ཕྱི་ལོ་ ༢༠༡༨ ཟླ་ ༡༢ ཚེས་ ༢༧ རེས་གཟའ་ཕུར་བུ།

༄༅། །ཕྱི་ལོ་ ༢༠༡༨ ཟླ་ ༡༢ ཚེས་ ༢༦ རེས་གཟའ་ལྷག་པའི་ཉིན་བོད་མིའི་སྒྲིག་འཛུགས་ཀྱི་ནང་སྲིད་དྲུང་ཆེ་དཔེ་ཟུར་དབང་འདུས་ཚེ་རིང་ལགས་དང་ཕྱི་དྲིལ་དྲུང་འཕར་ཚེ་དབང་རྒྱལ་པོ་ཨརྱ་ལགས་རྣམ་གཉིས་རྒྱ་གར་རྒྱལ་ས་ལྡི་ལིར་རྒྱ་གར་དབུས་གཞུང་གི་ནང་སྲིད་བློན་ཆེན་གཞོན་པ་སྐུ་ཞབས་ཀི་རེན་རི་ཇི་ཇུ་ Shri Kiren Rijiju མཆོག་དང་། རྒྱ་གར་དབུས་ནང་སྲིད་ལས་ཁུངས་ཀྱི་ཁྱབ་ཁོངས་སྐྱབས་བཅོལ་རོགས་རམ་ FFR Division ཚན་པའི་ཟུང་དྲུང་སྐུ་ཞབས་ Shri K.B Singh ལགས་སོགས་མཇལ་འཕྲད་ཀྱིས་རྒྱ་གར་དབུས་གཞུང་གིས་གཏན་ལ་ཕབ་པའི་བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ གཙོ་བོར་གྱུར་བའི་བོད་མི་རྣམས་ལ་མཐུན་འགྱུར་རོགས་རམ་རྒྱ་ཆེ་གནང་དང་གནང་མུས་ལ་ཐུགས་རྗེ་ཆེ་ཞུས་པ་དང་སྦྲགས། དེང་སྐབས་གཞིས་ཆགས་ཁག་ཏུ་ཡོད་པའི་བོད་མི་བཙན་བྱོལ་བ་རྣམས་ཀྱི་གནས་སྟངས་ཇི་ཡིན་ཞིབ་ཕྲ་གསལ་བཤད་ཞུས་པ་མ་ཟད། རྒྱ་གར་གཞུང་གིས་དེ་སྔ་ཞལ་བཞེས་གནང་བའི་ཡར་རྒྱས་ཀྱི་ལས་གཞི་མཇུག་སྐྱོང་གནང་སྒོ་ཁག་གཅིག་གི་སྐོར་ཡང་དྲན་སྐུལ་ཞུས་གནང་འདུག

མཇལ་འཕྲད་སྐབས་ལྡི་ལི་སྐུ་ཚབ་དོན་ཁང་གི་དྲུང་ཆེ་ཚེ་རིང་དོན་གྲུབ་ལགས་དང་། ཀརྨ་འཕྲིན་ལས་ལགས་ལྷན་དུ་བཅར་ཡོད་པ་བཅས། །