདིའི་མཐའ་མའི་ཡིག་རྒྱུགས་ཀྱི་གྲུབ་འབྲས་རྩེ་ཕུད་གསུམ་དང་། ཉེ་བའི་རྩེ་ཕུད་གསུམ་ལ་བྱ་དགའ་གསོལ་རས་དང་། དེ་བཞིན་སློབ་ཕྲུག་སྤྱི་ཡོངས་ལ་བསླབ་པ་མཐར་སོན་གྱི་ཕྱག་ཁྱེར་ཡང་གནང་ཡོད་པ་རེད། ཕྱོགས་མཚུངས་ཆོས་རིག་ལས་ཁུངས་ནས་ཟབ་ཁྲིད་གནང་མཁན་འབྲེལ་ཡོད་དགེ་ལས་ཡོངས་ལ་ཐུགས་རྗེ་ལེགས་གསོལ་ཡང་གནང་ཡོད།
ཐེངས་འདིའི་ཟབ་ཁྲིད་ཐོག་མཐོ་སློབ་དང་འཛིན་རིམ་བཅུ་གཉིས་ཐོན་པའི་སློབ་ཕྲུག་ཕོ་མོ་ཁྱོན་གྲངས་ ༡༨ ཀྱིས་མཉམ་ཞུགས་གནང་ཡོད་ཅིང་། ཟླ་དྲུག་ཟབ་ཁྲིད་ཀྱི་སློབ་ཚན་དུ་བོད་ཀྱི་སྐད་ཡིག་སུམ་རྟགས་དག་གསུམ་དང་། རིགས་ལམ། ཆོས་འབྱུང་། གྲུབ་མཐའ། ཚད་མ། ཕར་ཕྱིན། དབུ་མ། མཛོད་བཅས་ཀྱི་སྙིང་བཅུད་བཏུས་པའི་སློབ་དེབ་ཕྱོགས་བསྒྲིགས་ཡོད་པ་ལྟར་སློབ་ཁྲིད་གནང་ཡོད་པ་དང་།
ནང་པའི་གཞུང་ཆེན་དེ་དག་ལ་སློབ་གཉེར་གནང་བའིི་གྲུབ་འབྲས་སུ་སློབ་ཕྲུག་ཚོའི་སེམས་ཁམས་ལ་སྤྲོ་སྣང་དང་གདེང་སྤོབས་སླེབས་ཤིང་བསམ་པའི་ཁྱེར་བཟོར་བཟང་ཕྱོགས་ཀྱི་འགྱུར་བ་ཐེབས་ཚུལ་འབྲེལ་ཡོད་དགེ་ལས་ཚང་མས་གླེང་བ་དང་། དགོས་པ་རྒྱུ་མཚན་དེ་དག་བརྟེན་ནས་ཆོས་རིག་ལས་ཁུངས་དང་རྒྱུད་སྨད་གངས་ཅན་རིག་གནས་སློབ་གྲྭ་ཟུང་འབྲེལ་ཐོག་ཟབ་ཁྲིད་འདི་ལོ་ལྟར་ཕྱི་ཟླ་ ༧ ནས་ཕྱི་ཟླ་༡༢ བར་ཟླ་བ་དྲུག་རིང་མུ་མཐུད་བསྟར་ཆགས་སུ་ཚུགས་རྒྱུ་ཡིན་པར་བརྟེན། མཐོ་སློབ་ཐོན་པའི་གཞོན་སྐྱེས་ཕོ་མོ་སུ་ཡང་བོད་ཀྱི་སྐད་ཡིག་དང་ནང་དོན་རིག་པར་སློབ་སྦྱོང་གནང་འདོད་ཡོད་པ་རྣམས་ཕེབས་འཐུས་བཅས།།
