ཕྱི་ལོ་ ༢༠༡༨ ཟླ་ ༡༢ ཚེས་ ༧ རེས་གཟའ་པ་སངས།
༄༅། །འདི་གར་བོད་ཀྱི་ཟློས་གར་ཚོགས་པས་བཏང་གནས་ནང་འཁོད་དོན། བོད་ཀྱི་ཟློས་གར་ཚོགས་པར་གླུ་གར་དང་རོལ་མོ་སོགས་སློབ་སྦྱོང་བྱེད་བཞིན་པའི་ཨ་རུ་ན་ཅལ་མངའ་སྡེའི་མོན་རྟ་དབང་གི་སློབ་ཕྲུག་ ༡༠ པོ་རྣམས་མངའ་སྡེའི་བློན་ཆེན་མཆོག་ནས་གསུང་འཕྲིན་བརྒྱུད་དབུས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་ལ་ཇི་ལྟར་བཀའ་འཁྲོལ་ཞུས་དོན་བཞིན། ཕྱི་ལོ་ ༢༠༡༩ ཟླ་ ༡ ནས་ཟླ་ ༣ བར་སློབ་སྦྱོང་གི་དུས་ཡུན་འཕར་འགྱངས་ཞུ་འཆར་གྱི་གནད་དོན་དེའི་ཐད། ད་ལམ་ཨ་རུ་གནའ་ཅལ་མངའ་སྡེའི་ཆོས་རིག་ལྷན་ཚོགས་ཀྱི་དབུ་འཛིན་འཇམ་དཔལ་དབང་འདུས་མཆོག་དང་། བོད་ཀྱི་ཟློས་གར་ཚོགས་པའི་འགན་འཛིན་ངག་དབང་ཡོན་ཏན་ལགས་རྣམ་གཉིས་དབར་བཀའ་མོལ་ཞིབ་ཕྲ་བྱུང་ཡོད།
གོང་གསལ་མོན་གྱི་སློབ་ཕྲུག་བཅུ་པོ་རྣམས་ནི། ཕྱི་ལོ་ ༢༠༡༨ ཟླ་ ༠༨ ནས་སྦྱོང་བརྡར་དབུ་འཛུགས་ཞུས་ཏེ་ད་ལྟའི་ཆར་འདི་ག་ཟློས་གར་དུ་སློབ་སྦྱོང་བྱེད་མུས་ཡིན་པ་དང་། ཁོང་རྣམས་ནི་ཉེ་འཆར་གསར་དུ་དབུ་འཛུཌ་ཞུས་མ་ཐག་པའི་ཨ་རུ་ན་ཅལ་མངའ་སྡེ་མོན་གྱི་ཟློས་གར་ཚོགས་པ་དེའི་དགེ་རྒན་དུ་བསྐོ་བཞག་བྱ་རྒྱུ་ཡིན་འདུག་ཅིང་། དེ་ཡང་སྒྱུ་རྩལ་སློབ་འཁྲིད་འགན་འཛིན་བསམ་གཏན་དོན་གྲུབ་ལགས་ཀྱིས་གསུངས་དོན་ལྟར་ན། སྔར་ཡོད་མོན་གྱི་སྲོལ་རྒྱུན་རིག་གཞུང་རྣམས་སྒྱུ་རྩལ་གྱི་ལམ་ནས་གོང་སྤེལ་གཏོང་བའི་ཆེད་དུ།གླུ་གཞས་གཏོང་བ་དང་། ཟློས་གར་འཁྲབ་སྟོན། རོལ་ཆ་དཀྲོལ་ལེན་སོགས་སུ་དམིགས་པ་ཞིག་རེད་ཅེས་གསུང་གི་འདུག ཕྱི་ལོ་ ༢༠༡༨ ཟླ་ ༡༢ ཚེས་ ༣ ནས་ ༥ བར་རྒྱ་གར་ཨུ་ཏྟར་པྲ་དེཤ་མངའ་སྡེའི་སཾ་ཀི་སའམ་སངས་རྒྱས་ལྷ་ལས་བབས་པའི་གནས་སུ་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་སྤྱན་སྔར་མོན་གྱི་སློབ་ཕྲུག་རྣམས་ནས་གཞས་སྣ་ཁག་དྲུག་དང་། བོད་ཀྱི་ཟློས་གར་ཚོགས་པའི་གླུ་གཞས་ལྔ་བཅས་མཉམ་དུ་སྤྱན་འབུལ་ཞུ་རྒྱུའི་སྐལ་བཟང་གི་གོ་སྐབས་བྱུང་བ་ནི། ༸རྒྱལ་བ་དགྱེས་པའི་མཆོད་སྤྲིན་ཉིད་ལས་གཞན་དུ་ཅི།
