༄༅། །ཕྱི་ལོ་ ༢༠༡༨ ཟླ་ ༡༢ ཚེས་ ༡༩ རེས་གཟའ་ལྷག་པ་ཉིན་རྒྱ་གར་བྱང་ཕྱོགས་ཀ་ཤི་མིར་དུ་རྟེན་གཞི་བྱས་པའི་ཤྲི་ན་གར་བོད་རིགས་སློབ་གྲྭའི་འཛིན་སྐྱོང་འགན་འཛིན་མ་སུཐ་སྦཌ་ལགས་ཀྱི་སྣེ་ཁྲིད་འོག་ཤྲི་ན་གར་བོད་རིགས་སློབ་གྲྭའི་འཛིན་རིམ་བརྒྱད་པ་དང་དགུ་པ།བཅུ་པ་བཅས་ཀྱི་ཁྱོན་སློབ་ཕྲུག་གྲངས་ ༡༥ དང་། དགེ་རྒན་ ༣། ས་གནས་ཀྱི་གཞོན་ནུའི་འཐུས་མི་ ༢ བཅས་བཞུགས་སྒར་རྡ་སར་ཤེས་ཡོན་སྐོར་བསྐྱོད་དུ་ཕེབས་ཡོད། 

དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣།༡༠ ཐོག་སློབ་ཕྲུག་དེ་དག་བོད་མིའི་སྒྲིག་འཛུགས་བཀའ་ཤག་ཏུ་བཅར་སྐབས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འཚམས་འདྲི་དང་སྦྲགས་གསུང་དོན། ཁྱེད་རང་ཚོའི་ཆས་གོས་མི་འདྲ་བ་ཞིག་ཡོད་པ་མ་གཏོགས་བོད་རིགས་གཅིག་པ་ཡིན། ང་ཚོ་དང་ཁྱེད་ཚོ་ཞེས་ཟེར་རྒྱུ་མེད། ང་ཚོ་ཚང་མ་བོད་རིགས་སྤུན་ཟླ་ཡིན། ང་ཚོའི་ལས་འགན་རྩ་ཆེ་ཤོས་དེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་གཞི་སྒྲུབ་ཐབས་བྱ་རྒྱུ་དེ་ཡིན། སློབ་སྦྱོང་དང་ལས་དོན་གང་འདྲ་ཞིག་བྱེད་རུང་དཀའ་ལས་བརྒྱག་རྒྱུ་དང་། དོ་དབྱིངས་དང་འདུན་པ་ཆེན་པོའི་སྒོ་ནས་བྱ་རྒྱུ་ཧ་ཅང་གལ་ཆེན་པོ་རེད།  དཀའ་ངལ་ལ་མ་འཛེམས་པར་བརྩོན་འགྲུས་བྱེད་ཐུབ་ན་མི་ཚེ་ལམ་ལྷོང་དང་དོན་དང་ལྡན་པ་ཞིག་ཡོང་གི་རེད།  བོད་མིའི་ཐུན་མིན་ཆོས་དང་རིག་གཞུང་། སྐད་ཡིག་ལ་སོགས་མི་ཉམས་རྒྱུན་འཛིན་དང་། ཉམས་པ་སླར་གསོ་བྱ་རྒྱུ་ཧ་ཅང་གལ་ཆེན་པོ་ཡིན་པ་མ་ཟད། དེ་ང་ཚོའི་ལས་འགན་ཞིག་ཀྱང་ཡིན། 

གཞན་ཡང་ངས་དུས་རྒྱུན་དུ་ཕྱི་རྒྱལ་སློབ་ཕྲུག་རྣམས་ལ་ཕྱིའི་ཡུལ་མི་དང་ལྷན་དུ་འབྲེལ་བ་དམ་ཟབ་དང་མཐུན་སྒྲིལ་བྱེད་དགོས་རྒྱུ་ཧ་ཅང་གལ་ཆེན་པོ་རེད། འོན་ཀྱང་སོ་སོའི་མི་རིགས་ཀྱི་ངོ་བོ་དེ་ནམ་ཡང་བརླག་རྒྱུ་མེད། ཅེས་དང་། བོད་མིའི་ངོ་བོ་དང་། མི་རིགས་ལ་གདེང་སྤོབས་ཆེན་པོ་དགོས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དུས་ནམ་ཡང་བརྗེད་རྒྱུ་མེད། ཅེས་གསུངས་རྗེས་དཔལ་ལྡན་སྲིད་སྐྱོང་མཆོག་གིས་རང་ཉིད་རྒྱ་གར་བྱང་ཤར་ས་ཁུལ་ནས་ཁྱིམ་ཚང་ཉམ་ཆུང་ཞིག་གི་བུ་ཡིན་པ་དང་། དེ་རྗེས་རིམ་བཞིན་སློབ་སྦྱོང་ཐོག་དཀའ་ལས་བརྒྱབ་ནས་ད་ལྟ་བོད་མིའི་སྲིད་སྐྱོང་ཆགས་ཐུབ་ཡོད་སྐོར་སོགས་ཀྱི་གསུང་བཤད་གནང་རྗེས་སློབ་ཕྲུག་རྣམས་ཀྱི་དྲི་བར་ལན་འདེབས་ཞིབ་རྒྱས་གནང་ཡོད། 

སྤྱིར་ཤྲི་ན་གར་བོད་རིགས་སློབ་གྲྭའི་སློབ་ཕྲུག་རྣམས་ཕྱི་ལོ་ ༢༠༡༨ ཟླ་ ༡༢ ཚེས་ ༡༨ ནས་ ༢༡ བར་ཉིན་གྲངས་བཞི་རིང་བཞུགས་སྒར་རྡ་སར་ཤེས་ཡོན་སྐོར་བསྐྱོད་དུ་ཕེབས་འདུག་པ་བཅས། །