ཕྱི་ལོ་ ༢༠༡༨ ཟླ་ ༡༡ ཚེས་ ༡༣ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༦ ནས་ ༩ བར་ཉིན་གྲངས་བཞིའི་རིང་ཨུ་རུ་སུའི་རྒྱལ་ས་མོ་སི་ཁོ་ནང་ཨུ་རུ་སུའི་སྐད་ཡིག་ཐོག་ནང་པའི་དཔེ་གཞུང་ཡིག་སྒྱུར་བྱེད་པོ་ལོ་ཙཱ་བ་རྣམས་ཀྱི་ཆེད་དུ་ཨུ་རུ་སུའི་རྒྱལ་ཡོངས་ཉམས་ཞིབ་དང་སྦྱོང་བརྡར་གྱི་ཚོགས་འདུ་ཐེངས་དང་པོ་ཚོགས་ཡོད་པ་དང་། ཚོགས་འདུའི་སྟེང་ཨུ་རུ་སུའི་གྲགས་ཅན་ལོ་ཙཱ་བ་དང་། ཉམས་ཞིབ་པ། ནང་པའི་དཔེ་སྐྲུན་བྱེད་པ་པོ་བཅས་མཉམ་ཞུགས་གནང་ཡོད།
དེ་ཡང་ལོ་རྒྱུས་རང་བཞིན་ལྡན་པའི་ཚོགས་འདུ་དེ་གོ་སྒྲིག་གནང་མཁན་མོ་སི་ཁོ་ནང་རྟེན་གཞི་བྱས་པའི་བོད་སྐྱོབ་དགེ་རྩ་ཚོགས་པ་ Save Tibet Foundation Moscow དང་། ཨུ་རུ་སུ་སྐུ་ཚབ་དོན་གཅོད་ཁང་། ཨུ་རུ་སུའི་ཚན་རིག་སློབ་གཉེར་ཁང་། Russian Academy of Science ཨུ་རུ་སུའི་ལྟ་གྲུབ་རིག་པའི་སློབ་གཉེར་ཁང་ Institute of Philosophy བཅས་ཡིན། གོ་སྒྲིག་ཚོགས་ཆུང་གི་ཚོགས་གཙོ་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ཡིན།
རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་ཨུ་རུ་སུའི་ནང་བསྟན་པ་སྔ་དར་དང་ཕྱི་དར་སྐོར་ངོ་སྤྲོད་གསུང་བཤད་གནང་བའི་ཐོག་ཨུ་རུ་སུ་གཞུང་ནས་རྒྱ་གར་ནང་རྟེན་གཞི་བྱས་པའི་བོད་ཀྱི་དགོན་སྡེ་ཁག་དང་སློབ་གཉེར་ཁང་སོགས་ཀྱི་ནང་སློབ་ཕྲུག་བཏང་བའི་སྐོར། དེ་བཞིན་ད་ལྟ་རྒྱ་གར་ནང་སློབ་གཉེར་གནང་བཞིན་པ་དང་བསླབ་པ་མཐར་སོན་པའི་སློབ་ཕྲུག་རྣམས་ཀྱི་གནས་སྟངས་སྐོར། མ་འོངས་པར་རྒྱ་གར་ནང་སློབ་གཉེར་གནང་བཞིན་པ་དང་བསླབ་པ་མཐར་སོན་པའི་སློབ་ཕྲུག་རྣམས་ཀྱི་ཆེད་ཚོགས་འདུ་གོ་སྒྲིག་གནང་རྒྱུ་ཡིན་པའི་སྐོར་སོགས་གསུངས་པ་དང་སྦྲགས། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ལོ་ཙཱ་བ་རྣམ་པ་དང་། མཁས་དབང་རྣམ་པ། ནང་པའི་གཞུང་ལ་ཆེད་སྦྱོང་གནང་མཁན་རྣམ་པ། དེ་བཞིན་མཉམ་ཞུགས་པ་སོགས་ནས་རྒྱབ་སྐྱོར་དང་གདུང་སེམས་མཉམ་སྐྱེ་གནང་བར་ཐུགས་རྗེ་ཆེ་ཞུས་གནང་ཡོད།
ལྕམ་སྐུ་ཀར་པི་ཝི་ན་ Dr.Krapivina ལགས་ཀྱིས་ཨུ་རུ་སུའི་སྐད་ཡིག་ཐོག་ནང་པའི་དཔེ་གཞུང་ཡིག་སྒྱུར་གྱི་གལ་གནད་རང་བཞིན་སྐོར་མདོར་བསྡུས་གསུངས་པ་དང་འབྲེལ་ཚོགས་འདུ་གོ་སྒྲིག་ཚོགས་ཆུང་གི་ཚོགས་གཙོ་ཏེ་ལོ་རིན་པོ་ཆེ་མཆོག་ལ་ཐུགས་རྗེ་ཆེ་ཞུའི་ཁ་བཏགས་ཤིག་ཕུལ་ཏེ་ཚོགས་མི་རྣམ་པར་ཐུགས་རྗེ་ཞུས་ཡོད།
མཁས་དབང་ཨན་ཌི་རེ་ Dr.Andrey Terentyev ལགས་ཀྱིས་པཱ་ལི་ཆོས་བརྒྱུད་ཀྱི་གཞུང་ནས་གསུང་བའི་གསུང་ལུང་འདྲེན་གནང་ཏེ་ལོ་ཙཱ་བའི་ལས་ཀའི་གལ་གནད་སྐོར་སྙིང་བསྡུས་གསུང་བ་དང་། ལོ་ཙཱ་བའི་རྣམ་གཞག་སྤྱི་དང་། དེ་བཞིན་ལོ་ཙཱ་བའི་མཐུན་ཚོགས་ཤིག་འཛུགས་དགོས་པའི་སྐོར་གསུངས།
ལྕམ་ལེ་སན་ཀོ་ Dr.Lysenko ལགས་ཀྱིས་ཚོགས་འདུའི་ཐོག་འཛུལ་ཞུགས་གནང་མཁན་དང་གོ་སྒྲིག་གནང་མཁན་ཡོངས་ལ་ཐུགས་རྗེ་ཆེ་ཞུས། ཕྱོགས་མཚུངས་ནང་པའི་དཔེ་གཞུང་ཡིག་སྒྱུར་གྱི་ལས་དོན་རྣམས་ལམ་ལྷོངས་ཡོང་བའི་སྨོན་འདུན་ཞུས་གནང་ཡོད་པ་བཅས། །
