ཕྱི་ལོ་ ༢༠༡༨ ཟླ་ ༡༡ ཚེས་ ༡༧ རེས་གཟའ་སྤེན་པ།

༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༡༦ རེས་གཟའ་པ་སངས་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གྲོང་ཁྱེར་ཡོ་ཀོ་ཧ་མར་ཐེ་ཝན་ནས་ཕེབས་པའི་དད་ལྡན་ཆོས་ཞུ་བ་རྣམས་ལ་མཇལ་ཁ་དང་བཀའ་སློབ་སྩལ་རྗེས། ཡོ་ཀོ་ཧ་མའི་རྒྱལ་ཡོངས་ཚོགས་ཁང་དུ་ནང་པའི་གཞུང་ནས་གསུང་པའི་ཚན་རིག་དང་། དེང་རབས་ཚན་རིག་དབར་གྱི་བགྲོ་གླེང་ལྷན་ཚོགས་སུ་ལྷན་ཞུགས་མཛད་དེ་བཀའ་སློབ་སྩལ་འདུག 

དེ་ཡང་གློ་གླེང་དབུ་འཛུགས་ཀྱིས་ཐོག་མར་ཡུ་ཀོ་ཡ་མ་གུ་ཅི་ལགས་ཀྱིས་ཚོགས་བཅར་བ་མི་གྲངས་ ༥༠༠༠ ཙམ་ལ་བགྲོ་གླེང་ལྷན་ཚོགས་སྐོར་ངོ་སྤྲོད་གསུང་བཤད་གནང་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་བསུའི་འཚམས་འདྲི་དང་སྦྲགས་བཀའ་སློབ་སྩལ་དོན། དེ་རིང་འདིར་ལྷན་འཛོམས་ཀྱིས་ནང་པའི་ཚན་རིག་དང་དེང་རབས་ཚན་རིག་དབར་བགྲོ་གླེང་བྱ་རྒྱུ་རེད།  ངོས་ཀྱིས་འདས་པའི་ལོ་ ༣༠ ལྷག་རིང་གཙོ་ཆེར་ཨ་རི་རེད། ཡུ་རོབ། དེ་བཞིན་རྒྱ་གར་གྱི་ཚན་རིག་པ་དང་བགྲོ་གླེང་བྱས་པ་ཡིན། 

ངོས་ཀྱིས་བགྲོ་གླེང་འདི་ལྟ་བུ་ཞིག་ཚོགས་དགོས་པའི་དམིགས་ཡུལ་གཙོ་བོ་གཉིས་ཡོད། དང་པོ་ནི། དེང་རབས་ཚན་རིག་པས་འཇིག་རྟེན་ཕྱིའི་དངོས་པོར་དོ་སྣང་ཆེ་བ་བྱེད་པ་མ་གཏོགས་ནང་ཤེས་པར་དོ་སྣང་བྱེད་ཀྱི་མེད། འགྲོ་བ་མི་ནི་ཕྱིའི་ཕུང་པོ་ལས་གྲུབ་པ་ཙམ་མིན་པར་ཚོར་ཤེས་ཀྱང་ཡོད་པར་བརྟེན་ཚན་རིག་པས་ནང་སེམས་དང་སེམས་ཚོར་སྐོར་ཉམས་ཞིབ་བྱེད་དགོས་རྒྱུ་ཧ་ཅང་གལ་ཆེན་པོ་རེད། 

གཉིས་པ་ནི། དེང་སྐབས་འཛམ་གླིང་ནང་བསམ་བློ་གཏོང་སྟངས་ཐོག་ནས་དཀའ་ངལ་འཕྲད་བཞིན་ཡོད། དུས་རབས་ཉི་ཤུའི་ནང་འཛམ་གླིང་དམག་ཆེན་ཐེངས་གཉིས་བྱུང་ཡོད་པ་དང་། དམག་ཆེན་གཉིས་པའི་སྐབས་ལ་ཉི་ཧོང་གི་གྲོང་ཁྱེར་ཧི་རོ་ཤི་མ་དང་ན་ག་ས་ཀི་གཉིས་ནང་རྡུལ་ཕྲན་མཚོན་ཆ་གཡུག་པ་སོགས་ཧ་ཅང་འཇིགས་སྣང་སྐྱེས་དགོས་པའི་དྲག་གཅོད་ཀྱིས་དམག་ཐབས་འོག་མི་གྲངས་ས་ཡ་གཉིས་ཙམ་གྱི་ཚེ་སྲོག་ཤོར་ཡོད། ད་ལྟ་དུས་རབས་ ༢༡ སྐབས་འདིར་ཡང་དཀའ་ངལ་དེ་དག་དྲག་པོའི་སྟོབས་ཤུགས་ཐོག་ནས་སེལ་ཐུབ་རྒྱུ་རེད་བསམ་པའི་ཡིད་ཆེས་བྱེད་བཞིན་འདུག བསམ་ཚུལ་དེ་དག་མཐའ་གཅིག་ཏུ་ནོར་འཁྲུལ་ཆེན་པོ་རེད། དེར་བརྟེན་ང་ཚོས་དུས་རབས་ ༢༡ འདི་བཞིན་ཞི་བདེའི་དུས་རབས་བསྐྲུན་རྒྱུར་འབད་བརྩོན་བྱེད་དགོས།

དེར་བརྟེན་འཚེ་བ་དང་དྲག་པོའི་ཐབས་ལམ་ཟེར་བ་དེ་ད་ཆ་དུས་ཚོད་ཡོལ་ཟིན་པའི་སྐོར་མང་ཚོགས་ལ་གོ་རྟོགས་སྤེལ་དགོས་ངེས་ཡིན། ཕྱི་འཇིག་རྟེན་དུ་ཞི་བདེའི་སྤེལ་བར་ཆེས་ཐོག་མར་ནང་སེམས་ཀྱི་ཞི་བདེ་ཡར་རྒྱས་གཏོང་དགོས།

དེ་སྔ་ཡིན་ན་འདི་ལྟ་བུ་ཚོགས་འདུ་ནུབ་ཕྱོགས་རྒྱལ་ཁབ་ཁག་ཏུ་ཚོགས་ཀྱི་ཡོད་ནའང་དེང་སྐབས་ནང་པའི་ཡུལ་གྲུ་ཉི་ཧོང་དུ་ནང་པའི་ཚན་རིག་དང་། དེང་རབས་ཚན་རིག་དབར་བགྲོ་གླེང་ཚོགས་བཞིན་པར་ངོས་རང་ཧ་ཅང་དགའ་པོ་བྱུང་། དེང་སྐབས་ཚན་རིག་པ་ཚོས་འཇིག་རྟེན་ཁམས་ཀྱི་རིག་པ་ Cosmology དང་། འབར་གས་ཆེན་པོའི་རྣམ་གཞག་ Big Bang Theory སོགས་ནི་ང་ཚོ་ནང་པའི་གཞུང་ནས་ཀྱང་གསུང་ཡོད།

དུས་རྟག་ཏུ་ཁོང་ཁྲོ་དང་། ཞེ་སྡང་། ང་རྒྱལ། དེ་བཞིན་འཇིགས་སྣང་འོག་གནས་པ་ཡིན་ན་ལུས་པོའི་འཕྲོད་བསྟེན་ཉམས་རྒུད་འགྲོ་བཞིན་ཡོད།ཅེས་སོགས་ཀྱི་བཀའ་སློབ་སྩལ་རྗེས་མང་ཚོགས་ཀྱི་དྲི་བ་ཁག་གཅིག་ལ་བཀའ་ལན་སྩལ་ཡོད་པ་བཅས། །